Pakasaritaan ti Biag
Maysa a Karit ken Rag-o ti Panangpadakkel iti Walo nga Annak Maitunos Kadagiti Daldalan ni Jehova
KAS INSALAYSAY NI JOYCELYN VALENTINE
Idi 1989, nagtrabaho ni lakayko iti sabali a pagilian. Inkarina a mangipatulod iti kuarta tapno maaywanak dagiti walo nga annakko. Naglabas ti lawlawas, ngem awan ti nadamagko maipapan kenkuana. Naglabas ti bulbulan ngem kaskasdi a diak nakasarita ni lakayko. Intultuloyko a liniwliwa ti bagik, ‘Agawidto met laeng apaman a sumayaat ti kasasaadna.’
GAPU ta awan ti kuarta a pangbiagko iti pamiliak, maaw-awananakon iti namnama. Bayat ti adu a rabii a diak pannakaturturog, napanunotko, ‘Apay a naaramidna daytoy iti pamiliana?’ Nagangayanna, naawatko met laeng ti nasaem a kinapudno a binaybay-annakamin ni lakayko. Ita, agarup 16 a tawenen kalpasan ti panangpanawna kadakami, saan latta a nagsubli ni lakayko. Pinadakkelko ngarud dagiti annakko kas agsolsolo nga ina. Narigat dayta iti biangko, ngem nangyeg kaniak iti dakkel a rag-o ti pannagna dagiti annakko kadagiti daldalan ni Jehova. Ngem sakbay nga isalaysayko no ania ti napasamak iti pamiliami, bay-anyo nga isalaysayko ti nalikudak.
Panangsapul iti Giya ti Biblia
Naipasngayak idi 1938 idiay Jamaica, maysa nga isla iti Caribe. Nupay saan a kameng ni Tatang iti aniaman a relihion, imbilangna ti bagina a managbuteng iti Dios. No rabii, masansan a kiddawenna nga ibasak kenkuana ti Salmo a libro ti Biblia. Di nagbayag, kabesadokon ti adu a salmo. Ni Nanang ket kameng ti maysa a lokal a relihion, ken pasaray nga ikuyognak a tumabuno kadagiti narelihiosuan a taripnong.
Kadagidi a taripnong, naibaga kadakami a ti Dios alaenna idiay langit dagiti naimbag a tattao ken agnanayon a puoranna idiay impierno dagiti dakes a tattao. Naibaga pay a ni Jesus isu ti Dios ken ipatpategna dagiti ubbing. Natikawak ken nagbutengak iti Dios. Napanunotko, ‘Kasano a ti Dios a mangay-ayat kadatayo tutuokenna dagiti tattao iti apuy?’
Nagbalin a pagam-amkak ti kapanunotan maipapan iti impierno. Idi agangay, nagadalak iti Biblia babaen ti correspondence course nga inisponsoran ti Seventh-Day Adventist Church. Insuroda a dagiti dakes a tattao saanda a matutuok nga agnanayon no di ket mauramda agingga nga agbalinda a dapo. Kasla ad-adda a rasonable dayta, ket rinugiak ti nakigimong kadakuada. Ngem makariro latta dagiti sursuroda, ken dida nailinteg dagiti biddut a panangmatmatko iti moralidad.
Kadagidi a tiempo, matmatan ti kaaduan a tattao a dakes ti pannakiabig. Ngem adu kadakami ti mamati a dagidiay laeng aduan iti karelasion ti maibilang a mannakiabig. Gapuna, saan a basol no agdenna ti dua a di agassawa la ketdi ta awan ti sabali pay a kadendenna ti asinoman kadakuada. (1 Corinto 6:9, 10; Hebreo 13:4) Dayta a patpatien ti maysa a makagapu no apay a nagbalinak nga ina ti innem a bastardo nga ubbing.
Ti Panagrang-ayko iti Naespirituan
Idi 1965, da Vaslyn Goodison ken Ethel Chambers nagnaedda iti kabangibang a komunidad ti Bath. Payunirda, wenno amin-tiempo a ministro dagiti Saksi ni Jehova, ket naminsan nakasaoda ni tatangko. Immannugot ni Tatang a makipagadal kadakuada iti Biblia. No addaak iti pagtaenganmi no bumisitada, kasaritadak met. Nupay pinagduaduaak unay dagiti Saksi ni Jehova, inkeddengko ti makipagadal iti Biblia kadakuada tapno paneknekak a biddutda.
