Maysa a Naballigi a Kampania ti Kingdom News
“APAY a Napno ti Biag iti Parikut?—Posible Kadi ti Awanan-Parikut a Paraiso?” Daytoy ti tema ti Kingdom News No. 34, maysa nga uppat panidna a tract a naiwaras iti intero a lubong iti 139 a pagsasao idi Abril ken Mayo idi napan a tawen. Inladawan dagiti Saksi idiay Jamaica daytoy a kampania iti panagserbi kas “maysa kadagiti napapateg a pasamak ti tawen.” Inawagan daytoy dagiti Saksi idiay Belgium kas “maysa a dakkel a gubuayan ti rag-o para kadagiti kakabsat.” Idiay Czech Republic, daytoy ti immuna a gundaway a nakiraman dagiti Saksi ni Jehova iti panagiwaras iti Kingdom News. Ipadamag ti sanga [nga opisina]: “Nangyeg ti kampania iti espiritu ti kinaregta ken kinabara.” Umasping nga ebkas ti nangngeg manipud iti adu a sabsabali pay a daga.
Addaan naisangsangayan a mensahe ti Kingdom News No. 34 para kadagidiay agsasaibbek ken agas-asug gapu kadagiti makarimon nga aramid iti nagan ti relihion. (Ezequiel 9:4) Liwliwaenna dagidiay nariribuk ti biagda gapu iti “napeggad a tiempo a narigat a pakilangenan” a dida makontrol. (2 Timoteo 3:1) Iti panangipatuldona iti Biblia, impakita ti tract a nakaas-asidegen a marisut dagiti parikut iti biag. Sigurado ti awanan-parikut a paraiso. (Lucas 23:43) Adu a nagbasa iti Kingdom News ti nagargari iti mensahena. Kinuna ti maysa a lalaki idiay Togo iti maysa a Saksi: “Saan a mapagduaduaan ti imbagayo.”
Awan duadua, nakaawis iti karkarna nga atension ti panagiwaras iti daytoy a Kingdom News. Idiay Denmark nangipangag ti maysa a bumalay iti Saksi a nangitukon iti tract: “Kagapgapuk laeng idiay Estados Unidos. Sakbay a pimmanawak, adda nangitukon kaniak iti tract-yo. Ita kasangsangpetko laeng ditoy, ket dagus a nayawat ti isu met laeng a tract iti pagsasao a Danish!”
Nabara a Panangsuporta iti Kampania
Sibabara a nakiraman dagiti Saksi ni Jehova iti intero a lubong iti trabaho a panagiwaras iti tract. Ti Austria, El Salvador, Haiti, Hungary, Italy, New Caledonia, ti sumagmamano laeng kadagiti adu a pagilian a nagreport iti kangatuan pay laeng a bilang dagiti agibumbunannag kadagidi bulan a naiwaras ti Kingdom News.
Idiay Zambia sinanay ti maysa a manangaywan ti sirkito ti tallot’-tawenna a balasitangna, ni Deborah, a mangitukon iti literatura iti binalaybalay. Kabayatan ti kampania iti Kingdom News No. 34, nakaipaima ni Deborah iti nasurok nga 45 a kopia ti tract. Nakairugi ni nanangna kadagiti panangyadal iti Biblia iti sumagmamano nga immawat iti Kingdom News ken Deborah.
Idiay Sud Africa intukon ti maysa a tin-edyer ti tract iti maysa a kaeskuelaanna nga agnagan Cashia. Binasa ni Cashia ti tract ket kinunana: “Pudno a nakaskasdaaw daytoy—ti agbiag nga agnanayon iti maysa a paraiso a daga! Apay a di naibaga kaniak ti maipapan iti dayta idi?” Narugian ti panagadal iti Biblia. Iti las-ud ti makalawas nakaawat ni Cashia iti sabali pay a tract. Naggapu ti maikadua iti kasinsinnuratna a Romano Katoliko idiay Cyprus. Inlawlawag ti kasinsinnurat ken ni Cashia no apay nga ulbod dagiti sursuro ti Iglesia Katolika Romana ken kinunana a panggepna ti makipagadal iti Biblia kadagiti Saksi ni Jehova. Siempre, ad-adda a napabileg ti determinasion ni Cashia a mangitultuloy iti pannakipagadalna.
