Pakasaritaan ti Biag

Panangammo ken Panangaramid iti Umiso

KAS INSALAYSAY NI HADYN SANDERSON

Naminsan, kinuna ni Jesus kadagiti apostolna: “No ammoyo dagitoy a banag, naragsakkayo no aramidenyo ida.” (Juan 13:17) Wen, mabalin nga ammotayo ti umiso, ngem ti karit no dadduma isu ti panangaramid iti dayta. Nupay kasta, kalpasan ti nasurok a 80 a tawen a panagbiagko, agraman ti 40 a tawen a nabusbosko iti panagmisionerok, kombinsidoak nga umiso ti sasao ni Jesus. Pudno a mangyeg iti kinaragsak ti panangaramid iti pagayatan ti Dios. Palubosandak a mangisalaysay.

TAWEN 1925, idi agtawenak iti tallo, timmabuno dagiti dadakkelko iti palawag ti Biblia iti lugarmi idiay Newcastle, Australia. Babaen ti palawag a “Minilion a Sibibiag Ita ti Saanton a Pulos a Matay,” nabigbig ni Nanang ti kinapudno, ket nangrugi a tumabuno a regular kadagiti Nakristianuan a gimong. Ngem dagus a bimmaaw ti interes ni Tatang. Binusorna ti baro a pammati a nasarakan ni Nanang ken impangtana a panawanna no dina tallikudan ti pammatina. Ay-ayaten ni Nanang ni Tatang ken kayatna nga agkaykaysa ti pamiliami. Nupay kasta, ammo ni Nanang a ti panagtulnog iti Dios ti kangrunaan, ket determinado a mangaramid iti umiso iti imatangna. (Mateo 10:34-39) Pinanawannakami ni Tatang ket kalpasanna sagpaminsan laengen a nakitak.

No lagipek ti napalabas, apresiarek ti kinasungdo ni Nanang iti Dios. Gapu iti dayta a desisionna, naaddaankami ken ni manangko a Beulah iti biag a napnuan iti naespirituan a bendision. Insuro pay dayta ti maysa a nagpateg a leksion​—no ammomi no ania ti umiso, masapul nga ikagumaanmi nga aramiden dayta.

Dagiti Pannubok iti Pammati

Dagiti Estudiante iti Biblia, kas awag idi kadagiti Saksi ni Jehova, siaanep a tinulonganda ti pamiliami. Nakikabbalay kadakami ni apongko a baket ken inawatna met ti kinapudno. Nagbalinda a nakasingsinged nga agkadua ken Nanang iti panangasaba, ken nagun-odda ti panagraem ti tattao gapu iti nadayaw a langada ken nainggayyeman a kababalinda.

Kabayatanna, dagiti nataengan a kakabsat a lallaki impaayandak iti naisangsangayan a tulong ken nagpateg a panangsanay. Di nagbayag, nasursurokon nga usaren ti testimony card ken mangipaay iti ababa a presentasion kadagiti tattao iti pagtaenganda. Impangngegko met dagiti nairekord a palawag iti Biblia babaen ti mabitbit a ponograpo ken nakipasetak iti martsa a panangasaba babaen ti plakard kadagiti kangrunaan a kalsada ti ili. Nagrigat daytoy agsipud ta adda panagbutengko iti tao. Nupay kasta, ammok ti umiso ken determinadoak nga mangaramid iti dayta.

Idi nagturposakon, nagtrabahoak iti maysa a bangko, ket masapul nga agbiaheak a mapan iti sumagmamano a sanga ti bangko iti intero nga estado ti New South Wales. Nupay bassit laeng dagiti Saksi iti dayta a paset ti pagilian, nakatulong ti pannakasanayko tapno mataginayonko a sibibiag ti pammatik. Napabilegak met iti naespirituan gapu kadagiti makaparegta a surat ni nanang.

Dagidi a surat ti timmulong kaniak iti umiso a tiempo. Mangrugrugi pay laeng idi ti Gubat Sangalubongan II, ket naayabanak tapno agsoldado. Ti manedyer iti bangko ket maysa a napeklan a mannakimisa ken komander iti militar iti dayta a lugar. Idi inlawlawagko ti neutral a takderko kas maysa a Kristiano, inikkannak iti ultimatum​—tallikudak ti relihionko wenno umikkatak iti trabahok. Dimmegdeg ti kasasaad idi dimmatagak iti lokal a pagpalistaan kadagiti agsoldado. Adda sadiay ti manedyer ket sipsiputannak bayat nga umas-asidegak iti lamisaan a pagpalistaan. Idi nagkedkedak a mangpirma iti papeles ti panagsoldado, nakapungtot dagiti opisial. Nagrigat daydi a kanito, ngem determinadoak a mangaramid iti umiso. Babaen ti tulong ni Jehova, nagtalinaedak a kalmado ken determinado. Idi agangay, naammuak nga adda dagiti maton a mangsapsapul kaniak isu nga inempakek a dagus dagiti gargaretko ket nagdardarasak a pimmanaw iti ili babaen ti tren!

