Dagiti Nagturpos iti Gilead Naiparegta a Sawenda Dagiti “Natan-ok a Bambanag”
MANIPUD iti 52 a pagilian, adda naragsak nga 6,635 a timmabuno iti panagturpos ti maika-115 a klase ti Watchtower Bible School of Gilead idi Setiembre 13, 2003.
Nangngegda ti naibatay-Biblia a pammaregta para kadagiti 48 nga estudiante ti klase tapno maidanonda dagiti “natan-ok a bambanag ti Dios” kadagiti tattao iti 17 a pagilian. (Aramid 2:11) Kadagita a pagilian nga agserbi kas misionero dagiti nagturpos.
Iti panglukat a sasao ni Stephen Lett, kameng ti Bagi a Manarawidwid dagiti Saksi ni Jehova ken nagserbi kas tserman ti panagturpos, impalagipna kadagiti estudiante: “Inton mapankayo kadagiti teritoriayo, sadinoman ti papananyo wenno aniaman dagiti mapasaranyo, ad-adu dagiti tumulong kadakayo ngem dagiti bumusor kadakayo.” Inusar ni Kabsat Lett ti kapitulo 6 ti Maikadua nga Ar-ari tapno ipalagipna kadagiti estudiante a mabalinda ti agpannuray iti tulong ni Jehova a Dios ken dagiti linaklaksa nga anghel bayat nga ipakaammoda dagiti “natan-ok a bambanag ti Dios.” (2 Ar-ari 6:15, 16) Dagiti Kristiano idi umuna a siglo naipasangoda iti ibubusor ken panangyaleng-aleng bayat a nangasaba ken nangisuroda, ket kasta met ti mapasaran dagiti Kristiano a misionero ita. Nupay kasta, manamnamada ti tulong manipud langit ken iti organisasion ni Jehova ditoy daga.—Salmo 34:7; Mateo 24:45.
Sawenyo Dagiti “Natan-ok a Bambanag ti Dios”
Kalpasan ti panglukat a palawag ti tserman, ni Harold Corkern a kameng ti Branch Committee iti Estados Unidos, impalawagna ti tema a “Dagiti Realistiko a Namnamaen—Tulbek iti Narag-o ken Naballigi a Panagserbi.” Impaganetget ni Kabsat Corkern a mabalin a makaupay dagiti di natungpal nga inanamaen, kas ipakita ti Proverbio 13:12. Nupay kasta, ti pannakaupay ket masansan a resulta dagiti natungday a di realistiko a namnamaen. Dagiti nagturpos nasken a maaddaanda iti natimbeng, realistiko a panangmatmat iti bagbagida ken kadagiti sabsabali. Rumbeng a namnamaenda nga agkamalida no dadduma, ngem saan koma a daytoy ti mamagladingit unay kadakuada bayat nga ikagumaanda a tulongan dagiti sabsabali a mangtarus kadagiti “natan-ok a bambanag ti Dios.” Ni Kabsat Corkern pinaregtana dagiti kabbaro a misionero nga agpannurayda ken ni Jehova, ti “mananggunggona kadagidiay sipapasnek a mangsapsapul kenkuana.”—Hebreo 11:6.
Simmaruno iti programa ni Daniel Sydlik, maysa a kameng ti Bagi a Manarawidwid, a nangipalawag iti tema a “Ti Nakristianuan a Namnama—Ania Dayta?” Kinunana: “Ti namnama ket maysa a Nakristianuan a galad. Maysa dayta a pagalagadan ti kinalinteg a tumulong tapno maaddaan ti maysa a tao iti nasayaat a relasion iti Dios. Saan a kas kadatayo, awan ti kasta a namnama ti maysa a di Kristiano.” Dineskribir ni Kabsat Sydlik ti nagduduma nga aspeto ti Nakristianuan a namnama a tumulong iti maysa nga agtultuloy a manginanama uray adda dagiti pakarigatan iti biag. “No addaantayo iti namnama, makapagbiagtayo iti inaldaw nga addaan iti napabaro a kinaanep ken determinasion.” Ti namnama ti maysa a Kristiano tumulong kenkuana a mangmatmat ken ni Jehova kas maysa a Dios nga addaan panggep ken tapno maragsakan nga agserbi kenkuana.—Roma 12:12.