Maysa a sangapulot’-tawenna a bumarito idiay Switzerland ti nakiraman ken ni nanangna iti panagiwaras iti tract. Inyawatna ti maysa a kopia iti agtutubo a babai ket pinaregtana a basaenna dayta a naimbag. Sinaludsod ti agtutubo a babai iti bumarito no talaga met laeng a mamati iti iladladawan ti buya nga adda iti akkub—awan patinggana a biag ditoy daga. Ti sungbat ti ubing? “Ay, wen a, masiguradok unay.” Kalpasanna impalgak ti babai a sapsapulenna ti pudno a pammati gapu ta nagadu ti panagsisimparat iti relihionna. Iti maysa nga isasarungkar, narugian ti panagadal iti Biblia.
Insigida a Panagtignay
Iti dadduma, namataud ti Kingdom News iti insigida a panagtignay kadagidiay nakabasa iti dayta. Kalpasan a nabasana ti tract, maysa a 11 ti tawenna a balasitang idiay Belgium ti nagpudno iti maysa kadagiti Saksi ni Jehova nga isut’ agtaktakaw kadagiti tagilako. Kayat ti ina ti balasitang nga ilimedna daytoy a banag, ngem natignay ti konsiensia ti balasitang iti nabasana, ket impilitna ti mapan tapno makisarita iti manager ti pagtagilakuan. Kamaudiananna pinalubosan ti ina ti balasitangna nga agsubli idiay pagtagilakuan a kaduana ti Saksi. Nasdaaw ti manager iti panagpudnona. Idi naammuanna a ti Kingdom News ti nanggutugot kenkuana nga agtignay iti kastoy a pamay-an, nangala a mismo iti maysa a kopia tapno makitana no aniat’ linaonna a nakabilbileg unay. Addaan itan ti balasitang iti narang-ay a panagadal iti Biblia.
Nakaibati ti maysa a Saksi idiay Cameroon iti kopia ti Kingdom News iti maysa a lalaki ket salaysayenna: “Idi nagsublikami, naammuanmi a naugedannan dayta ken aduan iti salsaludsod. Kalpasan a napennek kadagiti sungbat, kinunana: ‘Pudno la unay a ti relihion nangyeg iti kinaawan ragsak ti sangatauan. Tinulongannak ti tract-yo a makatarus iti adu, ngem kayatko ti makaammo iti ad-adu pay.’” Regular itan a makipagad-adal iti Biblia.
Nakaipaima ti maysa a Saksi a nagbalaybalay idiay Uruguay iti tract iti maysa a lalaki. Intultuloy ti Saksi ti panangaskasabana iti binalaybalay ken nagtrabaho iti aglikmut ti bloke agingga a nakagteng iti ruangan iti likudan ti balay ti lalaki. Nasdaaw a nakakita iti lalaki nga agur-uray kenkuana, nga iggemna ti tract. Nabasanan ket kayatna pay ti ad-adu nga impormasion. Maysa a panagadal ti insigida a narugian.
Timmulong ti Publiko iti Panagiwaras
Idiay Japan inasitgan ti maysa nga agtutubo a Saksi ti maysa a lalaki nga agtawenen iti nasurok a 50 ken impakitana kenkuana ti tract. Nagsaludsod ti lalaki: “Aniat’ aramidenyo iti dayta a polieto no makasarakkayo kadagiti tattao a saan a makakita?” Inamin ti Saksi a dina ammo. Kinuna kenkuana ti lalaki nga aguray biit ket nagsubli iti pagtaenganna. Nagsubli nga iggemna ti maysa a kopia ti Kingdom News ket kinunana: “Nakaawatakon iti kasta a polieto. Iti panagkunak naglaon daytoy iti makapainteres unay ken napateg nga impormasion, gapuna insuratko daytoy iti Braille. Pangngaasiyo ta usarenyo daytoy kadagiti tao a bulsek.” Nangbusbos ti lalaki iti adu nga oras a nangisurat iti Kingdom News iti Braille tapno magunggonaan dagiti bulsek iti linaonna.
Idiay Slovakia nagustuan unay ti maysa a lalaki ti tract ta nagpaaramid iti 20 a kopia, ket inwarasna a mismo dagitoy a pinakopiana. Nakaibati ti maysa nga agibumbunannag idiay Switzerland iti Kingdom News iti maysa a pamilia ken nagtultuloy a nagtrabaho kadagiti akinngato a kadsaaran ti patakder a sadiay ti pagnanaedan ti pamilia. Idi bumaba, sinabet ti maysa nga agtutubo a lalaki, manipud iti pamilia, a dimmawat iti 19 pay a kopia iti tract. Iti pages-eskuelaan ti agtutubo a lalaki, natudingan dagiti estudiante nga agsurat maipapan kadagiti parikut ken iti panangrisut kadagitoy. Kayatna nga ikkan ti kopia iti Kingdom News ti tunggal maysa kadagiti kaklasena.
