Biag a Diak Pulos Nagbabawyan

KAS INSALAYSAY NI PAUL OBRIST

Idi 1912, idi agtawenak iti innem, natay ni Nanang bayat nga ipaspasngayna ti maikalima nga anakna. Agarup dua a tawen kalpasanna, maysa nga agkabannuag nga agtagtagibalay, ni Berta Weibel, nangrugi a mangtaripato iti pamiliami. Idi inkallaysa ni Tatang iti simmaganad a tawen, naragsakankam nga annak a maaddaan manen iti ina.

NAGNAEDKAMI idiay Brugg, maysa a bassit nga ili iti paset ti Switzerland nga Aleman ti pagsasaona. Talaga a Kristiano ni Berta, ket magusgustuak unay. Rinugianna ti nagadal iti publikasion dagiti Estudiante ti Biblia (dagiti Saksi ni Jehova) idi 1908, ken inranudna iti sabsabali ti nasursurona.

Idi 1915, di nagbayag kalpasan a nagkallaysa da Tatang ken ni Berta, kimmuyogak kenkuana a nangbuya iti “Photo-Drama of Creation.” Daytoy nga slide ken pelikula nga impabuya ti International Association of Earnest Bible Students naimaldit iti panunot ken pusok. Nasdaaw met dagiti sabsabali. Napno ti patakder idiay Brugg isu a sinerraanen dagiti polis ti ruruangan ken pinapanawda ti dadduma pay nga agsangpet. Iti kasta pinadpadas ti adu ti sumrek iti silulukat a tawa a nagaramatda iti agdan, ket nakastrek ti sumagmamano.

Ti Nasayaat nga Ulidan ni Nanang

Kabarbaraan idi ti Gubat Sangalubongan I idiay Europa, ket madandanagan dagiti tattao iti masanguanan. Gapuna, ti panagbalaybalay nga addaan iti makaliwliwa a mensahe ti Pagarian ti Dios, kas ti inaramid ni Nanang, ket maysa a natan-ok a trabaho. No dadduma ikuyognak, ket tinagiragsakko unay daytoy. Idi 1918, kamaudiananna insimbolo ni Nanang ti dedikasionna ken Jehova a Dios babaen ti pannakabautisar iti danum.

Saan a nakibiang ni Tatang iti panagdaydayaw ni Nanang agingga iti panagpabautisarna, ngem idi kuan rinugiannan a busoren. Maysa nga aldaw innalana dagiti literatura iti Biblia ni Nanang ket impalladawna iti dalikan. Ti laeng Biblia ti naagaw ni Nanang iti apuy. Ngem nakaskasdaaw ti simmaganad nga inaramidna. Napan ken ni Tatang sana inarakup. Saan a nagimula iti aniaman a sakit ti nakem kenkuana.

Tangay nabigla, kimmalma ni Tatang. Nupay kasta, pasaray rumsua ti ibubusorna, ket kasapulan nga ibturanmi ti pungtotna.

Trabaho ken Naespirituan nga Irarang-ay

Idi 1924, kalpasan a nakompletok ti tallo-tawen a panagadal kas hairdresser, pimmanawak iti pagtaengan ket nagtrabaho iti paset ti Switzerland a Pranses ti pagsasaona. Nangipaay daytoy iti gundaway tapno maparang-ayko ti pannakaammok iti lenguahe a Pranses. Nupay medio nakalapped iti naespirituan a panagrang-ayko dayta nga iyaakar, di pulos nagmawmaw ti ayatko iti kinapudno ti Biblia. Gapuna idi nagawidak kalpasan ti innem a tawen, rinugiak ti tumabuno kadagiti gimong ti kongregasion Kristiano idiay Brugg.

