Malagipyo Pay?
Nagustuanyo met laeng kadi a binasa dagiti nabiit pay a ruar Ti Pagwanawanan? Apay a diyo padasen no masungbatanyo dagiti sumaganad a saludsod?
• Ania ti Complutensian Polyglot, ken apay a napateg dayta?
Maysa dayta a nayimprenta a Biblia a naglaon kadagiti agbibinnatog a teksto iti agduduma a lenguahe. Maibilang dayta kas ti kasayaatan idi a teksto iti Hebreo, Griego, ken Latin, agraman ti sumagmamano a paset iti Aramaico. Ti Biblia a polyglot ket maysa a dakkel nga addang iti panangpataud iti maysa a napasudi a teksto kadagiti orihinal a lenguahe.—4/15, panid 28-31.
• Kasano a dagiti tattao maparagsakda ti Dios?
Kas maysa a pudno a sibibiag a persona, ni Jehova kabaelanna ti agpanunot, agtignay, ken mangrikna. Isu “ti naragsak a Dios” ken maragsakan a mangitungpal iti panggepna. (1 Timoteo 1:11; Salmo 104:31) No ad-adda a maawatantayo ti rikna ti Dios, ad-adda a panunotentayo no ania ti mabalintayo nga aramiden a mangparagsak iti pusona.—5/15, panid 4-7.
• Apay a ni David pinalubosanna ti asawana a ni Mical a maaddaan iti ladawan a terafim?
Idi ginandat ni Ari Saul a papatayen ni David, tinulongan ni Mical tapno makalibas, nga inkabilna iti sopa ti maysa a ladawan a nalabit sukog ti maysa a tao. Ni Mical ket addaan iti terafim agsipud ta nalabit a saan a naan-anay ti debosionna iti Dios. Nalabit a saan nga ammo ni David ti maipapan iti dayta wenno impalubosna agsipud ta ni Mical ket anak ni Ari Saul. (1 Cronicas 16:25, 26)—6/1, panid 29.
• Ania a pamunganayan a kinapudno ti itampok dagiti linteg ti Dios maipapan iti dara?
Babaen ti impaulog ti Dios kalpasan ti Layus, iti Linteg Mosaiko, ken iti bilin a masarakan iti Aramid 15:28, 29, itampokna kadatayo ti daton mainaig iti naiparukpok a dara ni Jesus. Babaen laeng iti dayta a dara a magun-odtayo ti pammakawan ken maikappiatayo iti Dios. (Colosas 1:20)—6/15, panid 14-19.
• Mano a milagro ni Jesus ti nadakamat iti Biblia?
Ti salaysay dagiti Ebanghelio tukoyenna ti 35 a milagro ni Jesus. Ngem saan a naipalgak ti eksakto a bilang dagiti milagro ni Jesus, agraman dagiti saan a naipakaammo. (Mateo 14:14)—7/15, panid 5.