Malagipyo Pay Aya?

Inapresiaryo kadi a binasa dagiti nabiit pay a ruar Ti Pagwanawanan? Bueno, kitaen no masungbatanyo dagiti sumaganad a saludsod:

▫ Ania a praktikal a tulong ti mabalin nga ipaay kadagiti masakit ken nataenganen iti uneg ti kongregasion ita?

Iti immuna a kongregasion Kristiano, adda listaan dagiti amin a balo nga agkasapulan iti material a tulong. (1 Timoteo 5:9, 10) Kasta met ita, mabalin a mangaramid dagiti panglakayen iti listaan dagiti masakit ken nataenganen nga agkasapulan iti naipangruna a pannakaasikaso. Nupay kasta, rumbeng a saan a laeng a dagiti panglakayen ti mangipakita iti kastoy a panangasikaso. Amin dagiti adda iti kongregasion masapul a maseknanda iti kasta a panagkasapulan. (1 Timoteo 5:4-8)​—8/15, pinanid 28-9.

▫ Imposible kadi ti estoria ti Biblia maipapan ken ni Jonas nga inalun-on ti maysa nga animal iti baybay?

Saan, uray ti sperm whale, ti dakkel a white shark, wenno ti whale shark kabaelanna nga alun-onen ti tao. Mainayon pay, pinasingkedan ni Jesus a mismo a pudno ti salaysay maipapan ken Jonas. (Mateo 12:39, 40)​—8/15, panid 32.

▫ Ania a peggad ti iyeg ti inaanito a panagusar kadagiti anib ken anting-anting?

Ti panagusarda upayenna dagiti tattao a mangsango a sinanakman kadagiti parikutda ken paregtaenna ida a mangnamnama iti gasat a mangrisut kadagiti amin a parikutda. Ikkanna met ti agus-usar ti ulbod a pannakarikna iti kinatalged. Kangrunaanna, ti tao nga agtalek iti bileg dagiti anib ken anting-anting mabalin nga ipasidongna ti biagna iti panangtengngel dagiti di makita a demonio.​—9/1, panid 4.

▫ Ania dagiti uppat nga elemento a makatulong iti napaut a panagasawa?

Isuda dagitoy: sidadaan a panagimdeng, panagpadispensar, pannakabael a mangipaay iti emosional a saranay, ken tarigagay a mangapros a sidudungngo. (1 Corinto 13:4-8; Efeso 5:33; Santiago 1:19)​—9/1, panid 20.

▫ Ania ti maysa a wagas a panangipaay ni Jehova iti panagibtur kadagidiay maipasango kadagiti pakasuotan?

Ipaay ni Jehova daytoy babaen dagiti ulidan ti panagibtur a nailanad iti Saona, ti Biblia. (Roma 15:4) Bayat nga ut-utobentayo dagitoy, maparegtatay nga agibtur, ken adu ti masursurotayo no kasano ti agibtur.​—9/15, pinanid 11-12.

▫ Ania ti nadiosan a debosion?

Ti nadiosan a debosion tuktukoyenna ti debosion ken Jehova a mangtignay kadatayo a mangaramid iti makaay-ayo kenkuana, uray pay maipasangotayo kadagiti narigat a pakasuotan, agsipud ta naimpusuan nga ay-ayatentayo ti Dios.​—9/15, panid 15.

▫ Kasano ti rumbeng a panangmatmattayo iti asi ti Dios?

Rumbeng a ditay laglag-anen ti dakkel nga asi ti Dios. Tuladentay koma ni Pablo ken ipakitatay ti panangapresiartayo babaen ti panangsaranget iti kinaimperpektotayo. (1 Corinto 9:27) Iti kastoy a pamay-an maipakitatayto, uray pay maipasango kadagiti pakarigatan, nga addaantayo iti napaypayso a tarigagay a mangaramid iti umiso.​—10/1, panid 23.

▫ Apay a mayanatup a dinakamat ni Pablo ti mabayag a panagitured kas umuna nga aspeto ti ayat?

Naikuna a saan a makapagkakadua dagiti Kristiano no awan ti mabayag a panagitured, wenno no awan ti panagiinnanus. Pudno dayta agsipud ta imperpektotayo amin, ket dagiti pagkurangan ken pagkapuyantayo suotenna dagiti dadduma. Ngarud, nasken ti mabayag a panagitured tapno mataginayon ti ayat iti nagbabaetan dagiti agkakabsat.​—10/15, panid 21.

▫ Inusar kadi dagiti immuna a Kristiano ti nagan ti Dios?

Wen, kas ipakita ti ebidensia. Insuro ni Jesus dagiti pasurotna nga agkararag iti Dios: “Madaydayaw koma ti naganmo.” (Mateo 6:9) Ket idi agturpos ti ministeriona, inkararagna: “Impalawagko ti naganmo kadagiti tao nga intedmo kaniak itoy lubong.” (Juan 17:6) Maysa pay, naglaon dagiti immuna a kopia ti Septuagint iti nagan ti Dios iti Hebreo a porma ti Tetragrammaton.​—11/1, panid 30.

▫ Ania dagiti pangarigan iti Biblia a mangipakita a ti pamay-an a panangtamingtayo kadagiti bidduttayo mabalin nga apektaranna ti biagtayo?

Sikukuspag a di impangag ni Ari Saul ti balakad, ket immadu ti biddutna, a nagbanag iti pannakaikkat ti anamong ti Dios kenkuana agingga iti ipapatayna. (1 Samuel 15:17-29) Iti sabali a bangir, nupay nagbiddut ken nagbasol, sibababawi nga inawat ni Ari David ti pammabalaw ket nagtalinaed a matalek ken ni Jehova. Ipakita dagitoy a pangarigan iti Biblia a ti panangbigbig kadagiti bidduttayo tulongannatayo a mangmantiner iti nasayaat a pannakirelasion iti Dios ket iti kasta maaddaan ti namnama a biag nga agnanayon. (Salmo 32:1-5)​—11/15, pinanid 29-30.

▫ Kasano a tulongan ni Jehova ti ilina no marigatanda gapu kadagiti natural a didigra wenno dadduma pay pakaigapuan?

Tumulong ni Jehova, saan a babaen ti panangsumra kadagiti natural a puersa wenno babaen ti datdatlag nga aramid iti milagro, no di ket babaen ti sabali a bileg a di naan-anay a maawatan ti kaaduan a tattao​—ti ayat. Wen, pudno nga ay-ayaten ni Jehova ti ilina, ket pinatanorna kadakuada ti ayat iti maysa ken maysa a kasta unay ti pigsana a kabaelanna nga aramiden maipaay kadakuada ti arigna a milagro. (1 Juan 4:10-12, 21)​—12/1, panid 10.