Maymaysa Kadi ti ‘Pudno a Relihion’?
“NO KASANO nga adda maymaysa a Kristo, adda ngarud maymaysa a bagi ni Kristo, maymaysa a Nobia ni Kristo: ‘maymaysa nga Iglesia Katolika ken apostoliko.’”—Dominus Iesus.
Kasta ti kuna ti maysa a Romano Katoliko a kardinal, a ni Joseph Ratzinger, maipapan iti isursuro ti simbaanna nga adda laeng maymaysa a pudno nga iglesia wenno relihion. Kinunana a dayta nga iglesia ket “maymaysa nga Iglesia ni Kristo, nga isu ti Iglesia Katolika.”
“Saan a Talaga nga Iglesia”
Nupay impetteng ni Papa Juan Paulo II a ti dokumento a Dominus Iesus ket “saan a panangipababa, wenno di panagraem, kadagiti sabali a relihion,” nainget a binabalaw dayta dagiti lider ti iglesia Protestante. Kas pagarigan, iti Presbyterian General Assembly idiay Belfast, iti Makin-amianan nga Ireland, idi Hunio 2001, kinuna ti maysa a ministro a ti dokumento ket aramid ti “maysa a nabileg a partido iti Iglesia Romana Katolika . . . a napabutngan gapu iti kinaprangka a naaramid iti Vatican II.”
Ni Robin Eames, ti nagkauna nga obispo iti Church of Ireland, kinunana a “dakkel a pakaupayanna” no ti dokumento ket “maysa a panangbaliw iti kapanunotan ti iglesia sakbay ti Vatican II.” Iti komentona mainaig iti kinuna ti Vatican a “saan a talaga nga Iglesia” dagiti relihion a nangilaksid iti dadduma a doktrina ti Katolika, kinuna ni Eames: “Makapainsulto dayta kaniak.”
Apay a naaramid ti Dominus Iesus? Agparang a nariribukan ti Curia ti Romana Katolika gapu iti makuna a narelihiosuan a relatibismo (ti pammati nga awan ti masnup a narelihiosuan a pagalagadan). Sigun iti The Irish Times, “ti itataud ti pluralismo—nga agkuna a nasayaat ti amin a relihion . . . binuriborna ni Kardinal Ratzinger.” Agparang a dayta a panangmatmat ti makagapu a nagkomento maipapan iti maymaysa a pudno a relihion.
Napateg Kadi No Ania a Relihion ti Nakaitimpuyogam?
Siempre, kadagiti dadduma, ti “narelihiosuan a relatibismo” wenno “pluralismo” ket ad-adda a rasonable ken makaay-ayo ngem iti aniaman a kapanunotan nga adda laeng maymaysa a pudno a relihion. Kadakuada, ti indibidual ti agpili no ania ti kayatna a relihion. ‘Gapuna,’ kunada, ‘saan a talaga a napateg no ania a relihion ti nakaitimpuyogam.’
Agparang a napanuynoy dayta a panangmatmat—nupay ti maysa a resultana ket pannakabingaybingay ti relihion iti nagadu a nagduduma a denominasion. ‘Ti kasta a panagduduma ti relihion,’ kuna ti adu, ‘ket umiso laeng nga ebkas ti wayawaya ti maysa a tao.’ Ngem sigun ken ni mannurat nga Steve Bruce, ti kasta a “narelihiosuan a panangpanuynoy” ket, kinapudnona, maysa a “narelihiosuan a panangyaleng-aleng.”—A House Divided: Protestantism, Schism, and Secularization.
Ania ngarud ti umiso a panangmatmat? Maymaysa kadi ti pudno a relihion? Isu ngata dayta ti Iglesia Romana Katolika? Anamongan kadi ti Dios dagiti dadduma pay a relihion? Yantangay dagitoy a saludsod ket mainaig iti relasiontayo iti Namarsua kadatayo, sigurado a napateg nga ammuentayo ti panangmatmatna maipapan iti dayta a banag. Kasanotayo a maaramid dayta? Babaen ti panangsukimattayo iti naipaltiing a Sao ti Dios, ti Biblia. (Aramid 17:11; 2 Timoteo 3:16, 17) Usigentayo no ania ti ibagana maipapan iti maymaysa a pudno a relihion.
[Picture Credit Line iti panid 2]
AKKUB: Mark Gibson/Index Stock Photography