Ti Sao ti Dios Agtignay kas “Datdatlag”

KAS INSALAYSAY NI THÉRÈSE HÉON

Maysa nga aldaw idi 1965, simrekak iti maysa a pagtagilakuan ket intukonko dagiti kopia ti Pagwanawanan ken Agriingkayo! a magasin kadagiti agtagtagilako. Idi pumanawakon, nakangngegak iti putok. Tiniruan ti bala ti suelo iti asideg dagiti sakak. “Kastat’ panangtrato kadagiti Saksi ni Jehova,” inyumsi ti maysa kadagiti agtagtagilako.

NAPABUTNGANAK iti dayta a kapadasan​—ngem saan nga umdas tapno isukok ti amin-tiempo a ministerio. Nagpateg unay dagiti kinapudno iti Biblia a nasursurok tapno palubosak ti aniaman a banag pakaigapuan nga isukok ti ministeriok. Bay-andak a mangilawlawag no apay a kunaek daytoy.

Kalpasan a naipasngayak idi Hulio 1918, nagnaed dagiti dadakkelko idiay Cap-de-la-Madeleine, maysa a bassit a purok idiay Quebec, Canada, nalatak kas Ti Lugar Dagiti Datdatlag. Agdudupudop dagiti bisita ditoy tapno agrukbab iti lugar a sagrado ni Birhen Maria. Nupay saan a mapaneknekan dagiti naikuna a datdatlag ni Maria, nagepekto ti Sao ti Dios kas datdatlag iti biag ti adu a tattao bayat a dimmakkel ti purok a nagbalin a maysa nga ili ti nasurok a 30,000 nga agnanaed.

Idi ag-20 a tawenakon, nakita ni tatang ti interesko kadagiti narelihiosuan a banag ket intedna kaniak ti Bibliana. Idi rinugiak a basaen dayta, naklaatak a makaammo iti Exodo kapitulo 20 a ti panagdaydayaw iti imahen ket sibabatad a nakondenar. Dagus a napukaw ti panagtalekko kadagiti sursuro ti Iglesia Katolika ket insardengkon ti tumabuno iti Misa. Diak kayat ti agdayaw kadagiti ladawan. Malaglagipko pay laeng ti kuna ni Tatang, “Thérèse, saanka kadi a mapan idiay simbaan?” “Saan,” insungbatko. “Basbasaek ti Biblia.”

Nagbalin a paset ti biagko ti panagbasa iti Biblia uray kalpasan a nakiasawaak idi Setiembre ti 1938. Yantangay masansan nga agtrabaho iti rabii ni lakayko, a Rosaire, inyugalik a basaen ti Biblia no adda iti trabahona. Di nagbayag nautobko a ti Dios masapul nga adda tattaona, ket rinugiak a biroken ida.

Ti Panangbirokko Kadagiti Tattao ti Dios

Gapu iti nasursurok iti simbaan, idi ubingak pay, mabutengak a maturog di la ket ta mariingak nga adda iti impierno. Tapno masarangetko ti kasta a buteng, inyugalik nga ibaga iti bagik a saan nga ipalubos ti Dios ti ayat ti maysa a banag a nakaam-ames a mapasamak. Buyogen ti panagtalek, intultuloyko ti agbasa iti Biblia, a birbirokek ti kinapudno. Kaslaak idi iti eunuko nga Etiope nga agbasbasa ngem dina naawatan.​—Aramid 8:26-39.

Ti kabsatko a ni André ken ni baketna, nga agnanaed iti apartment iti kadsaaran iti babaenmi, nangrugida a makipagadal iti Biblia kadagiti Saksi ni Jehova idi agarup 1957. Imbagak iti ipagko a pakaammuannak babaen ti panangtuktokna iti bobida no umay mangasaba dagiti Saksi iti patakder. Iti kasta maammuak ket diak ilukat ti ruanganko. Maysa nga aldaw nalipatannak a pinakaammuan.

Iti dayta nga aldaw linuktak ti ruangan ket naam-ammok ni Kay Munday, maysa a payunir, kas panangawag kadagiti amin-tiempo a ministro a Saksi ni Jehova. Kinasaritanak maipapan iti nagan ti Dios, nga inlawlawagna nga adda personal a nagan ti Dios, Jehova. Idi nakapanaw, sinukimatko ti Bibliak tapno mapatalgedak no pudno a suportaran dagiti teksto iti Biblia ti kinunana. Ti panagsukimatko ti nangparagsak unay kaniak.​—Exodo 6:3, Douay Version, footnote; Mateo 6:9, 10; Juan 17:6.

