Report Dagiti Mangiwarwaragawag iti Pagarian
India—“Agkaykaysa iti Laksid ti Panagduduma”
KASTOY ti kuna ti nalatak a pagsasao a mangiladawan iti panagkaykaysa iti pagilian ti India: “Agkaykaysa iti Laksid ti Panagduduma.” Saan a nalaka a magun-od ti panagkaykaysa iti daytoy naglawa a pagilian nga addaan iti nagduduma a kultura, pagsasao, relihion, puli, kawes, ken taraon. Ngem makita ti kasta a panagkaykaysa iti opisina dagiti Saksi ni Jehova idiay India, nupay dagiti boluntario nga agnanaed ken agtartrabaho sadiay ket naggapu iti adu nga estado ken napagtipon a teritoria ken agsasaoda iti nagduduma a lenguahe.
• Am-ammuentayo ni Rajrani—agtutubo a balasang iti Punjab, iti ungto ti amianan a laud ti India. Idi ages-eskuela pay ni Rajrani, adda kaeskuelaanna a nakipagadal iti Biblia kadagiti Saksi ni Jehova. Pinadas daytoy a balasitang nga allukoyen ni Rajrani nga agadal iti Biblia. Gapu ta saan unay a makaawat iti Ingles ti kaeskuelaanna ken saan pay idi a maipatpatarus Ti Pagwanawanan iti Punjabi, kiniddawna nga ipatarus kenkuana ni Rajrani dagiti linaon ti magasin. Kasta unay ti pannakatukay ni Rajrani kadagiti nabasana iti Ti Pagwanawanan nga uray la nga indedikarna ti biagna ken Jehova a Dios iti laksid ti panangbusor dagiti dadakkelna. Kas maysa nga agserserbi ita iti Bethel idiay India, ar-aramidenna ti trabaho a nanglukat kadagiti matana iti kinapudno. Ipatpatarusna dagiti Nakristianuan a publikasion iti Punjabi!
• Usigentayo met ni Bijoe, a naggapu iti sabali a deppaar ti India—iti abagatan a laud nga estado ti Kerala. Naikkat idiay eskuelaan idi haiskul gapu iti neutral a takderna kadagiti nasionalistiko a seremonia. Kalpasan ti nabayag a pannakabista ti kasona iti korte a nagngudo iti nakallalagip a panagbiktoria para iti nasin-aw a panagdayaw, nakasubli ni Bijoe iti eskuelaan.a Nakapagkolehio pay. Ngem ti nalulok a kasasaad idiay eskuelaan ti nangburibor iti konsiensiana isu nga insardengna ti nageskuela uray sumagmamano a bulanna pay laeng iti kolehio. Ita, kalpasan ti sangapulo a tawenna iti Bethel, mariknana a ti panagbalinna a kameng ti nagdudumat’ nagtaudanna ngem nagkaykaysa a pamilia ti Bethel ket ad-adda a nagimbaganna no idilig iti naragpatna koma no nagtultuloy iti sekular nga edukasionna.
• Agpada da Norma ken Lily nga agtawen iti nasurok a 70 ken nabalo iti adu a tawen. Pareho a nasurok nga 40 a tawen ti nabusbosda iti amin-tiempo a panagserbi. Agarup 20 a tawenen nga agtartrabaho ni Lily iti sanga nga opisina kas managipatarus iti Tamil a pagsasao. Adda 13 a tawenen ni Norma iti Bethel sipud idi nabalo. Malaksid iti panagbalinda a nasayaat nga ulidan iti kinagaget ken kinapasnek iti trabaho, makatulong ti impluensiada iti panagkaykaysa ti intero a pamilia ti Bethel. Pagragsakanda ti mangsangaili kadagiti bisita, ken magustuanda ti makilangen kadagiti ub-ubing a kameng ti pamilia, nga iranranudda ti rag-o ti maysa a nabayagen nga agbibiag kas Kristiano. Subadan met dayta dagiti ub-ubing a kapamiliada babaen ti panangawis dagitoy kadakuada kadagiti kuartoda tapno aglalangenda wenno mangipaay iti tulong no kasapulan. Pudno a nagsayaat nga ulidan!
Gapu ta napagballigianda dagiti di panagtutunos a mamataud iti riri ken susik iti adu a lugar, naragsak nga agtartrabaho a sangsangkamaysa dagitoy a boluntario kas kameng ti nagkaykaysa a pamilia ti Bethel idiay India tapno mapagserbianda ti sabsabali.—Salmo 133: 1.
[Footnote]
[Picture Credit Line iti panid 8]
Background: Mountain High Maps® Copyright © 1997 Digital Wisdom, Inc.