Idi addaakon iti Newcastle, nabistaak iti korte agraman ti pito a kakabsat a nagkedked nga agsoldado. Nasentensiaankami iti tallo a bulan a nadagsen a panagtrabaho iti pagbaludan. Nupay ti pannakaibalud ket nasaem a kapadasan, nabendisionankami gapu iti panangaramidmi iti umiso. Kalpasan a nawayawayaankami, ti kaseldak a ni Hilton Wilkinson, a maysa met a Saksi, inawisnak nga agtrabaho iti negosiona a photo studio. Sadiay a naam-ammok ti nagbalin nga asawak a ni Melody, nga agtartrabaho iti studio kas receptionist. Di nagbayag kalpasan a nawayawayaanak, nabautisaranak kas simbolo ti dedikasionko ken Jehova.

Panangragpat iti Amin-Tiempo a Panagserbi

Kalpasan ti kasarmi, nanglukatkami ken Melody iti bukodmi a photo studio idiay Newcastle. Di nagbayag, nagadun ti trabahomi nga uray la a nangrugi nga agsagaba ti salun-at ken espiritualidadmi. Iti dayta a tiempo, ni Ted Jaracz, nga agserserbi idi iti sanga nga opisina dagiti Saksi ni Jehova iti Australia ken maysa itan a kameng ti Bagi a Manarawidwid, nakisarita kadakami maipapan iti naespirituan a kalatmi. Kalpasan dayta a panagpatang, inkeddengmi nga ilako ti negosiomi ken pasimplien ti biagmi. Idi 1954, gimmatangkami iti bassit a treyler, sa immakarkami iti siudad ti Ballarat iti estado ti Victoria, ket nagserbikami kas payunir wenno amin-tiempo nga ebanghelisador.

Binendisionan ni Jehova ti panagreggetmi bayat ti pannakipagtrabahomi iti bassit a kongregasion ti Ballarat. Iti las-ud laeng ti 18 a bulan, nagbalin a 70 ti dati a 17 a bilang dagiti tumabtabuno kadagiti gimong. Di nagbayag, naawiskami nga agserbi kas agdaldaliasat a manangaywan iti estado ti Makin-abagatan nga Australia. Iti simmaganad a tallo a tawen, tinagiragsakmi ti panagbisitami kadagiti kongregasion iti siudad ti Adelaide ken kadagiti rehion nga agpatpataud iti arak ken naranghita iti igid ti Karayan Murray. Anian a nagdakkel ti namalbaliwan ti biagmi! Naragsakkami nga agserserbi a kadua dagiti naayat a kakabsat a lallaki ken babbai. Talaga a nagdakkel a gunggona iti panangaramid iti ammomi nga umiso!

Ti Nakaibaonanmi Kas Misionero

Idi 1958, impakaammomi iti sanga nga opisina ti Australia ti panggepmi a tumabuno iti “Nadibinuan a Pagayatan” nga International Assembly iti dayta a tawen idiay siudad ti New York. Kas subalit, nangipatulodda iti pirmaanmi nga aplikasion iti itatabunomi iti eskuelaan ti Gilead idiay Estados Unidos para kadagiti agmisionero. Gapu ta agtawenkamin iti 35, impagarupmi a saankamin a kualipikado nga agadal iti Gilead. Nupay kasta, impatulodmi ti aplikasionmi ket naawiskami nga agadal iti maika-32 a klase. Iti katengngaan ti kurso, naipakaammon ti pakaibaonanmi kas misionero​—idiay India! Nupay madanagankami idi damo, kayatmi nga aramiden ti umiso isu a siraragsak nga inawatmi ti nakaitudinganmi.

