Ti Eskuelaan ti Gilead—Ibaonna ti Maika-100 a Klasena
ADDA napateg nga akem ti Watchtower Bible School of Gilead iti sangalubongan a pannakaiwaragawag ti Pagarian ti Dios iti moderno a panawen. Sipud idi nangrugi ti Eskuelaan ti Gilead a mangsanay kadagiti misionero idi 1943, nagserbin dagiti nagturpos iti dayta iti nasurok a 200 a daga. Idi Marso 2, 1996, nagturpos ti maika-100 a klase.
Timmabuno dagiti estudiante iti eskuelaan kabayatan ti tiempo a nasurok a dua metro a niebe ti nagtinnag iti lugar ti Watchtower Educational Center idiay Patterson, New York. Di pakasdaawan, agtintinnag ti niebe iti kaaldawan ti panagturposda. Nupay kasta, napno ti auditorium, ket nagimdeng ti nakaad-adu a timmabuno idiay Patterson, Wallkill, ken Brooklyn—agdagup iti 2,878 a tattao.
Nagserbi kas tserman ni Theodore Jaracz, kameng ti Teaching Committee iti Bagi a Manarawidwid. Kalpasan ti nabara a panangabrasa kadagiti bisita a presente manipud iti adu a daga, inawisna ti amin nga agtakder ket kantaenda ti kanta numero 52. Nagallungogan ti auditorium iti daydayaw ken Jehova bayat a kinantada “Ti Nagan ti Amatayo,” manipud iti libro nga Agkanta ti Daydayaw ken Jehova. Dayta a kanta, a nabuyogan iti komento ti tserman maipapan iti panangaramat iti edukasion a mangidayaw ken Jehova, isut’ nangparayray iti sumaganad a programa.
Nainkasuratan a Balakad Manipud Kadagiti Nataengan a Lallaki
Ti umuna a paset ti programa buklen dagiti ababa a palawag iti nagturpos a klase babaen kadagiti sumagmamano a nabayagen nga adipen ni Jehova. Ni Richard Abrahamson, kameng ti hedkuarter a nangrugi iti amin-tiempo a panagserbina idi 1940, indagadagna iti klase: “Itultuloyyo ti Maator.” Impalagipna kadakuada a napasarandan ti nadumaduma a panawen ti pannakaator iti panagbiagda kas Kristiano, a pakairamanan ti lima a bulan a panageskuelada iti Gilead. Gapuna apay a rumbeng nga itultuloyda ti maator?
Inlawlawag ti nagpalawag a ti sasao nga inaramat ni apostol Pablo iti 2 Corinto 13:11 “ipasimudaagna ti progresibo a sistema, agtultuloy a panagpasakup iti panangsukog wenno panangpasudi ni Jehova iti maysa, a mamagsigo, tapno maragpat ti maysa dagiti naing-inget a pagalagadan ni Jehova.” Kadagiti pakaidestinuanda iti sabali a pagilian, maipasangao ti nagturpos a klase kadagiti baro a karit iti pammatida. Masapul nga adalenda ti baro a pagsasao, makibagay iti naiduma a kultura ken kasasaad ti panagbiag, ken makitunos iti nadumaduma a kita ti teritoria. Makilangenda met iti nadumaduma a personalidad kadagiti pagtaenganda kas misionero ken iti baro a kongregasionda. No siaannad nga iyaplikarda dagiti prinsipio iti Biblia kadagitoy amin a kasasaad, buyogen ti kinatulok a maator, iti kasta, kas insurat ni apostol Pablo, ‘maitultuloy[da] met ti agrag-o.’
Ni John Barr, maysa kadagiti lima a kameng ti Bagi a Manarawidwid a nakiraman iti programa, inadawna ti temana iti 1 Corinto 4:9. Pinalagipanna dagiti managdengngegna a dagiti Kristiano ket buybuyaen dagiti anghel ken tattao. “Gapu iti pannakaammoda iti daytoy,” kinunana, “nayonanna unay ti kinapateg ti panagbiag ti maysa a Kristiano, nangruna no mautobna a babaen iti sawen ken aramidenna, maaddaan iti marka kadagidiay agbuybuya, makita man wenno saan. Mamatiak a maysa daytoy a banag a nakasaysayaat a laglagipenyo amin patpatgenmi a kakabsat iti maika-100 a klase ti Gilead bayat a mapankayo kadagiti adayo a suli ti daga.”
Indagadag ni Kabsat Barr iti 48 nga estudiante a laglagipenda, bayat a tulonganda dagiti arig karnero a mangammo iti kinapudno, nga “adda panagrag-o kadagiti anghel ti Dios gapu iti maysa a managbasol nga agbabawi.” (Lucas 15:10) Iti panangtukoyna iti 1 Corinto 11:10, impakitana a ti kababalin ti maysa maipanggep kadagiti nateokratikuan nga urnos apektaranna saan laeng a dagiti kakabsattayo a makitkitatayo no di pay met dagiti anghel a ditay makita. Anian a makagunggona a laglagipen daytoy nalawlawa a panangmatmat!
