Pinaragsakda ti Puso Dagiti Dadakkelda
“ANAKKO, no ti pusom nagbalin a masirib, ti pusok agrag-onto, siak a mismo.” (Proverbio 23:15) Pudno a maragsakan dagiti Kristiano a nagannak no magun-od dagiti annakda ti nadiosan a sirib. Idi Sabado, Setiembre 10, 2005, adda 6,859 manipud iti nadumaduma a pagilian a timmabuno iti panagturpos ti maika-119 a klase ti Watchtower Bible School of Gilead. Napalaus ti ragsak ti isuamin, nangnangruna dagiti nagannak dagiti 56 nga estudiante nga agturpos.
Ni David Walker, maysa a nabayagen a kameng ti pamilia ti Bethel iti Estados Unidos, linuktanna ti programa babaen ti maysa a naimpusuan a kararag. Kalpasanna, ti tserman a ni David Splane, kameng ti Bagi a Manarawidwid dagiti Saksi ni Jehova, rinugianna ti programa babaen ti panangikunana kadagiti amma ken inna: “Maikarikayo iti naimpusuan a komendasionmi. Gapu kadagiti galad nga immulayo kadagiti annakyo, natignayda a sumrek iti trabaho a kinamisionero.” Mabalin a madanagan dagiti nagannak yantangay asidegen a mapan dagiti annakda kadagiti adayo a lugar a pakaibaonanda. Nupay kasta, impatalged kadakuada ni Kabsat Splane: “Diyo pakadanagan dagiti annakyo. Adayo a nasaysayaat a maaywanan ida ni Jehova ngem dakayo.” Kalpasanna kinunana: “Panunotenyo dagiti naimbag a bambanag a magapuanan dagiti annakyo. Makagun-odto iti pudno a pannakabang-ar dagiti tattao nga agsagsagaba.”
No Kasano nga Agtultuloy a Mairanud ti Rag-o Kadagiti Sabsabali
Ti tserman inyam-ammona ti uppat nga ispiker. Umuna, ni Ralph Walls, kameng ti Komite ti Sanga iti Estados Unidos, impalawagna ti tema a “Taginayonenyo a Silulukat Dagiti Matayo.” Impaganetgetna a dakdakes nga amang ti naespirituan a kinabulsek ngem iti pisikal a kinabulsek. Ti kongregasion ti Laodicea idi umuna a siglo ket nagbalin a bulsek iti naespirituan. Nupay naipaayan iti tulong dagita a Kristiano iti dayta a kongregasion, adayo a nasaysayaat latta no maliklikan ti matnag iti kasta a kinabulsek babaen ti panangtaginayon a silulukat dagiti matatayo. (Apocalipsis 3:14-18) Kinuna ti ispiker: “Taginayonenyo a nakalukat dagiti matayo, ket matmatanyo dagiti addaan annongen a lallaki a kas iti panangmatmat kadakuada ni Jehova.” Dagiti agturpos dida koma madanagan unay no adda dagiti parikut iti kongregasion. Ammo ni Jesu-Kristo ti amin a mapaspasamak. Siguraduenna a mataming dagita a bambanag iti umiso a tiempo.
Kalpasanna, ni Samuel Herd a kameng ti Bagi a Manarawidwid sinungbatanna ti saludsod a “Nakasaganakayo Kadi?” No kasano a ti maysa a managdaliasat mangitugot kadagiti kasapulanna a kawes, dagiti agturpos nasken a kanayon a kawesanda ti bagida kadagiti galad ti baro a personalidad. Masapul a naasida a kas ken ni Jesus. Idi kinuna kenkuana ti maysa nga agkukutel: “No kayatmo laeng koma, kabaelannak a dalusan,” kinuna ni Jesus: “Kayatko. Madalusanka koma.” (Marcos 1:40-42) Kalpasanna kinuna ti ispiker: “No talaga a kayatyo a matulongan dagiti tattao, ipamuspusanyo dayta.” Ti Filipos 2:3 ibagana kadagiti Kristiano nga ibilangda a ‘nangatngato ti dadduma ngem kadakuada.’ Kinuna ni Kabsat Herd: “Ti napakumbaba a puso ket napatpateg ngem iti pannakaammo. Dagidiay makasaritayo iti ministerio ken dagiti kakabsatyo iti kongregasion magunggonaanda laeng iti pannakaammo nga ik-ikutanyo no napakumbabakayo.” Inngudona ti palawagna babaen ti panangikunana a no dagiti agturpos itultuloyda nga ikawes ti Nakristianuan nga ayat, nakasaganadan a mapan kadagiti pakaibaonanda, ket sigurado nga agballigida.―Colosas 3:14.