Idi immay manen ni Kay, pinagsaritaanmi ti doktrina ti Katoliko maipapan iti Trinidad, nga agkunkuna a ti Dios ket tallo a persona iti maymaysa a Dios. Kalpasanna siaannad a sinukimatko ti bukodko a Biblia tapno mapennekko ti bagik a saanna nga isursuro ti Trinidad. (Aramid 17:11) Pinatalgedan ti panagadalko a saan a kapada ni Jesus ti Dios. Isut’ naparsua. Adda namunganayanna, idinto ta awan ken Jehova. (Salmo 90:1, 2; Juan 14:28; Colosas 1:15-17; Apocalipsis 3:14) Gapu ta napnekak iti naammuak, naragsakanak a nangitultuloy iti pannakisaritak iti Biblia.

Maysa nga aldaw idi 1958, kabayatan ti naniebe a Nobiembre, inawisnak ni Kay a tumabuno iti asamblea sirkito a naangay iti dayta a sardam iti maysa a naabangan a hall. Pinatgak ti awis ket tinagiragsakko ti programa. Simmaganad, iti maysa a pannakisarita iti Saksi nga immasideg kaniak, insaludsodko, “Kasapulan kadi a mangasaba iti binalaybalay ti pudno a Kristiano?”

“Wen,” kinunana, “masapul a maipakaammo ti naimbag a damag, ken ipalgak ti Biblia a ti isasarungkar kadagiti tattao iti pagtaenganda ket napateg a wagas ti panangasaba.”​—Aramid 20:20.

Anian a ragsakko iti sungbatna! Nakombinsirak iti dayta ta nasarakak dagiti tattao ti Dios. No koma kinunana, “Saan, saan a nesesita,” nagduaduaak koma a nasarakak ti kinapudno, ta ammok ti ibagbaga ti Biblia maipapan iti panangasaba iti binalaybalay. Manipud idin, napartaken ti irarang-ayko iti naespirituan.

Kalpasan dayta nga asamblea sirkito, rinugiakon ti tumabuno kadagiti gimong dagiti Saksi ni Jehova a maang-angay idi iti kabangibang nga ili ti Trois-Rivières. Da laeng Kay ken ti kaduana, a ni Florence Bowman, ti kakaisuna a Saksi nga agnanaed idi idiay Cap-de-la-Madeleine. Maysa nga aldaw kinunak, “Kumuyogakto kadakayo a mangasaba inton bigat.” Naragsakanda a kumaduaak kadakuada.

Panangasaba iti Ilik

Impagarupko nga umawat amin iti mensahe ti Biblia, ngem naammuak a dagus a saan a kastoy ti kaso. Idi naidestino da Kay ken Florence iti maysa a lugar, sisiak laeng iti ili a mangikaskasaba kadagiti kinapudno iti Biblia iti binalaybalay. Buyogen iti tured, intultuloyko ti nangasaba a sisiak iti agarup dua a tawen agingga iti pannakabautisarko idi Hunio 8, 1963. Iti dayta nga aldaw nagpasalistaak iti naawagan idi a vacation pioneer service.

Nagtultuloyak kas vacation pioneer iti makatawen. Kalpasanna, inkari ni Delvina Saint-Laurent nga umay ditoy Cap-de-la-Madeleine ket makipagtrabaho kaniak maminsan iti makalawas no ag-regular payunirak. Gapuna sinuratak ti aplikasionko kas payunir. Nupay kasta, nakalkaldaang, ta dua a lawas laeng sakbay a mangrugiak iti amin-tiempo a ministerio, natay ni Delvina. Aniat’ aramidek? Bueno, nasuratakon ti aplikasion ket diak kayat a baliwan ti planok. Gapuna idi Oktubre 1964, rinugiak ti karerak iti amin-tiempo a ministerio. Iti simmaganad nga uppat a tawen, napanak iti binalaybalay a sisiak.

Masansan a nakuspag dagiti napeklan a Katoliko idiay Cap-de-la-Madeleine. Impapolisdak ti dadduma a gandatda a pasardengendak a mangasaba. Maysa nga aldaw, kas nadakamatko iti rugi, binutbutengnak ti maysa nga agtagtagilako babaen ti panangpaltogna iti ayan dagiti sakak. Bueno, namataud daytoy iti riribuk iti ili. Inawagan ti lokal nga estasion ti telebision dayta kas maysa a krusada maibusor kadagiti Saksi ni Jehova. Ti pakabuklan ti pasamak nagbunga iti makaay-ayo a panangsaksi. Nairanrana, sangapulo a tawen kalpasanna, nagbalin a Saksi a mismo ti maysa a kabagian ti agtagtagilako a nangpaltog idi kaniak.

