Datayo ti Kita nga Addaan Pammati
Panangpabileg iti Pammati Idiay India Babaen ti Panagadal iti Biblia
MANIPUD iti nangayed ken naabbungotan iti niebe a Kabambantayan ti Himalaya iti amianan agingga iti napudot nga aplaya ti Indian Ocean iti abagatan, ti India ket daga ti kinanadumaduma iti geograpia ken relihion. Iti nasurok a maysa a bilion a populasionna, agarup 83 a porsiento ti Hindu, 11 a porsiento ti Muslim, ket ti nabatbati buklen kangrunaanna dagiti manmano a Kristiano, Sikh, Budista, ken Jaino. Nawayada amin nga agdayaw. Kuna ti The World Book Encyclopedia: “Napateg ti relihion iti biag dagiti taga-India.”
Dagiti Saksi ni Jehova ket tattao nga agbibiag maitunos iti pammatida kas Kristiano. Nasurok a 21,200 kadakuada ti adda idiay India. Kas kadagiti naespirituan a kakabsatda iti nadumaduma a paset ti lubong, matmatan dagiti Saksi idiay India a pribilehio ti tumulong kadagiti kaarrubada a maaddaan iti nabileg a pammati iti Sao ti Dios, ti Nasantuan a Biblia. (2 Timoteo 3:16, 17) Usigenyo no kasano a ti maysa a pamilia idiay Chennai iti abagatan ti India nasarakanda ti kinapudno nga adda iti Biblia.
Sakbay a naam-ammoda dagiti Saksi ni Jehova, naregta daytoy a pamilia kadagiti karismatiko a movimiento dagiti Katoliko, ket kunada a makakitada kadagiti sirmata, makapagsao iti nadumaduma a pagsasao, ken mangpaimbagda kadagiti masakit. Nalatakda iti simbaan ken komunidad, nga uray la awagan ti tattao ti dadduma a kameng ti pamiliada kas “swami,” kayatna a sawen “apo.” Maysa nga aldaw, sinarungkaran ti maysa a Saksi daytoy a pamilia. Impakitana kadakuada manipud Biblia a ni Jesus ket Anak ti Dios, saan a kas iti pammati ti kaaduan nga isu ti Mannakabalin-amin a Dios. Impakita met ti Saksi kadakuada a Jehova ti nagan ti Dios ken panggep ni Jehova a pagbalinen ti daga a maysa a napintas a paraiso.—Salmo 83:18; Lucas 23:43; Juan 3:16.
Yantangay pagraemanda ti Biblia ken nagustuanda ti nangngegda, immannugot dagiti kameng daytoy a pamilia a regular a makipagadal iti Biblia kadagiti Saksi ni Jehova. Binabalaw ida dagiti kaduada iti simbaan gapu iti dayta. Kaskasdi, desidido latta ti pamilia nga agadal iti Biblia. Bayat nga immadu ti pannakaammoda ken bimmileg ti pammatida, insardengda dagiti di umiso a narelihiosuan nga aramidda. Tallo a kameng daytoy a pamilia ti naregta ken bautisado itan a Saksi, ket agserserbi nga auxiliary pioneer ti ina no mabalinanna.
Pammati a Mangdaer Kadagiti An-annayen
Masapul ti dakkel a pammati ken tured iti biang ni Sunder Lal, maysa nga agtutubo nga agnanaed iti purok ti Punjab, tapno mairanudna ti naimbag a damag ti Pagarian ti Dios iti sabsabali. (Mateo 24:14) Maysa a makagapu isu ti panangpanawna iti politeistiko a pammati ti pamiliana ken ti purokda tapno agdayaw iti pudno a Dios, ni Jehova. Maysa pay, awan gurong ni Sunder Lal.
Agingga idi 1992, gagangay la ti biag ni Sunder Lal. Agtartrabaho kas katulongan ti doktor ken kaduana ti pamiliana nga agdaydayaw iti nagduduma a didiosen iti panangiwanwan ti pinilida a guru. Maysa a rabii, natumba bayat a bumalballasiw iti riles ti tren. Naatalan iti tren ket naputed ti dua a gurongna. Nupay nakalasat, nadadael ti biagna. Nakaaawat no apay a nakaro ti leddaang ni Sunder Lal ken pinanunotna pay ketdi ti agpakamatay. Inandingay ti pamiliana, ngem kasla awan namnama ti masakbayanna.
Idi agangay, adda maysa a Saksi ni Jehova a simmarungkar ken Sunder Lal ket impakita daytoy kenkuana manipud Biblia nga inkari ti Dios a pagbalinenna ti daga a makaay-ayo a paraiso ken itdenna ti perpekto a salun-at iti amin nga agayat ken agbuteng kenkuana. Immannugot ni Sunder Lal nga agadal iti Biblia, ket sipipinget a nagadal iti uneg ti makatawen. Naawis a tumabuno kadagiti Nakristianuan a gimong ket idi kamaudiananna napan babaen ti panagluganna iti likudan ti bisikleta ti gayyemna. Nupay narigatan iti panagbiahena, dakkel ti nagunggonana. Naaddaan iti kompiansa kadagiti personal a naadalna iti Biblia idi makalangenna ti dadduma a tattao a pudpudno a mamati kadagiti kari ti Sao ti Dios ken agbibiag maitunos kadagiti pannursuro ti Biblia.
Rinugian ni Sunder Lal nga iranud ti naimbag a damag kadagiti kaarrubana, ket nabautisaran idi 1995. Idi damo, kas iti gagangay nga ar-aramidenna no agpasiar, agkaradap tapno makakasaba iti binalaybalay iti purokda. Ngem ita, sinagutan dagiti naespirituan a kakabsatna iti traysikel a nadisenio a “pedalen” ti ima. Gapu iti traysikelna, ad-adda ita a makapagwaywayas ken makabiahe a maymaysana iti 12 a kilometro tapno tabunuanna dagiti gimong ti kongregasion. No dadduma, patarayenna ti traysikelna iti laksid ti napigsa a tudo; no dadduma, nasurok nga 43 degrees Celsius ti temperatura.
Malaksid iti pannakigimong, mangikonkondukta ni Sunder Lal iti adu a panagadal iti Biblia kadagiti sabsabali nga agtarigagay iti tulong tapno maaddaanda iti nabileg a pammati iti pudno a Dios, ni Jehova. Kinapudnona, bautisado itan ti pito kadagiti dati nga iyad-adalanna iti Biblia, agraman ti tallo pay a tao a nasarakanna sa inyadalan iti Biblia ti dadduma a Saksi.
Sigun iti Biblia, “ti pammati saan nga ik-ikutan ti isuamin a tattao.” (2 Tesalonica 3:2) Ngem kadagiti “siuumiso a maikari iti agnanayon a biag,” makapabileg iti pammati ti regular a panagadal iti Sao ti Dios. (Aramid 13:48) Ti kasta a panagadal mangted pay iti namnama maipapan iti naisangsangayan a masanguanan—ket umad-adu dagiti tattao idiay India a mamati iti dayta.
[Mapa iti panid 30]
(Para iti aktual a pannakaurnosna, kitaem ti publikasion)
AFGHANISTAN
PAKISTAN
NEPAL
BHUTAN
CHINA
BANGLADESH
MYANMAR
LAOS
THAILAND
VIETNAM
CAMBODIA
SRI LANKA
INDIA
[Credit Line]
Mountain High Maps® Copyright © 1997 Digital Wisdom, Inc.