Maysa pay a kameng ti Bagi a Manarawidwid, ni Gerrit Lösch, a mismo a nagturpos iti Eskuelaan ti Gilead, insalaysayna dagiti kasuratan kas ti Salmo 125:1, 2; Zacarias 2:4, 5; ken Salmo 71:21 a mangipakita a ni Jehova ‘lawlawenna ti ilina.’ Salaknibanna ida iti tunggal sikigan. Mangipaay kadi laeng ti Dios iti kasta a salaknib kabayatan ti dakkel a rigat? “Saan,” insungbat ti nagpalawag, “ta ni Jehova ket maysan a ‘bakud ti apuy,’ salaknib iti ilina. Kalpasan ti gubat idi 1919 nasarakan ti natda iti naespirituan nga Israel a sigagagar a mangikasaba iti naimbag a damag ti Pagarian iti sangalubongan kas pammaneknek iti amin a nasion. Pannakabagi ida ti piguratibo a Jerusalem kadagiti langit. Ipasiguro ni Jehova ti nadibinuan a proteksion kadagitoy a pannakabagi kas grupo kabayatan ti panawen ti panungpalan. Asino ngarud ti siiepektibo a mangpasardeng kadakuada? Awan.” Anian a pannakaipatalged manen kadakuada ken iti amin a sisisinged a makitimpuyog kadakuada iti panangaramid iti pagayatan ti Dios!
Ni Ulysses Glass, ti kabayagan a miembro ti faculty ti eskuelaan, pinaregtana ti klase a ‘turposenda ti takem iti sangalubongan nga organisasion ni Jehova.’ Ti takem ket maysa a kasasaad wenno aramid a nangnangruna a maitutop kadagiti abilidad wenno kababalin ti maysa a tao. “Dakayo a manamnama a misionero nasarakanyon ti takemyo iti sangalubongan nga organisasion dagiti Saksi ni Jehova,” kinunana. “Ngem, napateg man dayta ita, pangrugian laeng daytoy ti biagyo kas misionero.” Kasapulan nga ipamaysada ti bagida a mangusar a naimbag kadagiti abilidadda ken tapno maitutop kadagiti naisangsangayan a pakaidestinuan nga ipaay kadakuada ni Jehova ken ti organisasionna.
Ti maudi a palawag iti daytoy a paset ti programa ket impaay ni Wallace Liverance, maysa a miembro ti faculty ti Gilead a nagserbi iti las-ud ti 17 a tawen idiay Bolivia. “Subokenyonto kadi ti Dios?” insaludsodna kadagiti estudiante. Kasanoda nga aramiden dayta? Sinubok ti nasion ti Israel ti Dios iti di umiso a pamay-an. (Deuteronomio 6:16) “Nabatad, ti panangsubok iti Dios babaen ti panagreklamo wenno panagtanabutob wenno nalabit panangipakita iti kinaawan pammati iti pamay-an a panangasikasona kadagiti banag ket di umiso,” kinuna ti nagpalawag. “Inton makadanonkayo iti baro a destinoyo, pagkedkedanyo dayta a pagannayasan,” indagadagna. No kasta, kasano ti umiso a panangsubok iti Dios? “Babaen ti panamati iti ibagana, panangaramid a siuumiso iti ibagana, sa kalpasanna ipannuray kenkuana ti pagbanaganna,” inlawlawag ni Kabsat Liverance. Kas makita iti Malakias 3:10, awisen ni Jehova dagiti tattaona: “Padasendak ita.” Inkarina a no simamatalek nga iyegda ti apagkapulloda iti kamalig ti templo, bendisionanna ida. “Apay a diyo matmatan ti pakaidestinuanyo kas misionero iti isu met laeng a wagas?” insaludsod ti nagpalawag. “Kayat ni Jehova nga agballigikayo iti dayta, gapuna subokenyo. Agtalinaedkayo iti pakaidestinuanyo. Aramidenyo dagiti panagbalbaliw a kayatna nga aramidenyo. Agibturkayo. Kitaenyo no dinakay a bendisionan.” Anian a nagsayaat a balakad kadagiti amin nga agserserbi ken Jehova!
Kalpasan ti maysa a kanta nabalbaliwan ti programa manipud kadagiti palawag a nagbalin nga agsasaruno a makaparagsak nga interbiu.
Dagiti Praktikal nga Ebkas Manipud iti Tay-ak
Ni Mark Noumair, baro a miembro ti faculty ti Gilead, inawisna dagiti estudiante a mangisalaysay kadagiti kapadasanda iti tay-ak ti ministerio kabayatan ti itatabunoda iti eskuelaan. Intampok dagitoy ti pateg ti panangyun-una iti ministerio ken impaayanna ti tallaong kadagiti praktikal a kapanunotan a maaramatda.