Di nagbayag kalpasanna immakarak idiay Rheinfelden, maysa a bassit nga ili nga agarup 40 kilometro ti kaadayona. Nagtrabahoak sadiay iti hairdresser shop ni manangko ket intultuloyko ti naespirituan a panagrang-ayko babaen ti pannakigimong iti maysa a bassit a grupo dagiti Estudiante ti Biblia. Maysa nga aldaw idi nalpas ti panagadalmi iti Biblia iti tengnga ti lawas, insaludsod ni Kabsat Soder, ti mangay-aywan a panglakayen: “Asino ti agpangpanggep a makiraman iti tay-ak ti ministerio inton Domingo?” Nagboluntarioak, nga impagarupko nga adda kaduaek ken isuronak a mangasaba.

Idi dimteng ti Domingo ket nakadanonkami iti teritoriami, kinuna ni Kabsat Soder, “Sadiay ti pangasabaan ni Mr. Obrist.” Nupay nakaro unay idi ti panagkebbakebba ti barukongko, rinugiak a sarungkaran dagiti tattao iti pagtaenganda ket kinasaritak ida maipapan iti Pagarian ti Dios. (Aramid 20:20) Manipud idin, diakon pulos nagsarimadeng iti trabaho a panangasaba a sigun ken Jesus masapul a mairingpas sakbay a dumteng ti panungpalan daytoy sistema ti bambanag. (Mateo 24:14) Idi Marso 4, 1934, idi agtawenak iti 28, insimbolok ti dedikasionko ken Jehova a Dios babaen ti panagpabautisar iti danum.

Dua a tawen kalpasanna nagtrabahoak kas hairdresser idiay Lugano, maysa a siudad iti paset ti Switzerland a ti pagsasaona ket Italiano. Dagus a rinugiak nga ikasaba ti naimbag a damag sadiay, nupay diak unay ammo ti agsao iti Italiano. Kaskasdi, iti damo a panangasabak iti Domingo, naipaimak ti 20 a bokleta nga intugotko. Idi agangay, inummongko ti sumagmamano nga interesado tapno mangbukel iti maysa a grupo ti panagadal iti Pagwanawanan. Kamaudiananna nabautisaran ti sumagmamano kadagitoy, ket idi Pebrero 1937 nakabuangaykam iti kongregasion dagiti Saksi ni Jehova idiay Lugano.

Dua a bulan kalpasanna, idi Abril 1937, nakaawatak iti surat a nangbalbaliw unay iti biagko. Imbitasion dayta nga agserbi idiay Bethel, kas awag iti pasilidad ti sanga dagiti Saksi ni Jehova iti maysa a pagilian. Dagus nga inawatko ti imbitasion​—maysa a desision a diak pulos nagbabawyan. Iti kasta rinugiak ti nagbalinen nga 60-tawen a karera iti amin-tiempo a ministerio.

Panagserbi iti Bethel Kabayatan ti Riribuk

Kadaydi a tiempo, ti Bethel iti Switzerland ket adda iti siudad ti Bern, ti kabesera ti pagilian. Nagyimprentakami sadiay kadagiti libro, bokleta, ken magasin iti 14 a lenguahe, sa naipatulod dagitoy iti intero a Europa. No dadduma, ikaromatiliak dagiti nayimprenta a literatura nga ipan iti estasion ti tren, tangay kadagidi a tiempo saan a kanayon nga adda van a maaramat. Ti damo a trabahok idiay Bethel ket iti Composition Department, a sadiay urnosenmi dagiti buli a letra a daytat’ mausar iti panagimprenta. Di nagbayag nangrugiak nga agtrabaho kas receptionist, ken, siempre, nagserbiak met kas barbero iti pamilia ti Bethel.

Idi Setiembre 1939, bimtak ti Gubat Sangalubongan II, ket ti iraraut dagiti Nazi pinagkullayawna ti intero a Europa. Neutral a pagilian ti Switzerland iti tengnga dagiti agdadangadang a nasion. Idi damo, intultuloymi ti Nakristianuan a trabahomi nga awan tubeng. Kalpasanna, idi Hulio 5, 1940, iti alas dos ti malem, kabayatan nga addaak iti lamisaanko iti lobby, dimteng ti maysa a sibilian, a kaduana ti maysa a soldado nga addaan paltog a de bayoneta.

