Naikkankami iti Perlas a Nakangatngato ti Pategna
KAS INSALAYSAY NI RICHARD GUNTHER
Setiembre idi, [tawen] 1959. Nakalugankam iti barko ti Italia a Julio Caesar nga agballasiw iti Taaw Atlantico manipud Nueva York agingga idiay Cádiz, España. Dakam ken baketko, ni Rita, ken da Paul ken Evelyn Hundertmark, sabali pay nga agassawa a misionero, ti indestino ti Watch Tower Society iti dayta a pagilian ti Iberia. Sangsanguenmi ti adu a narigat a kasasaad. Ngem kasano a naikeddengmi ti sumrek iti panagmisionero a karera?
NABAUTISARANKAM ken ni Rita kas Saksi ni Jehova idi 1950 idiay New Jersey, E.U.A. Di nagbayag kalpasanna, inkeddengmi nga inton agangay, tagikuaenminto ti perlas a nakangatngato ti pategna. Addakam idi iti maysa a kongregasion nga aduan kadagiti kakabsat a lallaki ken babbai nga agserbi iti teritoria. Gapuna, nariknami a kasapulan nga itukonmi ti panagserbi iti yan ti dakdakkel a panagkasapulan kadagiti manangaskasaba. Iti asamblea internasional dagiti Saksi ni Jehova idiay Siudad ti Nueva York idi kalgaw ti 1958, nagpasalistakami para iti misionero a serbisio.
Di nagbayag kalpasanna, naawiskami iti Watchtower Bible School of Gilead, ket iti las-ud ti makatawen, addakamin iti dalanmi nga agturong iti España kas misionero. Gapu ta nakumikomkami iti adu nga urnos ken narimbawan iti panaggagar, saanmi a nautob iti dayta a tiempo no aniat’ naipaay kadakami. Nadakamat ni Jesus ti maipapan iti maysa a perlas a nakangatngato ti pategna. (Mateo 13:45, 46) Nupay saan a dayta ti punto ti pangngarigna, kadakami, ti pribilehiomi nga agserbi kas misionero ket mayasping iti maysa a perlas. No taliawenmi ti napalabas, ad-adda itan a maapresiarmi a naan-anay daytoy napateg a sagut a panagserbi iti organisasion ni Jehova.
Maysa a Nakallalagip a Kapadasan
Iti dayta a tiempo, maidadaulo idi ti panagmisionero a kurso ti Gilead iti nagpintas nga aglawlaw ti away idiay Finger Lakes a rehion ti Estado ti Nueva York. Sadiay a binusbosmi ti innem a nakaay-ayat a bulan a naan-anay a naipamaysa iti panagadal iti Biblia ken pudpudno a Nakristianuan a timpuyog, a naisina manipud kadagiti aramid ken pakariribukan daytoy a lubong. Naggapu dagiti padami nga estudiante manipud iti adu a paset ti lubong, a pakairamanan ti Australia, Bolivia, Britania, Grecia, ken New Zealand. Nupay kasta, di nagbayag, dimteng ti aldaw a panagturpos. Idi Agosto 1959, nagpipinnakadakami a buyogen iti lulua bayat ti panaglayagmi nga agturong kadagiti pakaidestinuan ti tunggal maysa kadakami kas misionero. Makabulan kalpasanna, dimtengkamin idiay España.
Baro a Kultura
Simmangladkami iti makin-abagatan a puerto ti Algeciras, iti asideg ti nagdakkel a Bato ti Gibraltar. Iti dayta a rabii, naglugankami nga uppat, dakami ken ni Rita agraman dagiti agassawa a Hundertmark, iti tren nga agturong idiay Madrid. Napankami sadiay Hotel Mercador, tapno aguray agingga a makasaritadakami dagiti kameng ti nalimed a sanga nga opisina ti Sosiedad. Ti España ket adda idi iti sidong ti diktador a turay ni Generalissimo Francisco Franco. Kaipapanan daytoy a ti laeng Iglesia Katolika Romana ti mabigbig idi a legal a relihion iti pagilian. Iparit idi ti linteg ti sipapanayag a panangalagad iti aniaman a sabali a relihion, ket naparitan ti trabaho a panangasaba iti binalaybalay dagiti Saksi ni Jehova. Naiparit pay dagiti relihiuso a panagtataripnong, isu a dagiti Saksi ni Jehova, nga agdagup idi iti agarup 1,200 iti 30 a kongregasion idiay España, saanda a makapagtitipon kadagiti Kingdom Hall a kas iti dadduma a dagdaga. Kasapulan nga agtataripnongkami a sililimed kadagiti pribado a pagtaengan.