Dagiti “Datdatlag” a Gapuanan ti Sao ti Dios

Kadagiti adu a tawen, naimatangak ti pader ti ibubusor kadagiti kinapudno iti Biblia nga in-inut a narba idiay Cap-de-la-Madeleine. Agarup 1968, immakar dagiti dadduma a Saksi ditoy, ket nangrugi a nangipangag dagiti lokal nga agnanaed kadagiti kinapudno iti Biblia. Idi kattapog ti dekada ti 1970, kas epektona, immadu unay ti bilang dagiti panangyadal iti Biblia. Nagtengna ti punto a kasapulan nga agpatulongak iti dadduma a Saksi a mangidaulo iti sumagmamano kadagiti panangyadal iti Biblia nga ikonkonduktak tapno maitultuloyko ti pannakiramanko iti binalaybalay a ministerio.

Maysa nga aldaw inawat ti agtutubo a babai ti katulongan iti panagadal iti Biblia a Ti Kinapudno a Mangiturong iti Biag nga Awan Inggana. Ti kaduana iti dayta a tiempo ket maysa nga agtutubo a lalaki nga agnagan André, kriminal nga aglanglanga a butangero a nakiraman iti panagsasarita. Ti panagsasarita a kadua ni André ti nangawis iti interesna, ket narugian ti panagadal iti Biblia. Di nagbayag kalpasanna rinugianna nga isarsarita kadagiti gagayyemna ti maad-adalna.

Iti naminsan, mangyad-adalak idi iti Biblia kadagiti uppat a butangero, a maysa kadakuada ti saan unay a nagsasao ngem dimngeg a naimbag. Pierre ti naganna. Maysa a parbangon iti agarup alas dos, adda nangngegmi ken ni lakayko a nagtuktok iti ruangan. Iladawanyo daytoy a buya: Nakatakder sadiay ti uppat a butangero nga addaan kadagiti saludsod kaniak. Makaparagsak, pulos a di nagreklamo ni Rosaire iti kakasta a di-naintiempuan nga ibibisita.

Idi damo timmabtabuno kadagiti gimong dagiti uppat a lallaki. Nupay kasta, da laeng André ken Pierre ti nagtultuloy. Intunosda ti biagda kadagiti pagalagadan ti Dios ket nabautisaranda. Iti nasurok a 20 a tawen itan, simamatalek nga agserserbi ken Jehova dagitoy dua a lallaki. Idi rinugianda ti agadal, nalatakda gapu iti kriminal nga aramidda ken sinipsiputan ida dagiti polis. Pasaray umay dagiti polis tapno kitaen ida kalpasan ti maysa kadagiti panagadalmi iti Biblia wenno kabayatan ti gimong iti kongregasion. Maragsakanak ta nakasabaak dagiti “amin a kita ti tattao,” ket iti kasta direkta a nakitak no kasano a ti Sao ti Dios agepekto kadagiti panagbalbaliw nga agparang a pudpudno a namilagruan.​—1 Timoteo 2:4.

No naibaga koma kaniak idi rugrugi ti ministeriok a maaddanto ti maysa a Kingdom Hall idiay Cap-de-la-Madeleine ken mapnonto dayta kadagiti tattao ni Jehova, diak ket ngata mamati. Iti ragsakko, ti maysa a bassit a kongregasion iti kabangibang a siudad ti Trois-Rivières dimmakkel iti innem a rumangrang-ay a kongregasion nga agtataripnong iti tallo a Kingdom Hall, a pakairamanan ti maysa idiay Cap-de-la-Madeleine.

Personal a nagrag-oak ti itutulong iti agarup 30 a tattao a nakagteng iti punto ti dedikasion ken bautismo. Ita, iti edad a 78, pudpudno a maikunak a maragsakanak ta indedikarko ti biagko ken Jehova. Masapul a bigbigek, nupay kasta, nga addada tiempo a maup-upayak. Tapno sibaballigi a malabanak ti kakasta a tiempo, kanayon nga ukradek ti Bibliak ket basaek ti sumagmamano a bersikulo a mangpabang-ar unay kaniak. Imposible kaniak a lumabas ti maysa nga aldaw a diak basaen ti Sao ti Dios. Nangnangruna a makaparegta ti Juan 15:7, a sadiay kunana: “No agtalinaedkayo a naikaykaysa kaniak ket dagiti sasaok agtalinaedda kadakayo, dawatenyo ti aniaman a kayatyo ket maaramidto dayta a maipaay kadakayo.”

Namnamaek a makitakto ni Rosaire iti baro a lubong a nakaas-asidegen. (2 Pedro 3:13; Apocalipsis 21:3, 4) Sakbay la unay ti ipapatayna idi 1975, rumangrang-ayen nga agturong iti bautismo. Ita, determinadoak nga agtultuloy iti amin-tiempo a ministerio ken agtultuloy nga agrag-o iti trabaho ni Jehova.