Nagadu ti saludsodko bayat ti panagadalmi, ket dagiti Saksi sinungbatanda amin dagitoy babaen ti Biblia. Babaen ti tulongda, naammuak nga awan ti puot dagiti natay ken saanda nga agtutuok iti impierno. (Eclesiastes 9:5, 10) Naammuak met ti maipapan iti namnama a biag nga agnanayon iti Paraiso a daga. (Salmo 37:11, 29; Apocalipsis 21:3, 4) Nupay insardeng ni Tatang ti panagadalna iti Biblia, rinugiak ti makigimong iti lokal a kongregasion dagiti Saksi ni Jehova. Ti natalna ken naurnos a pannakaangay dagidi a gimong ti timmulong kaniak a mangammo iti ad-adu pay maipapan ken ni Jehova. Timmabunoak met kadagiti asamblea sirkito ken kombension distrito, daddadakkel a panagtataripnong nga inorganisar dagiti Saksi. Babaen iti daytoy a panagadalko iti Biblia, naaddaanak iti nabileg a tarigagay a mangipaay iti naanamongan a panagdayaw ken ni Jehova. Ngem adda ti lapped.
Iti dayta a tiempo, di kasado nga agdendennakami iti ama ti tallo kadagiti annakko. Naammuak manipud iti Biblia a kondenaren ti Dios ti seksual a relasion dagiti di agassawa, ket nangrugi a makonsiensiaak. (Proverbio 5:15-20; Galacia 5:19) Bayat nga immuneg ti panagayatko iti kinapudno, tinarigagayak nga itunos ti biagko iti linteg ti Dios. Kamaudiananna, nangngeddengak. Imbagak iti kabkabbalayko a masapul nga agkasarkami, ta no saan, agsinakami laengen. Nupay saanna nga inawat dagiti patpatiek, opisial a nagkasarkami idi Agosto 15, 1970, lima a tawen kalpasan daydi damo a nakasaritak dagiti Saksi. Idi Disiembre ti 1970, insimbolok ti dedikasionko ken ni Jehova babaen ti bautismo iti danum.
No mainaig iti ministerio, diakto malipatan ti umuna nga aldaw a pannakipasetko iti panangasaba. Madanaganak ken diak ammo no kasano a rugian ti makipatang maipapan iti Biblia. Kinapudnona, nabang-aranak idi a ti umuna a bumalay dagus a pinutedna ti saritaan. Ngem idi agangay saanakon a madanagan. Iti ngudo ti aldaw, nakaragragsakak gapu ta nadumaduma a tattao ti nakasaok iti ababa maipapan iti Biblia ken nakaipaimaak kadakuada iti sumagmamano a publikasion a naibatay iti Biblia.
Panangtaginayon iti Nabileg nga Espiritualidad ti Pamilia
Idi 1977, walon ti annakko. Determinadoak a mangaramid iti amin a kabaelak a tumulong iti pamiliak nga agserbi ken ni Jehova. (Josue 24:15) Gapuna, sigagaget a nangikonduktaak iti regular a panagadal ti pamiliami iti Biblia. No dadduma, gapu iti bannogko, makaturogak bayat a ti maysa kadagiti annakko basbasaenna a sipipigsa ti parapo, ket nasken a riingendak dagiti annakko. Ngem ti pannakabannog saan pulos a nanglapped kadakami a mangadal iti Biblia kas pamilia.
Kanayon met nga agkararagak a kaduak dagiti annakko. Apaman a kabaelandan, insurok kadakuada no kasano ti agkararag ken ni Jehova iti bukodda. Siniguradok a tunggal maysa kadakuada ti personal nga agkararag sakbay a maturogda. Pindaek ti makikadua kadagiti annakko a di pay makabael nga agkararag iti bukodda.
Idi damo, saan a kayat ni lakayko nga itugotko dagiti annakko kadagiti gimong iti kongregasion. Ngem gapu ta isu ti manamnama a mangasikaso kadagiti ubbing no bilang ta diak itugot ida kadagiti gimong, medio kimmalma ti ibubusorna. Iti rabii, pagaayatna ti bumisita kadagiti gagayyemna, ngem dina kayat nga ikuyog dagiti walo nga annakna! Idi agangay, tultulongannak payen a mangparubuat kadagiti ubbing a mapan iti Kingdom Hall.
Di nagbayag, nairuam dagiti annakko a tumabuno kadagiti amin a gimong iti kongregasion ken makipaset iti panangasaba. Bayat ti bakasionda iti kalgaw, masansan a mapanda mangasaba a kaduada dagiti payunir, wenno amin-tiempo a ministro, iti kongregasion. Daytoy ti timmulong kadagiti naganus nga annakko a mangpatanor iti naimpusuan a panangipategda iti kongregasion ken iti trabaho a panangasaba.—Mateo 24:14.