Panangadal iti Español ken Panangirugi
Ti immuna a karit kadakami isut’ panangadal iti pagsasao. Iti immuna a bulan, nangbusboskam iti 11 nga oras iti tunggal aldaw a mangadal iti Español—4 nga oras kada bigat iti klase, kalpasanna 7 nga oras nga agadalkami a bukbukod. Iti maikadua a bulan, kasta met laeng nga eskediul kada bigat, ngem ti malem binusbosmi iti panangasaba iti binalaybalay. Mailadawanyo kadi? Saanmi pay nga ammo ti pagsasao ken addaan laeng iti naikabesa nga introduksion a naisurat iti maysa a kard, nagtrabahokami ken ni Rita iti binalaybalay a dakdakami laeng!
Malagipko ti panagtuktokko iti maysa a ruangan idiay Vallecas, maysa a lugar dagiti trabahador idiay Madrid. Bayat a petpetpetak ti kard, di la ket ta malipatak ti ibagak, kinunak iti Español: “Naimbag a bigatyo. Mangar-aramidkami iti Nakristianuan a trabaho. Kuna ti Biblia (basaenmi ti maysa a teksto). Kayatmi a magun-odanyo daytoy a bokleta.” Bueno, basta kimmita ti babai, sana innala ti bokleta. Idi sinarungkaranmi, pinastreknakami, ket bayat ti pannakisaritami, kimmita laeng. Rinugianmi nga inyadalan iti Biblia agingga iti kabaelanmi a pannakisao iti Español, ket kabayatan dagiti panagadal, nagimdeng ken kimmita laeng. Kalpasan ti sumagmamano a tiempo, idi agangay, kinunana a saanna a naawatan daydi imbagami iti immuna nga isasarungkarmi ngem nangngegna ti sao a Dios, ket imdasen dayta kenkuana a mangammo a nasayaat a banag dayta. Idi agangay, naaddaan iti umdas a pannakaammo iti Biblia ken nabautisaran, a nagbalin a maysa kadagiti Saksi ni Jehova.
Narigatanak unay a nangadal iti Español. Kabayatan ti panagdaliasatko iti siudad, agikabesaak kadagiti verb conjugation. Ti naikabesak iti makalawas malipatak iti sumaganad! Makapaupay unay dayta. Namin-adu a gistay sumukoakon. Tangay marigatanak nga agsao iti Español, kasapulan nga agbalin a naanus dagiti kakabsat nga Español kabayatan ti panangidaulok kadakuada. Iti maysa a kombension distrito, inikkannak ti maysa a kabsat iti pakaammo nga insurat ti ima a maibasa iti plataporma. Gapu ta marigatanak a mangbasa iti insuratna, impakaammok: “Itugotyonto dagiti muletayo (saklay) ditoy estadium inton bigat.” Ti koma ibagak ket, “Itugotyonto dagiti maletayo (bagahe) ditoy estadium inton bigat.” Siempre, nagkatawa ti bunggoy, ket gagangay laeng a nabainanak.
Dagiti Immuna a Suot Idiay Madrid
Dagidiay immuna a sumagmamano a tawen idiay Madrid ket makatuok unay kadakami ken ni Rita. Kailiwmi unay ti pagtaengan ken ti gagayyemmi. Tunggal makaawatkami iti surat manipud Estados Unidos, lapunosennakam unay ti nakaro nga iliw. Narigat unay dagidiay a periodo ti nakaro nga iliw, ngem limmabasda met laeng. Masapul a kasta, yantangay pinanawanmin ti pagtaengan, pamilia, ken gagayyem tapno magun-odmi ti maysa a perlas a nangatngato ti pategna. Kasapulan idi a makibagaykami.