Ni Wallace Liverance, registrar ti Gilead School, imparegtana kadagiti estudiante nga “Agtultuloy a Magna Babaen ti Espiritu.” (Galacia 5:16) Inlawlawagna no kasano a ni Baruc, ti sekretario ni Jeremias, nganngani naiwawa manipud iti pannagna babaen ti espiritu. Adda gundaway a napakil ni Baruc ket nangrugi a sinapulna dagiti dadakkel a pagimbaganna. (Jeremias 45:3, 5) Kalpasanna, impaganetget ni Kabsat Liverance nga adda dagiti nagsardeng a sumurot ken ni Jesus ken linaksidda ti naespirituan a kinapudno, a napateg iti pannakaisalakan. Saanda ngamin a natarusan ti isursurona, ken naupayda ta saan a natungpal dagiti nainlasagan nga inanamaenda iti dayta a gundaway. (Juan 6:26, 27, 51, 66) Manipud iti daytoy a salaysay, ania ti masursuro dagiti misionero, a ti trabahoda ket mangiturong iti atension iti Namarsua ken iti panggepna? Naiparegta kadagiti estudiante a dida koma pakaseknan ti pananggun-od iti akem, umawat iti pammadayaw manipud kadagiti tattao, wenno usaren ti maysa a nateokratikuan nga annongen para iti personal a pagimbagan.
“Manangtedkayto Kadi Wenno Manangawat?” Dayta ti paulo ti palawag ti instruktor ti Gilead a ni Mark Noumair. Imbasarna ti komentona iti Uk-ukom 5:2, maipapan kadagiti Israelita a napadayawan gapu ta situtulokda a nagboluntario nga agserbi kas buyot ni Barak. Nakomendaran dagiti estudiante ti Gilead gapu iti kinatulokda nga agtignay iti ayab ti Dakdakkel a Barak, ni Jesu-Kristo, tapno makiramanda nga ad-adda iti naespirituan a dangadang. Dagiti soldado ni Kristo nasken nga interesadoda iti pananggun-od iti anamong daydiay nangayab kadakuada. Impalagip ni Kabsat Noumair kadagiti estudiante: “No mangrugi nga ipangpangrunatayo ti bagitayo, arigna a nagsardengtayo a makidangadang iti kabusor. . . . Saan a maipapan kenka ti panagmisionero. Maipapan dayta ken ni Jehova, iti kinasoberanona, ken iti pannakatungpal ti panggepna. Saantayo nga agmisionero tapno maparagsaknatayo ni Jehova. Agserbitayo kenkuana gapu ta ay-ayatentayo.”—2 Timoteo 2:4.
Ti instruktor ti Gilead a ni Lawrence Bowen indauluanna ti simmaganad a paset a “Santipikarem Ida Babaen ti Kinapudno.” (Juan 17:17) Inlawlawagna a nasantipikar a ministro ti Dios dagiti estudiante ti maika-115 a klase. Bayat ti panageskuelada, nakiramanda met iti ministerio iti tay-ak, a sinapulda dagiti nasingpet-panagpuspusoda a tattao a managayat iti kinapudno. Kas ken ni Jesus ken dagiti nagkauna nga adalan, dagiti estudiante saanda a nagsao iti ‘bukodda a pannakatignay.’ (Juan 12:49, 50) Sireregta nga imparangda ti naipaltiing, mangted-biag a sao ti kinapudno. Ti panangisalaysay ken panangidemostra dagiti estudiante kadagiti kapadasanda impakitana ti nabileg nga epekto ti Biblia kadagidiay nakasabaanda.