Panawen ti Pannakasubok
Tapno sumayaat ti pamastrekan ti pamilia, nangrugi nga agtrabaho ni lakayko iti sabali a pagilian. Napaut dagiti tiempo ti kaawanna iti pamilia ngem regular ti panagawidna. Ngem idi 1989, pimmanaw ket saanen a nagsubli. Kas immunan a nadakamatko, kasla nagtupak kaniak ti lubong idi saanen a nagsubli ni lakayko. Adu a rabii a nagsangit ken sipapasnek a nagkararagak ken ni Jehova tapno maliwliwa ken makapagibturak, ket nariknak a sinungbatanna dagiti kararagko. Dagiti teksto a kas iti Isaias 54:4 ken 1 Corinto 7:15 ti nangted kaniak iti talna ti panunot ken bileg tapno maisakadko ti biagko. Iti kongregasion Kristiano, dagiti kakabagian ken gagayyem tinulongandak met iti emosional ken material. Agyamanak unay iti tulong ni Jehova ken ti ilina.
Adda pay dadduma a nakasuotanmi. Naminsan, nailaksid iti kongregasion ti maysa kadagiti annakko a babbai gapu iti inaramidna a mailabsing iti Kasuratan. Ipatpategko amin dagiti annakko, ngem napatpateg kaniak ti kinasungdok ken ni Jehova. Isu a bayat dayta a tiempo, siinget nga inannurotko ken dagiti annakko ti pagannurotan ti Biblia no kasano a pakilangenan ti maysa a nailaksid. (1 Corinto 5:11, 13) Kasta unay ti panangbabalaw kadakami dagiti tattao a saan a makaawat iti takdermi. Ngem kalpasan ti pannakaisubli ti anakko iti kongregasion, kinuna ni lakayna a nagustuanna ti natibker a panangitandudomi kadagiti prinsipio ti Biblia. Agserserbi itan ken ni Jehova daytoy a manugangko a kaduana ti pamiliana.
Panangrisut Kadagiti Pinansial a Parikut
Idi pinanawannakami ni lakayko, awan ti natalged a panggedak, ken awanen ti maaw-awat ti pamiliami a pinansial a suportana. Daytoy a kasasaad ti nangisuro kadakami a mapnek iti simple a biag ken mangipateg nga ad-adda kadagiti naespirituan a kinabaknang ngem kadagiti namaterialan a kalat. Bayat a nasursuro dagiti annakko ti agiinnayat ken agtitinnulong, simmingedda iti maysa ken maysa. Idi nagtrabaho dagiti in-inauna, sidadaan a tinulonganda dagiti adienda. Ni Marserre nga inauna nga anakko tinulonganna ni Nicole nga adienna tapno makaturpos daytoy iti haiskul. Kanayonanna, naaddaanak iti bassit a groseria. Ti nanumo a pagsapulan ti timmulong kaniak tapno maipaayko dagiti dadduma a material a kasapulanmi.
Pulos a saannakami a binaybay-an ni Jehova. Naminsan, imbagak iti maysa a kabsat a babai a saankami a makatabuno iti kombension distrito gapu iti pinansial a kasasaadmi. Insungbatna: “Kabsat Val, basta tiempo ti kombension, rugiamon ti agempake! Ipaay ni Jehova dagiti kasapulam.” Sinurotko ti balakadna. Impaay ni Jehova dagiti kasapulak, ket nagtultuloy dayta. Di pulos nagliway ti pamiliak iti itatabuno iti asamblea wenno kombension uray saan nga umdas ti kuartami.
Idi 1988, ti Hurricane Gilbert dinidigrana ti Jamaica, isu a pinanawanmi ti lugarmi ket nagkamangkami iti nataltalged a lugar. Bayat ti temporario a panagkalma ti bagyo, napanmi kinita iti anakko a lalaki ti nadadael a pagtaenganmi. Bayat ti panagsukainmi iti nadadael a pagtaenganmi, nakitak ti maysa a banag a kayatko nga isalbar. Pagammuan, dumaranudor manen ti angin, ngem kaskasdi a binagkatko latta ti ipatpategko a sanikua a nasapulak. “Nanang, ibatiyo dayta a telebision. Kaslakayo metten tay asawa ni Lot.” (Lucas 17:31, 32) Napanunotko a husto dayta a nakuna ti anakko. Imbatik ti telebision a narusep iti tudo, ket nagtaraykamin a nagsubli iti pagkamangan.
Sumgarak ita no malagipko nga insagmakko ti biagko gapu laeng iti maysa a telebision. Ngem maragsakanak unay no malagipko ti komento ti anakko iti dayta a kanito a mangipakita iti naespirituan a kinaridamna. Gapu iti pannakasanayna iti Biblia iti uneg ti kongregasion Kristiano, natulongannak a mangliklik iti nakaro a pisikal ken nalabit naespirituan a pannakadangran.