Idi damo a dimtengkam idiay Madrid, nagnaedkami iti maysa a marmarban a mapapaabangan a balay. Addaankami iti kuarto ken mamitlo a pakanendakami iti kada aldaw. Maysa a bassit, nasipnget a kuarto, ket naaramid dagiti kutson manipud iti garami. Ti makabulan a pagabang ibusennan ti sangkabassit a binulan nga allowance-mi. Masansan a mangaldawkami sadiay, ket ikabil ti mayordoma ti pangmalemmi iti oven tapno saan a bumaaw, iti kasta uray rabiin adda kanenmi. Nupay kasta, iti panangasaba iti aldaw ken rabii, mabisinankami unay. No naibusen ti allowance-mi, aramatenmi ti bassit a personal nga urnongmi nga igatang iti kalakaan a chocolate bar a makitami. Nupay kasta, di nagbayag, nabalbaliwan daytoy a kasasaad iti ibibisita ti manangaywan ti sona ti Sosiedad. Nakitana ti kasasaadmi ket kinunana a mangsapulkami iti bassit nga apartment a maaramat kas pagtaengan dagiti misionero. Bueno, ti kaadda ti bukodmi nga apartment ket nasaysayaat nga amang ngem ti agdigus iti suelo ti kusina. Ita, addaankamin iti shower, refrigerator a pagipananmi kadagiti makan, ken maysa a de-koriente a pangilutuanmi iti kanenmi. Agyamankami unay iti dayta a pannakaseknan.
Dagiti Nakaskasdaaw a Kapadasan Idiay Madrid
Siaannad idi a naaramid ti panagbalaybalay a panangasaba. Maysa a bentahe ti inaldaw a riribuk idiay Madrid, a manglinglinged kadakami tapno saandakam unay a madlaw. Inkarigatanmi ti agaruat ken agtignay a kas kadagiti dadduma tapno saandakami a madlaw kas ganggannaet. Ti pamay-anmi iti panangasaba kadagiti ruangan isut’ iseserrek iti maysa nga apartment, agtuktok iti ruangan, makisarita, ket kalpasanna panawanmin ti pasdek, lansangan ken lugar. Kanayon nga adda posibilidadna nga umawag ti bumalay iti polis, isu a saan a nainsiriban ti agtalinaed iti aglawlaw daytoy. Kinapudnona, agpapan pay kastat’ kaannadda a nangaramat iti kastoy a pamay-an, natiliw da Paul ken Evelyn Hundertmark ket napapanawda iti pagilian idi 1960. Napanda iti kabangibang a Portugal, a nagserbida sadiay iti sumagmamano a tawen, a ni Paul ti nangaywan iti nalimed a sanga nga opisina. Itatta, isut’ manangaywan ti siudad idiay San Diego, California.
Nupay kasta, para kadakami, napasamak ti panamagpapada. Sumagmamano laeng a bulan kalpasanna, naibilin kadagiti innem a misionero a naidestino idiay Portugal a panawanda dayta a pagilian! Nangyeg daytoy iti naragsak nga irarang-ay gapu ta naibilin itan kada Eric ken Hazel Beveridge, a kaklasemi idi met idiay Gilead, a panawanda ti Portugal ket umayda ditoy España. Gapuna, idi Pebrero 1962, addakami manen iti Hotel Mercador—tapno sumabat itan kada Eric ken Hazel kabayatan ti isasangpetda.
Kadagidi damo a panawen a kaaddami idiay Madrid a nakitami a personal ken ni Rita ti kinamanaginsisingpet ti relihion. Inyadalanmi iti Biblia dagiti agassawa, da Bernardo ken Maria, nga agnanaed iti maysa nga abong a naaramid manipud iti aniaman a naibasuran a materiales a pagibangon a masarakan ni Bernardo. Yadalanmi ida iti naladawen a paset ti rabii, ket kalpasan ti panagadal, pasanguandakami iti tinapay, arak, ken sumagmamano a keso wenno aniaman nga adda kadakuada. Nadlawko a ti keso ket kasla keso ti America. Iti maysa a rabii, kalpasan ti panagadal, inruarda ti lata a nagianan ti keso. Naisurat sadiay iti dadakkel a letra, iti Ingles, “Inted dagiti Americano kadagiti Español—saan a mailako.” Kasano a nakagun-od daytoy napanglaw a pamilia iti kasta a keso? Inaramat ti gobierno ti Iglesia Katolika a mangiwaras iti dayta kadagiti napanglaw. Ngem ilaklako ti padi daytoy!