Awan Naikapis Uray Maysa
Naan-anay a nagregget dagidiay nakiraman iti kampania tapno masigurado nga awan naikapis. Idiay New Caledonia nagdaliasat dagiti dua a Saksi a nagturong iti teritoria ti maysa a nasulinek a tribu tapno agiwaras iti Kingdom News. Iti dalan, nadlawda ti maysa a desdes a kasla saan a mapagpagnaan, nupay kasta inkeddengda a kitaen no adda agnanaed iti ungtona. Imbatida ti kotse, sinurotda ti desdes, a bimmallasiw kadagiti waig agingga a kamaudiananna nasarakanda ti maysa a balay. Agnanaed sadiay ti agassawa a saan pay a nakangngeg maipapan kadagiti Saksi ni Jehova, ket inawatda ti maysa a kopia ti Kingdom News. Di nagbayag simmarungkar dagiti agibumbunannag ket nasdaawda a nakakita a pinasayaat ti agassawa ti dalan ken ti sumagmamano nga ababa a rangtay tapno mausar dagiti Saksi ti kotseda agingga iti balay. Narugian ti regular a panagadal iti Biblia.
Idiay Poland kasapulan a lumabas ti maysa a Saksi iti lugar ti pagipatpatakderan tapno mangitukon iti maysa a kopia ti Kingdom News iti bumalay. Binantayan dagiti trabahador bayat nga agsubli a lumabas iti lugar a pagipatpatakderan. Kamaudiananna, inawagan ti maysa kadagiti trabahador, nga indawatna kenkuana a dina ida liplipatan. Idi immasideg kadakuada, nagsardengda ken sipapasnek a nagimdengda iti pannakaipresenta ti tract. Immawatda kadagiti kopia ti Kingdom News kasta met kadagiti magasin ket di nagbayag, iti panagsarungkar, kadagiti libro.
Ginasgasut a milion a Kingdom News No. 34 ti naiwaras iti adu a pagsasao. Naaddaanen ti mensahena iti nabileg nga epekto. Adu ti nakaammo a posible ti awanan-parikut a paraiso. Ikararagtayo nga agtultuloy koma a mangipangag dagiti nalinteg-panagpuspusona a tattao ket kamaudiananna maibilangda kadagiti “naemma” nga ‘agtawid iti daga, ket . . . maay-ayatandanto iti kinaruay ti talna.’—Salmo 37:11.
[Kahon iti panid 31]
Agtultuloy nga Agiwaras Kadagiti Magasin!
Napasamak idi Abril ken Mayo 1995 ti naballigi unay a kampania a panagiwaras iti Kingdom News No. 34. Kabayatan dagidiay a dua a bulan, adda met naisangsangayan a panagiwaras kadagiti magasin a Pagwanawanan ken Agriingkayo! Kas pagarigan, ipadamag ti maysa a kabsat a lalaki idiay Czech Republic nga idi Abril nakaipaima iti 250 a kopia ti Kingdom News ken 750 a magasin. Idiay Guadeloupe, napili ti Sabado, Abril 15, kas naisangsangayan nga aldaw ti panagmagasin. Gistay nakiraman amin nga agibumbunannag iti pagilian iti ministerio iti dayta nga aldaw! Naaddaan ti Slovakia iti baro a kangatuan a bilang ti naiwaras a magasin idi Abril. Umasping a report ti dimteng manipud iti adu a sabsabali pay a pagilian.
Gapuna apay a diyo aramiden ti Abril ken Mayo 1996 a naisangsangayan a bulan ti panagiwaras iti magasin? Mabalin a mangorganisar dagiti kongregasion kadagiti naisangsangayan nga aldaw ti panagmagasin. Mabalin a makiraman dagiti indibidual iti panag-auxiliary pioneer. Kadagitoy ken iti dadduma pay a wagas, maiparegta ti panagiwaras iti magasin, ken agtultuloy a maisaknap ti napateg a mensahe a naipakaammo iti Kingdom News No. 34. Iti kasta, kas ti napasamak iti napalabas a tawen, awan duadua a bendisionan ni Jehova ti naregta nga espiritu nga ipakitatayo.—2 Timoteo 4:22.