Nadadael ti pagtaengan ken dagiti sanikuami gapu iti alawig, ket kasta unay ti pannakaupaymi. Kalpasanna, immarayat dagiti Kristiano a kakabsat. Pinaregtadakami a mangakseptar iti napasamak kadakami buyogen ti panagtalek ken ni Jehova. Pinabilegdakami pay tapno makapagtultuloykami nga aktibo iti ministerio, ken tinulongandakami a mangibangon manen iti pagtaenganmi. Natignaykami iti kasta unay gapu iti dayta nga ayat ken panagsakripisio nga impakita dagiti Saksi a boluntario manipud Jamaica ken iti ballasiw-taaw.
Panangyun-una ken ni Jehova
Kalpasan ti panagturposna iti eskuelaan, nagserbi kas payunir ni Melaine, ti maikadua nga anakko. Kalpasanna, inawatna ti awis nga agserbi kas payunir iti sabali a kongregasion, ket kasapulan nga umikkat iti trabahona. Nupay dayta a trabahona ket dakkel a tulong iti pamiliami, nagtalekkami nga aywanannakami ni Jehova no tunggal maysa kadakami ipangpangrunana ti interes ti Pagarian. (Mateo 6:33) Idi agangay, naawis met nga agpayunir ti anakko a lalaki a ni Ewan. Tumultulong daytoy nga anakko iti pinansial a kasapulan ti pamiliami, ngem indagadagmi kenkuana nga awatenna ti awis ken imbagami a bendisionan koma ni Jehova. Diak pulos linapdan dagiti annakko a mangpalawa iti panagserbida iti Pagarian, ket kadakami a nabati iti pagtaengan saankami pulos a naawanan iti kasapulan. Imbes ketdi, rimmayray ti rag-omi, ket no dadduma, natulonganmi pay dagiti dadduma nga agkasapulan.
Ita, pagragsakak unay a makita dagiti annakko a ‘magmagna iti kinapudno.’ (3 Juan 4) Ti maysa kadagiti annakko a babbai, ni Melaine, kadkaduaanna ita ni lakayna a manangaywan iti sirkito. Ti anakko a ni Andrea ken ni lakayna agserserbida kas special pioneer, ken kadkaduaanna ni lakayna no bumisita iti kongregasion kas suno a manangaywan iti sirkito. Ti anakko a ni Ewan, a panglakayen iti kongregasion, kaduana met ni baketna nga agserserbi kas special pioneer. Ti sabali pay nga anakko a babai, ni Ava-Gay, agserserbi a kadua ni lakayna iti sanga nga opisina dagiti Saksi ni Jehova idiay Jamaica. Da Jennifer, Genieve, ken Nicole ket aktibo met nga iti nakaitimpuyoganda a kongregasion a kaduada dagiti assawa ken annakda. Makipagnanaed kaniak ni Marseree, ket naitimpuyogkami iti Port Morant Congregation. Sibabaknang a nabendisionanak, agsipud ta agserserbi ken ni Jehova dagiti amin a walo nga annakko.
Naaddaanak kadagiti parikut iti salun-at gapu iti kinabaketko. An-andurak itan ti sakitko a rheumatoid arthritis, ngem tagtagiragsakek latta ti agserserbi kas payunir. Ngem adda tiempo a narigatanak a magna iti naturod a lugarmi. Apektado idi ti ministeriok. Inkagumaak ti nagbisikleta ket naammuak a nasaysayaat dayta ngem ti magmagna. Isu a gimmatangak iti segunda mano a bisikleta ket dayta ti inusarkon. Idi damo, madanagan dagiti annakko no makitada nga agbisbisikleta ti inada nga addaan iti arthritis. Kaskasdi, maragsakanda unay gapu iti agtultuloy a panangasabak kas tarigagayan ti pusok.
Pagragsakak unay a makita dagiti inyadalak a tattao a mangawat iti kinapudno iti Biblia. Kanayon nga ikararagko a tulongan ni Jehova ti amin a kameng ti pamiliak nga agtalinaed a matalek kenkuana bayat daytoy panawen ti panungpalan ken iti agnanayon. Agdayaw ken agyamanak ken ni Jehova, ti Naindaklan a “Managdengngeg iti kararag,” gapu iti panangtulongna kaniak a mangsango iti karit a panangpadakkel kadagiti walo nga annakko maitunos iti daldalanna.—Salmo 65:2.
[Ladawan iti panid 10]
Kaduak dagiti annakko, assawada, ken appokok
[Ladawan iti panid 12]
Agbisbisikletaak itan iti ministeriok