Nabunga a Ministerio Kadagiti Militar
Di nagbayag, napasamak ti nakaay-ayat a banag a nagbalin a nabaknang a bendision para kadakami ken iti adu a sabsabali pay. Nakaawatkami iti pakaammo manipud iti sanga nga opisina a mangikalkalikagum a bisitaenmi ti maysa nga agkabanuag a lalaki nga agnagan Walter Kiedaisch, a naidestino iti base ti U.S. Air Force idiay Torrejón, sumagmamano a kilometro iti ruar ti Madrid. Sinarungkaranmi isuna ken ni baketna, a rinugianmi nga inyadalan ida iti Biblia ken ti sabali pay a pagassawaan ti Air Force sadiay.
Iti dayta a tiempo, mangidadauloak iti agarup lima a panangyadal iti Biblia kadagiti agtartrabaho iti U.S. Air Force, a siempre, iti Ingles amin. Pito kadakuada ti nabautisaran idi agangay, ket kalpasan ti isusublida idiay Estados Unidos, uppat kadagiti lallaki ti nagbalin a panglakayen iti kongregasion.
Panawen idi a narigat ti mangiserrek kadagiti libro, magasin, ken Biblia iti pagilian gapu iti panangipawil iti trabahomi. Nupay kasta, dadduma a literatura ti inyeg dagiti turista ken dadduma pay nga am-ammomi nga Americano. Tinudingannak ti sanga a mangimanehar iti maysa a nalimed a pagidulinan kadagiti literatura. Naidulin dagitoy iti maysa a bodega iti likudan ti pasdek a pagtagilakuan idiay Vallecas. Maysa kadagiti Saksi ni Jehova ti asawa ti akinkukua. Nupay saan a Saksi, rinaem ti akinkukua ti trabahotayo, ken nupay mamagpeggad unay daytoy kenkuana ken iti negosiona, pinalubosannak a mangaramat iti daytoy makinlikud a paset nga agbalkut kadagiti literatura a maipatulod kadagiti siudad iti intero a pagilian. Yantangay kasapulan a mataginayon daytoy a kuarto iti mayanatup a langana—a natapok, nawara a kuarto a napumpunno kadagiti karton—kasapulan a mangaramidak iti bangko ken estante ti libro a mabalin a masangal ken sisasagana a pagtrabahuan a sipapartak ket kalpasanna mailemmeng iti apagbiit. Iti ngudo ti aldaw, agurayak agingga nga awanen ti tao iti pagtagilakuan ket kalpasanna sipapartak a mangiruar kadagiti binalkutko.
Pudno a maysa a pribilehio ti makiraman iti panagiwaras kadagiti naespirituan a material, a kas kadagiti magasin a Pagwanawanan ken Agriingkayo! ken dadduma pay a literatura, kadagiti kongregasion iti intero a pagilian. Makaparagsak dagidi a tiempo.
Naaddaan ni Rita iti rag-o a nangidaulo iti 16 a panangyadal iti Biblia kadagiti pagtaengan, nga agarup kagudua kadakuada ti nagbalin a bautisado a Saksi ni Jehova. Ni Dolores ket agkabanuag a naasawaan a babai nga agid-idda laeng kabayatan dagiti tiempo ti kalam-ekna gapu iti sakit ti pusona. Iti primavera, mabalinnat’ bumangon ken medio gumanaygay. Natibker ti pammati ni Dolores, isu nga idi dimteng ti tiempo para iti kombension distritomi idiay Toulouse, Francia, tinarigagayanna unay ti mapan. Isut’ binallaagan ti doktor a saan a nainsiriban dayta gapu iti kasasaad ti pusona. Nakakawes iti parabalay ken nakatsinelas ken awan gargaretna, napan iti estasion ti tren tapno palubosanna ni lakayna, ni nanangna, ken ti dadduma pay nga agbiahe. Nagarubos dagiti luana, saanna a maibturan a pumanawda a di sumurot, isu a limmugan iti tren, ket simmurot idiay Francia! Saan nga ammo ni Rita a daytoy ti napasamak. Ngem iti pagkombensionan, anian a siddaawna idi nakitana ni Dolores, a napalalo ti isemna!
Karkarna a Panangyadal iti Biblia
Saanmi a maipatingga daytoy a salaysay maipapan iti pannakaidestinomi idiay Madrid no dimi iraman ni Don Benigno Franco, “el profesor.” Inkuyognak ti maysa a Saksi a sumarungkar iti maysa nataenganen a lalaki nga agnanaedda ken ni baketna iti nakanumnumo nga apartment. Rinugiak nga inyadalan iti Biblia. Kalpasan ti panangyadal iti agarup makatawen ket kagudua, kiniddawna a mabautisaran ken agbalin a maysa a Saksi ni Jehova.