“Ayan ni Zürcher?” imbugkaw ti sibilian. Ni Franz Zürcher idi ti manangaywan iti sanga iti trabahomi a panangasaba idiay Switzerland.

“Asino ti ibagak nga agbirbirok?” inyimtuodko. Dagus a ginammatandak sadak induron nga immuli, sadak binilin nga ipanko ida iti opisina ni Zürcher.

Ti intero a pamilia ti Bethel​—agarup 40-kami idi​—ket naibilin nga aguummong idiay panganan. Uppat a masinggan ti naipuesto iti ruar ti patakder tapno awan aglibas. Iti uneg, agarup 50 a soldado ti nangrugi nga agsukimat iti patakder. Maisupadi iti ninamnama, awan ebidensia a nasarakan a dagiti Saksi ni Jehova ket nainaig iti panangitandudo ti ibubusor iti serbisio militar. Kaskasdi, adu a literatura ti nakompiskar sa innala ti lima a trak dagiti soldado.

Idi nagkedkedkami a mangipalubos kadagiti autoridad ti gobierno a mangsensur iti Pagwanawanan, napasardeng ti pannakaipablaakna idiay Switzerland. Kaipapanan daytoy a basbassiten a tao ti kasapulan nga agtrabaho idiay Bethel, ket dagiti ub-ubing a miembro ti pamilia naparegtada a pumanaw ken agpayunir, kas awag kadagiti Saksi ni Jehova a makiraman iti trabaho a panangasaba iti amin-tiempo.

Panagpayunir Kabayatan ti Gubat

Idi Hulio 1940, nagsubliak idiay asideg ti Lugano a paset ti Switzerland nga Italiano ti pagsasaoda, a nagnaedak idi sakbay a simrekak iti Bethel. Daytoy napeklan a Katoliko a teritoria, nga adda met idi iti sidong ti nakaro nga impluensia ti Facismo, isut’ nakaidestinuak kas payunir.

Gistay inaldaw a masalawdak dagiti polis a mangibilbilin nga isardengkon ti mangasaba. Maysa nga aldaw bayat a makisarsaritaak iti maysa a babai iti ruangan ti hardin, kinemmegnak ti maysa a lalaki a nakasibilian, impannak iti pangpatrolia a kotse, sanak impan idiay Lugano. Sadiay insukonak kadagiti polis. Idi inimbestigardak, inlawlawagko a binilinnatay ni Jehova a Dios a mangasaba.

“Ditoy daga, dakami ti agbilbilin,” sipapangas nga insungbat ti opisial. “Mabalin ti Dios ti agbilin idiay langit!”

Kabayatan ti gubat, nangnangruna a napateg nga ipangagtayo ti balakad ni Jesus nga agbalin a “naannad a kas kadagiti serpiente ket kaskasdi a nasingpet a kas kadagiti kalapati.” (Mateo 10:16) Gapuna, inlemmengko ti kaaduan a literaturak kadagiti makin-uneg a bulsa ti kawesko. Ket tapno masiguradok nga awan aniaman a maregregko, nagsuotak iti knickerbocker a naisiglut ti gayadanna agingga iti baba ti tumeng.

Idi agangay, nabilinak nga umakar idiay ginget ti Engadine, a sadiay nakilinnemmengak manen kadagiti polis. Maysa daytoy a napintas a ginget iti makindaya a Swiss Alps, a no kalam-ekna maabbungotan iti nakapuspuskol a niebe, gapuna indawatko a patulodandak kadagiti ski a tumulong iti pananglawlawko iti teritoria.

Napateg dagiti naimeng a guantes no agdaldaliasat babaen kadagiti ski iti kalam-ekna. Gaput’ kasansan ti pannakausarna, di nagbayag narunoten ti guantesko. Anian a yamanko idi a maysa nga aldaw nakaawatak iti di ninamnama a pakete a naglaon iti ginansilio a sweater kasta met kadagiti naimeng a guantes! Inaramid dagitoy ti maysa a Kristiano a kabsat a babai iti dati a kongregasionko idiay Bern a para kaniak. Agpapan ita matignayak nga agyaman no malaglagipko dayta.