Makaparegta Dagiti Balakad ken Kapadasan
Da Anthony Pérez ken Anthony Griffin, a kameng ti Service Department ti sanga nga opisina ti Estados Unidos, ininterbiuda dagiti kameng ti Branch Committee iti nadumaduma a pagilian. Nagsasaritaanda dagiti karit a sanguen dagiti baro a misionero ken nangipaayda kadagiti praktikal a balakad a naibatay iti personal a kapadasan. Karaman kadagita a karit dagiti panagduduma ti kultura, tropikal a klima iti intero a tawen, wenno narelihiosuan ken napolitikaan a kasasaad a naiduma iti nakairuaman dagiti estudiante. Ania ti tumulong kadagiti baro a misionero tapno mairuamda iti baro nga aglawlaw? Ti panagayat ken ni Jehova, panagayat kadagiti tattao, di panunoten ti panagsubli, ken di panagtignay a sidadarasudos. Kinuna ti maysa a kameng ti komite ti sanga nga opisina: “Dagiti tattao iti pagilian a nakaibaonanmi sinigsiglon nga agnanaedda sadiay sakbay pay ti isasangpetmi. Sigurado a mabalinmi met ti agnaed ken mairuam sadiay. No adda pakarigatanmi, matmatanmi dagita kas gundaway tapno mapasayaat ti kababalinmi. Agpannuraykayo iti kararag ken iti espiritu ni Jehova, ket mapasaranyo ti kinapudno dagiti sasao ni Jesus, ‘Addaak kadakayo.’”—Mateo 28:20.
Ni Samuel Herd, maysa a kameng ti Bagi a Manarawidwid, imparangna ti tampok ti programa babaen ti palawagna nga, “Itultuloyyo a Sawen Dagiti Natan-ok a Bambanag ti Dios.” Ti pannakaiparukpok ti nasantuan nga espiritu idi aldaw ti Pentecostes 33 K.P. pinabilegna dagiti adalan ni Jesus tapno sawenda dagiti “natan-ok a bambanag ti Dios.” Ania ti makatulong kadagiti baro a misionero ita nga agsao buyogen ti umasping a regta maipapan iti Pagarian ti Dios? Ti isu met laeng a nasantuan nga espiritu. Pinaregta ni Kabsat Herd dagiti nagturpos nga agbalinda koma a ‘nasged iti espiritu,’ a maaddaanda iti gagar maipapan iti teritoriada, a dida liplipatan ti pannakasanay a naipaay kadakuada. (Roma 12:11) “Ti Biblia ket maysa a natan-ok a banag ti Dios,” kinuna ni Kabsat Herd. “Diyo pulos tagibassiten ti pategna. Nabiag ti mensahena. Salputenna ti kaunggan a paset ti bambanag. Usarenyo dayta a mangpalinteg kadagiti bambanag iti biagyo. Ipalubosyo a balbaliwanna ti panagpampanunotyo. Saluadanyo ti abilidadyo nga agpanunot babaen ti panangadal, panangbasa, ken panangmennamenna iti Kasuratan . . . Aramidenyo a kalat ken determinasion ti panangusar iti pannakasanayyo iti Gilead a mangitultuloy a mangipakaammo kadagiti ‘natan-ok a bambanag ti Dios.’”
Kalpasan ti pannakabasa dagiti kablaaw a naggapu iti nadumaduma a pagilian ken ti pannakaited dagiti diploma, maysa kadagiti nagturpos ti nangbasa iti surat ti klase a mangyebkas iti apresasion iti naawatda a pannakasanay. Kalpasanna, ingngudo ni Kabsat Lett ti naragsak nga okasion babaen ti panangtukoy iti 2 Cronicas 32:7 ken Deuteronomio 20:1, 4. Iti pananginaigna iti naudi a sasaona iti panglukat a sasaona, ingngudona: “Gapuna, patgenmi a nagturpos, laglagipenyo a bayat ti panagserbiyo, bayat ti panagmartsayo iti naespirituan a dangadang iti baro a teritoriayo, adda ni Jehova a makipagmartsa kadakayo. Saanyo pulos a liplipatan ti kinapudno nga ad-adu dagiti tumulong kadakayo ngem dagiti bumusor kadakayo.”
[Kahon iti panid 25]
ESTADISTIKA TI KLASE
Bilang dagiti pagilian a nairepresentar: 7
Bilang dagiti pagilian a pakaibaonan: 17
Bilang dagiti estudiante: 48
Promedio nga edad: 33.7
Promedio a tawen iti kinapudno: 17:8
Promedio a tawen iti amin-tiempo a ministerio: 13.5
[Ladawan iti panid 26]
Ti Maika-115 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.