Daytoy nataenganen a lalaki, ni Don Benigno Franco, ket kasinsin ni Francisco Franco, ti diktador ti España iti dayta a tiempo. Agparang a kanayon nga apresiaren idi ni Don Benigno ti wayawaya. Kabayatan ti Guerra Sibil ti España, isut’ kimmanunong iti Republika ket bimmusor iti kasinsinna—ti heneral a nangabak iti gubat ken nangipasdek iti Katoliko a kinadiktador. Nanipud idi 1939, napaidaman ni Don Benigno iti kalintegan nga agtrabaho, ket nalimitaran laeng iti nakanumnumo a panagbiag. Gapuna, ti kasinsin ni Generalissimo Francisco Franco, ti soldado a diktador ti España, nagbalin a maysa kadagiti Saksi ni Jehova.
Sorpresa nga Awis
Idi 1965, inawisnakam ti sanga nga opisina ti España a mangrugi nga agdaliasat iti trabaho ti sirkito idiay Barcelona. Kaipapanan daytoy a panawanmi amin dagiti naayat a kakabsat a nakapulpulapolmi idiay Madrid. Mangrugikam itan saan laeng nga iti maysa a baro a kapadasan ngem kasta met, para kaniak, maysa a suot. Makapadanag a kapadasan agsipud ta kanayon a nagduaduaak ti abilidadko. Ammok unay a ni Jehova ti namagbalin kaniak nga epektibo iti daytoy a tay-ak ti serbisio.
Ti isasarungkar iti maysa a kongregasion iti kada lawas kaipapanannat’ panagnaed iti pagtaengan dagiti kakabsat. Awanankami iti permanente a pagtaengan, ket gistay kada dua a lawas, umakarkami iti sabali a pagtaengan. Ad-adda a narigat daytoy iti maysa a babai. Ngem di nagbayag, inawisdakami da José ken Roser Escudé, nga agnanaed idiay Barcelona, a makipagtaeng kadakuada sagpaminsan. Managayatda unay, ta kaipapanan daytoy nga addaankamin iti permanente a lugar a pagikabilan kadagiti gargaretmi ken lugar a regular a pagawidanmi kadagiti rabii ti Domingo.
Binusbosmi ken ni Rita ti simmaganad nga uppat a tawen iti trabaho ti sirkito idiay probinsia ti Catalonia, nga adda iti Mediterranean Coast. Naaramid amin dagiti panaggigimongmi iti Biblia a sililimed kadagiti pribado a pagtaengan, ket naaramid met ti panangasabami iti binalaybalay a buyogen ti kinaannad tapno saandakam a madlaw. No dadduma, maaddaan ti intero a kongregasion iti maysa a “piknik” iti kabakiran iti Domingo, kangrunaanna no maaramid ti asamblea sirkito.
Kanayon a raraemenmi dagiti adu a napasnek a naespirituan a kakabsat a nangirisgo kadagiti pagtrabahuan ken wayawayada, nga inkagumaanda a mismo a pagtalinaeden dagiti kongregasion a nagkaykaysa ken aktibo. Adu kadakuada ti nangidaulo iti panangisaknap iti trabaho kadagiti ili iti ruar ti siudad. Daytoy ti nangbuangay iti pakaibatayan para iti dakkel nga irarang-ay idiay España kalpasan ti pannakaikkat ti panangipawil ken nagun-odan ti narelihiusuan a wayawaya idi 1970.
Kasapulan a Panawanmi ti Nakaidestinuanmi kas Misionero
Kabayatan ti sangapulo a tawenmi idiay España, nasinga ti panangtagiragsakmi iti daytoy naisangsangayan a bendision a panagserbi ken Jehova gapu iti kasasaad dagiti nagannakmi. Namin-adu a gistay kasapulan a panawanmi ti nakaidestinuanmi ket agawid tapno aywananmi da nanang ken tatangko. Nupay kasta, gapu kadagiti naayat a kakabsat a lallaki ken babbai kadagiti kongregasion nga asideg kadagiti nagannakko, nakapagtultuloykami idiay España. Wen, ti pribilehio nga agserbi kadagidi a tawen iti kinamisionero ket pinagbalin a posible dagiti sabsabali a nakiraman kadakami iti panangyun-una kadagiti interes ti Pagarian ti Dios.