Adu a Makaparag-o a Pribilehio

Idi 1943, nangrugi a sumayaat ti kasasaad idiay Switzerland, ket naayabanak manen nga agserbi idiay Bethel. Gapu iti sumagmamano a parikut iti Pranses ti pagsasaona a kongregasion idiay Lausanne, agarup 100 kilometro ti kaadayona, natudinganak a sumarungkar a regular iti dayta a siudad tapno matulongan dagiti agibumbunannag a maaddaan iti umiso a panangmatmat iti organisasion ti Dios.

Kalpasanna nagserbiak kas manangaywan iti sirkito iti amin a Pranses a kongregasion idiay Switzerland. Kadagiti umuna nga aldaw ti lawas, agtrabahoak idiay Bethel, ngem iti Biernes, Sabado, ken Domingo sumarungkarak iti nadumaduma a kongregasion kada lawas a tumulong kadakuada iti naespirituan. Mainayon pay, idi nabuangay idiay Bern ti kongregasion a Pranses ti pagsasaona idi 1960, siak ti nagbalin a mamangulo a manangaywan. Nagserbiak iti kastoy a kapasidad agingga idi 1970, idi nayakar ti Bethel manipud Bern iti agdama a napintas a lugarna iti ili ti Thun.

Naragsakanak idi masarakak idiay Thun ti maysa a bassit a grupo dagiti Saksi nga Italiano ti pagsasaona, ken rinugiak ti nakipagtrabaho kadakuada. Idi agangay nabuangay ti maysa a kongregasion, ket nagserbiak kas mamangulo a manangaywan sadiay iti sumagmamano a tawen agingga a kualipikadon dagiti ub-ubing a kakabsat a lallaki a mangibaklay iti dayta a rebbengen.

Ti imbilangko a nangnangruna a makaparagsak a pribilehio isut’ itatabuno kadagiti internasional a kombension ti ili ni Jehova. Kas pagarigan, idi 1950 naangay ti nakallalagip a Theocracy’s Increase Assembly idiay Yankee Stadium, New York. Agnanayonto a malaglagipko ti isasarungkar iti sangalubongan a hedkuarter dagiti Saksi ni Jehova idiay Brooklyn, New York. Diak met malipatan ti palawag ni Kabsat Milton G. Henschel iti simmaganad a tawen iti Clean Worship Assembly idiay London, Inglatera, a nangitampok iti sasao ni Jesus nga, “Ibagak kadakayo, No dagitoy nagtalinaedda a siuulimek, dagiti batbato agikkisdanto.” (Lucas 19:40) Insaludsod ni Kabsat Henschel, “Iti panagkunayo kasapulan pay nga umkis dagiti bato?” Mangmangngegko pay laeng ti riaw a, “Saan!” a naggapu iti pinulpullo a ribu a timek.

Idi napanak idiay Bethel idi 1937, ni tatang, a naammuanna nga umaw-awatkami laeng iti bassit a kantidad a panggastos, madandanagan nga insaludsodna, “Barok, kasanokanton no lumakayka?” Simmungbatak babaen ti panangadawko iti sasao ni salmista a David: “Diak pay nakakita iti sililinteg a nabaybay-an, ken kadagiti putputotna man a makipalpalama iti kanen.” (Salmo 37:25) Talaga a natungpal dagitoy a sasao kaniak.

Anian a ragsakko ta iti napalabas a 80 a tawenen, nakikallaysa ni Berta Weibel ken ni Tatang ket gapu iti ulidan ken panangiwanwanna naam-ammok ni Jehova ken dagiti galadna! Nupay inuyaw ti dadduma a miembro ti pamilia, simamatalek a nagserbi ken Jehova agingga iti ipapatayna idi 1983. Saanna a pulos nagbabawyan ti panagserbina iti Diosna, ni Jehova; diak met pulos nagbabawyan ti panagtalinaedko a di naasawaan ken panangipaayko a naan-anay iti biagko iti panagserbi ken Jehova.

[Ladawan iti panid 25]

Iti trabahok idiay Bethel