Ni Mark Noumair, maysa kadagiti instruktor ti Gilead, pinagagarna dagiti agdengdengngeg babaen ti paulo ti palawagna, “Taginayonenyo Kadi Dayta?” Ti “Dayta” tukoyenna ti panangipategtayo iti kinaimbag ni Jehova. Kuna ti Salmo 103:2: “Bendituem ni Jehova, O kararuak, ket dika lipaten dagiti amin nga aramidna.” Impakita dagiti Israelita ti kinaawan panagyamanda iti manna a nangsustener iti biagda, nga inawaganda dayta kas “ti uumsien a tinapay.” (Numeros 21:5) Iti panaglabas ti tiempo, saan a nagbaliw ti pateg ti manna, ngem napukaw ti panangipategda iti dayta. Kinuna ti instruktor: “No lipatenyo dagiti aramid ni Jehova ket palubosanyo nga agbalin laengen a gagangay ti panagserbiyo iti sabali a pagilian, maapektaran ti panangmatmatyo iti trabaho nga intalek kadakayo ni Jehova.” Sigun iti Salmo 103:4, ni Jehova ‘korkoronaannakayo iti naayat a kinamanangngaasi.’ Dagiti agturpos matagiragsakdanto ti naayat a kinamanangngaasi ti Dios iti baro a kongregasionda.
Ti sabali pay nga instruktor iti Gilead, ni Lawrence Bowen, impalawagna ti suheto nga “Matagiragsakyonto Kadi Dagiti Bendision?” Kinunana a dagiti kameng ti maika-119 a klase ti Gilead inggaedda ti nagsanay tapno agballigida kas misionero. Ngem ita, nasken nga agtalinaedda ken ni Jehova ken iti trabaho nga impaannongna kadakuada. Iti Apocalipsis 14:1-4, nailadawan dagiti 144,000 kas “dagidiay agtultuloy a sumursurot iti Kordero iti uray sadino a papananna.” Agtultuloy a nasungdo ken ni Jehova ken iti Anakna ti amin a kameng dayta a grupo aniaman dagiti pakasuotanda, isu a maragpatda ti kalatda. “Aniaman ti mapasamak, agtalinaedtayo met a nasungdo ken ni Jehova ken iti trabaho nga impaannongna kadatayo,” kinuna ti ispiker. No kasta ti aramiden dagiti agturpos, makitadanto a ‘kamakamen’ ida dagiti bendision ni Jehova.―Deuteronomio 28:2.
Panagbalin a Nabunga iti Panagserbida
Tunggal ngudo ti lawas kabayatan ti panageskuelada, nakiraman dagiti estudiante iti tay-ak ti ministerio. Idi kinasarita ida ti registrar ti eskuelaan a ni Wallace Liverance kabayatan ti programa, agminar ti balligida. Naikasabada ti naimbag a damag iti di kumurang a sangapulo a lenguahe ken nakairugida iti sumagmamano a panagadal iti Biblia. Maysa nga agassawa iti klase ti nakairugi a nangyadal iti Biblia iti maysa a Tsino. Kalpasan ti dua a panagsarungkar, dinamagda kenkuana no ania ti mariknana a naam-ammona ni Jehova. Linuktanna ti Bibliana ket kiniddawna kadakuada a basaenda ti Juan 17:3. Iti panagriknana, isu ket magmagnan iti dalan ti biag.