Kamaudiananna, idi Disiembre 1968, nagawidkami tapno maaywananmi ni nanangko. Iti dayta met laeng a bulan, pimmusay ni tatangko, ket agmaymaysa itan ni nanangko. Kaskasdi a nawayakami pay bassit nga agserbi iti amin-tiempo, nakaawatkami iti annongen nga agserbi iti trabaho ti sirkito, ngem iti daytoy a gundaway, iti Estados Unidos. Iti simmaganad a 20 a tawen, nagserbikami kadagiti Español a sirkito. Nupay napukawmi ti misionero a perlasmi a nakangatngato ti pategna, adda pay sabali a nagun-odmi.
Panangasaba iti Nagtetengngaan Dagiti Droga ken Kinaranggas
Ita, agserserbikami a kadua ti adu a kakabsat nga agnanaed kadagiti napnuan-krimen a paset dagiti siudad. Ania ketdin ta iti immuna unay a lawas iti trabaho ti sirkito idiay Brooklyn, Nueva York, sinibbarutda ti bag ni Rita.
Iti naminsan, nakikaduakami ken ni Rita iti maysa a bunggoy a nakiraman iti trabaho a panangasaba iti binalaybalay iti sabali pay a paset ti Siudad ti Nueva York. Iti panaglikaw iti nagsulian ti maysa a kalsada, nadlawmi ti sumagmamano a tattao a nakapila iti sango ti maysa nga abut iti diding ti maysa a nagpanawanen a pasdek. Bayat ti yaasidegmi bassit iti kalsada, nadlawmi ti maysa nga agtutubo a nakatakder iti bangketa a kumitkita kadakami. Adda pay sabali iti adayo a suli nga agsipsiput kadagiti kotse ti polis. Nagnakami iti katengngaan ti operasion dagiti aglaklako iti maiparit a droga! Nakigtot ti immuna a managbantay, ngem kalpasanna, nakitana ti magasin a Pagwanawanan ket nabang-aran. Ngamin, impagarupna nga opisialak ti polisia! Kalpasanna, impukkawna iti Español, “¡Los Atalayas! ¡Los Atalayas!” (Dagiti Pagwanawanan! Dagiti Pagwanawanan!) Ammoda no asinokami, a mailasindakami iti magasin, ket simmayaat amin ti bambanag. Bayat a limmabasak iti asidegna, kinunak, “¿Buenos dias, como está?” (Naimbag a bigatmo, komustaka?) Simmungbat babaen ti panangkiddawna nga ikararagak isuna!
Narigat a Pangngeddeng
Idi 1990, nagbalin a nabatad a kasapulan nga addaak iti yan ni nanangko iti inaldaw. Inkarigatanmi ti agtalinaed iti panagdaliasat a trabaho, ngem idiktar ti sirib a saan a mabalin nga itungpal nga agpadpada dagiti annongen. Pudno a kayatmi a masigurado a siaayat a maaywanan ni Nanang. Ngem maminsan manen, kasapulan nga isukomi ti perlas a nakangatngato ti pategna, banag a nakapatpateg unay kadakami. Amin dagiti literal a napapateg a bato iti lubong ken amin dagiti mabalinda nga aramiden iti maysa ket nakabasbassit no maidilig iti napateg a batbato ti panagserbi kas maysa a misionero wenno kas maysa nga agdaldaliasat a manangaywan iti organisasion ni Jehova.
Addakamin ken ni Rita iti maika-pito a dekada ti panagbiagmi. Mapnekkami unay ken tagtagiragsakenmi ti panagserbi iti maysa a lokal a kongregasion nga Español ti pagsasaona. Bayat a taliawenmi dagiti tawen iti panagserbi ken Jehova, agyamankami kenkuana iti panangitalekna kadakami iti sumagmamano a perlas a nakangatngato ti pategna.
[Ladawan iti panid 23]
Kaduak ni Rita ken da Paul ken Evelyn Hundertmark (kanawan) iti ruar ti plaza de toros idiay Madrid
[Ladawan iti panid 24]
Panagserbi iti kongregasion iti maysa a “piknik” iti kabakiran