Report Dagiti Manangiwaragawag ti Pagarian
“Ti Sao ti Dios Nagtultuloy a Rumang-ay”
DIMMAKKEL ti kongregasion Kristiano manipud iti agarup 120 a miembro agingga iti nasurok a 3,000 iti apagbiit kalpasan ti pannakaibangonna. (Aramid 1:15; 2:41) Ilawlawag ti Biblia a “ti sao ti Dios nagtultuloy a rumang-ay, ket ti bilang dagiti adalan nagtultuloy nga umadu iti kasta unay idiay Jerusalem.” (Aramid 6:7) Kalpasan laeng ti sumagmamano a tawen, ti kaibangbangon a kongregasion nagbalin nga interkontinental nga organisasion dagiti Kristiano idiay Africa, Asia, ken Europa.
Mapaspasaran met itatta ti kongregasion Kristiano ti napartak nga irarang-ay. Kas pagarigan, idiay Mexico, ngimmato ti bilang dagiti manangiwaragawag ti Pagarian manipud iti nasurok a 130,000 agingga iti 443,640 iti las-ud ti lima a tawen laeng! Idi 1995, 1 iti kada 59 a tattao idiay Mexico ti timmabuno iti Panglaglagip iti ipapatay ni Kristo a ramrambakan dagiti Saksi ni Jehova. Ngem, saan pay a nakompleto ti naespirituan a panagani iti dayta a pagilian, kas ipakita ti sumaganad a kapadasan.—Mateo 9:37, 38.
Iti maysa nga ili iti estado ti Chiapas, awan ti immawat iti panagadal iti Biblia iti pagtaengan kadagiti Saksi ni Jehova, uray pay 20 a tawenen nga ikaskasabada ti naimbag a damag iti dayta a lugar. Nabatad nga adu kadagiti umili ti mabuteng iti maysa a lalaki a pagaammo a naranggas. Mabutengda iti aramidenna no masarakanna ida a makipagad-adal iti Biblia kadagiti Saksi.
Inkeddeng dagiti dua a natutured a Saksi nga immakar iti dayta a lugar a risutenda ti parikut babaen ti ipapanda a mismo iti tao. Idi nakagtengda iti pagtaenganna, pinasangbay ida ti asawana ken nagimdeng a naimbag iti mensaheda. Nangnangruna a naginteres iti kuna ti Biblia maipapan iti panagbiag iti maysa a paraiso ditoy daga. Ngem kinunana nga isut’ parigaten ni lakayna no agadal iti Biblia. Inlawlawag dagiti Saksi a no saanna nga usigen a naimbag ti kuna ti Biblia, pulos a dinanto maammuan no kasano ti agserbi iti Dios ken mangtagiragsak iti biag nga agnanayon ditoy daga. Inawatna ti panagadal iti Biblia.
Kas ninamnama, saan a naragsakan ti asawana iti pangngeddengna. Imparit ti lalaki nga aramatenna ti luganna a tumabuno kadagiti Nakristianuan a gimong, nupay napalubosan a mangusar iti dayta kadagiti sabsabali a panggep. Iti laksid ti ibubusor ti lalaki, regular a magna a mapan iti kaasitgan a Kingdom Hall dagiti Saksi ni Jehova, a sangapulo a kilometro ti kaadayona. Di nagbayag, nadlaw dagiti dadduma iti ili ti tured ken determinasionna. Nangrugin a dumngeg dagiti tao no sumarungkar dagiti Saksi kadagiti pagtaenganda. Dadduma ti nangkuyog pay iti babai a mapan kadagiti gimong. Di nagbayag, mangidadaulon dagiti Saksi iti ag-20 a panangyadal iti Biblia iti dayta nga ili!
Inkeddeng met ti maysa a gayyem daytoy a babai a makipagadal iti Biblia iti laksid ti ibubusor ni lakayna. Makapasiddaaw, isut’ pinaregta ti asawa ti immuna a babai a mangaramid iti kasta. Kalpasan a nakisarita ken ni lakayna, naisardeng ti ibubusor. Gapuna, timmubo kamaudiananna ti bukel ti kinapudno ti Biblia kalpasan ti 20 a tawen, nga addaan nasurok a 15 a makipagad-adal iti Biblia ken tumabtabuno kadagiti Nakristianuan a gimong, a pakairamanan dagitoy dua a babbai, a mangipakpakaammo itan iti naimbag a damag.