Bayat ti panageskuelada, nangnangruna a nagunggonaan dagiti estudiante iti daytoy a klase ti Gilead babaen ti pannakitimpuyogda kadagiti kameng ti Branch Committee iti 42 a dagdaga, nga adda met idi iti Patterson Educational Center maipaay iti naisangsangayan a panagsanay. Adu kadakuada ti nagturpos iti Gilead adun a tawen ti napalabas. Iti programa, naidaulo ti pananginterbiu kadagiti pannakabagi iti maika-3, maika-5, maika-51, ken maika-92 a klase, kasta met iti Gilead Extension School idiay Germany. Anian a makagunggona dagiti komentoda!
Imbagada ti marikna dagiti misionero bayat a makitada ti bilang dagiti managdaydayaw ken Jehova nga umadu kadagiti destinoda manipud iti sangkabassit agingga iti pinulpullo a ribu. Imbagada ti nagapuananda iti panangidanon iti naimbag a damag kadagiti naiwaraswaras a pagtaengan idiay Andes Mountains ken purpurok kadagiti ubbog ti danum iti Amazon River. Insalaysayda ti panangasaba kadagiti dida ammot’ agbasa ken agsurat a tattao. Imbagada ti maipapan iti panangikagumaanda a mangadal kadagiti baro a pagsasao ken no ania ti pudpudno a mainanama dagiti nagturpos maipapan iti no kasanot’ kabayag a makapangasaba ken makapagpalawagda iti maysa a pagsasao kas ti Insik. Indemostrada pay ketdi dagiti pagtuladan a presentasion iti Español ken Insik. Impaganetgetda nga epektibo unay dagiti misionero no adalenda saan laeng a ti pagsasao no di pay ket ti kapanunotan dagiti tao. Imbagada ti maipapan iti masansan a nakaro a kinarigat ti panagbiag kadagiti napanglaw a pagilian ket kinunada: “Rumbeng a bigbigen dagiti misionero a daytoy a kasasaad masansan a mainaig iti pananggundaway. Maaramid ti misionero ti kasayaatan no adda riknana a kas ken Jesus—naasian kadagiti tattao, a kasla karkarnero nga awanan pastor.”
Kalpasan ti maysa a kanta nagtultuloy ti programa buyogen ti palawag ni A. D. Schroeder, kameng ti Bagi a Manarawidwid. Naaddaan idit’ pribilehio a maysa kadagiti orihinal nga instruktor iti Eskuelaan ti Gilead idi naluktan idi 1943. Kas maitutop a panangingudo iti programa, insalaysayna ti tema a “Panangitan-ok ken Jehova kas Soberano nga Apo.” Ti makapainteres a panangsalaysay ni Kabsat Schroeder iti maika-24 a Salmo 24 impasagepsepna iti amin a timmabuno nga anian a naindaklan a pribilehio nga itan-ok ni Jehova kas Soberano nga Apo.
Kalpasan ti pannakayawat dagiti diploma, ken maudi a kanta, inngudo ni Karl Klein iti Bagi a Manarawidwid buyogen ti naimpusuan a kararag. Anian a praktikal ken makapabang-ar iti naespirituan a programa!
Kadagiti aldaw kalpasan ti panagturpos, nangrugi nga agdaliasat ti 48 a kameng ti maika-100 a klase kadagiti destinoda kas misionero iti 17 a daga. Ngem saan a maikuna a karugrugida pay laeng ti ministerioda. Addaandan iti nawadwad a rekord iti amin-tiempo a ministerio kas Kristiano. Idi nagpasalistada iti Gilead, iti promedio, agedaddan iti 33 ken nakabusbosdan iti nasurok a 12 a tawen iti amin-tiempo a ministerio. Sumagmamano kadakuada ti nagbalin a kameng iti sangalubongan a pamilia ti Bethel ti Watch Tower Society. Dadduma ti nagserbi kas agdaldaliasat a manangaywan. Adun kadagiti estudiante ti nakiraman iti sumagmamano a kita ti panagserbi iti sabsabali a daga—idiay Africa, Europa, Sud America, dagiti puro iti baybay, ken kadagiti grupo nga addaan ganggannaet a pagsasao kadagiti pagilianda. Ngem ita makikaduada iti adu a sabsabali a misionero a maragsakan a mangikuna, ‘Agserbikamto iti sadinoman iti lubong a sadiay kasapulandakami.’ Ti naimpusuan a tarigagayda isut’ panangaramat iti biagda a mangitan-ok ken Jehova.
[Kahon iti panid 27]
Estadistika ti Klase:
Bilang dagiti pagilian a nairepresentar: 8
Bilang dagiti pagilian a nakaitudingan: 17
Bilang dagiti estudiante: 48
Promedio nga edad: 33.75
Promedio a tawen iti kinapudno: 17.31
Promedio a tawen iti amin-tiempo a ministerio: 12.06
[Ladawan iti panid 26]
Ti Maika-100 a Nagturpos a Klase iti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ket dagiti nagan nailista manipud kannigid nga agpakannawan iti kada intar.
(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.