Ni Anthony Morris a kameng ti Bagi a Manarawidwid ininterbiuna ti tallo a kakabsat nga agserserbi kadagiti Komite ti Sanga idiay Côte d’Ivoire, Dominican Republic, ken Ecuador. Dagitoy a kakabsat impasiguradoda kadagiti agturpos a padpadaanan dagiti Komite ti Sanga ti isasangpetda ken tulonganda ida a makibagay kadagiti teritoria a pakaibaonanda.
Kalpasanna, ni Leonard Pearson a kameng ti pamilia ti Bethel iti Estados Unidos kinasaritana ti tallo a kameng ti Komite ti Sanga manipud iti Democratic Republic of the Congo, Papua New Guinea, ken Uganda. Dagitoy a kakabsat imparegtada kadagiti agturpos a nasken a naan-anay a makipasetda iti tay-ak ti ministerio. Maysa nga agassawa a misionero a nasurok a 21 a tawenen nga agserserbi idiay Congo ti nakatulong iti 60 a tattao nga agdedikar ken agbautisar. Dayta nga agassawa ti mangikonkondukta ita iti 30 a panagadal iti Biblia, ken 22 kadagiti iyad-adalanda ti tumabtabuno kadagiti gimong ti kongregasion. Gapu iti kasta kaadu a naespirituan a maani, nagsayaat ita a gundaway tapno agserbi kas misionero.
Panangsaksi Buyogen ti Espiritu ti Kinaganat
Ni Gerrit Lösch a kameng ti Bagi a Manarawidwid imparangna ti maudi a palawag. Ti temana ket “Panangisarita Maipapan iti Dios ken Panangsaksi ken ni Jesus Kabayatan ti Aldaw ti Apo.” Iti libro nga Apocalipsis, 19 a daras a nadakamat dagiti sasao a nagtaud iti sao a “saksi.” Gapuna, nalawag no ania a trabaho ti kayat ni Jehova nga ipaaramid kadagiti adipenna. Kaanotay a makipaset iti dayta a panangsaksi? Kabayatan “ti aldaw ti Apo.” (Apocalipsis 1:9, 10) Nangrugi dayta nga aldaw idi 1914, a nagtultuloy agingga iti tiempotayo, ken agtultuloy agingga iti masanguanan. Sigun iti Apocalipsis 14:6, 7, dagiti anghel tumultulongda iti trabaho a panangipakaammo maipapan iti Dios. Ipakita ti Apocalipsis 22:17 a naitalek kadagiti napulotan a Kristiano ti annongen a panangidaulo iti trabaho a panangsaksi ken ni Jesus. Ngem masapul a gundawayantayo amin ita dayta a pribilehio. Iti bersikulo 20, nailanad ti kinuna ni Jesus: “Umayak a sidadaras.” Indagadag ni Kabsat Lösch kadagiti amin a dimmar-ay: “Ibagayo kadagiti tattao, ‘Umaykayo, awatenyo ti danum ti biag nga awan bayadna.’ Umay a sidadaras ni Jesus. Nakasaganatayo kadi?”
Ni Fred Rusk, a nagserbi met idi kas instruktor iti Eskuelaan ti Gilead iti 11 a tawen, ingngudona ti programa babaen ti maysa a kararag ti panagyaman ken ni Jehova a nangtukay iti puso dagiti amin a timmabuno. Maitutop la ketdi dayta a pangserra iti aldaw a napno iti rag-o.
[Kahon iti panid 13]
ESTADISTIKA TI KLASE
Bilang dagiti pagilian a nairepresentar: 10
Bilang dagiti pagilian a pakaibaonan: 25
Bilang dagiti estudiante: 56
Promedio nga edad: 32.5
Promedio a tawen iti kinapudno: 16.4
Promedio a tawen iti amin-tiempo a ministerio: 12.1
[Ladawan iti panid 15]
Ti maika-119 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.