Babaen ti panagbiahemi iti barko, nakagtengkami maysa nga agsapa idi 1959 idiay Bombay (Mumbai itan). Nagadu a trabahador ti matmaturog iti kannag ti sangladan. Agadiwara ti naiduma nga angot. Idi nakatangkayagen ti init, naaddaankamin iti pamalatpatan no ania ti mapasaranmi. Dimi pay pulos napadasan ti kasta a kapudot! Ti misionero nga agassawa a da Lynton ken Jenny Dower, a kaduami idi a nagpayunir idiay Ballarat, ti nangpasangbay kadakami. Impandakami iti sanga nga opisina ti India​—maysa a nailet nga apartment iti makinngato a kadsaaran​— a masarakan iti asideg iti sentro ti siudad. Innem ti agnanaed sadiay kas boluntario a trabahador iti Bethel. Ni Brother Edwin Skinner, a nagserbi kas misionero iti India sipud pay idi 1926, binalakadannakami a sakbay a mapankami iti teritoriami, gumatangkami iti dua a bag a mabalinmi a pangikargaan iti nagduduma a kita ti gargaret. Gagangay a makita dagita a kita ti bag kadagiti tren ti India ken dakkel met a tulong dayta kadakami kabayatan dagiti simmaganad a panagbiahemi.

Kalpasan ti dua nga aldaw a panagbiahemi iti tren, nakadanonkami idiay Tiruchchirappalli a teritoriami, maysa a siudad iti makin-abagatan nga estado ti Madras (Tamil Nadu itan). Sadiay, naikaduakami iti tallo nga special pioneer a taga-India, a mangaskasaba iti umili a 250,000. Inuugma idi ti kasasaad ti panagbiag. Naminsan, kurang payen nga $4 (U.S.) ti nabati a kuartami. Ngem idi naibus dayta, dinakam binaybay-an ni Jehova. Maysa a lalaki nga agad-adal iti Biblia ti nagpautang kadakami iti kuarta a pangabang iti balay a mabalin a paggimongan. Naminsan, idi naibusankami iti taraonmi, maysa a kaarruba ti siaasi a nangipadigo iti linutona a curry. Pagay-ayatko dayta ngem kasta unay ti gasangna ta urayak la nagsasaiddek.

Iti Tay-ak ti Ministerio

Nupay dadduma a tattao idiay Tiruchchirappalli ti makasao iti Ingles, Tamil ti pagsasao ti kaaduan. Gapuna, inkagumaanmi ti nagsursuro iti simple a presentasion iti tay-ak ti serbisio iti dayta a pagsasao. Nagbanaganna, nagun-odanmi ti panagraem ti adu kadagiti lumugar.

Pagragsakanmi unay ti mangasaba iti binalaybalay. Kadawyanna a managpadagus dagiti taga-India, ken kaaduan kadakuada ti agpamerienda. Gapu ta masansan nga 40 a degrees Celsius ti kapudotna, apresiarenmi unay ti kinamanagpadagusda. Kinamanagraem no kasaritami pay ida nga umuna maipapan kadagiti personal a banag sakbay nga ibagami ti mensahemi. Masansan nga isaludsod dagiti bumalay kadakami: “Taga-anokayo? Adda kadi annakyo? Apay nga awan?” No maammuanda nga awan pay anakmi, kaaduanna nga agirekomendada iti nalaing a doktor! Ngem alaenmi daytoy a gundaway a mangyam-ammo iti bagimi ken mangilawlawag iti nagpateg a trabahomi a panangisuro iti Biblia.

Ti relihion ti kaaduan a makasabaanmi ket Hindu​—pammati a naiduma unay iti Kristianidad. Ngem imbes a makidebate iti kinarikut ti pilosopia ti Hindu, ikasabami laeng ti naimbag a damag ti Pagarian ti Dios ket nagsayaat dagiti resultana. Iti las-ud iti innem a bulan, dandani 20 a tattao ti nangrugi a tumabuno kadagiti gimong iti pagtaenganmi a misionero. Maysa kadakuada ni Nallathambi a maysa nga inheniero sibil. Idi agangay, isu ken ti barona a ni Vijayalayan, natulonganda ti agarup 50 a tattao a nagbalin nga adipen ni Jehova. Nagserbi met idi ni Vijayalayan iti sanga nga opisina iti India.

Ti Panagakar-akarmi

Awan pay innem a bulan ti kaaddami iti India idi naawisak nga agserbi kas ti kaunaan a permanente a manangaywan iti distrito iti pagilian. Kasapulan ti panagbiahek iti intero nga India, a mangorganisar kadagiti asamblea ken makipagtrabaho kadagiti kakabsat iti siam a pagsasao. Nagrigat dayta a trabaho. Dagiti kawes ken alikamen nga usarenmi iti innem a bulan ti inyempakemi iti tallo a lakasa a lata ken kadagiti kanayon a nakasagana a bagmi a pagkargaan iti gargaretmi, sa naglugankami iti tren manipud siudad ti Madras (Chennai itan). Kanayonkami nga umakar gapu ta naglawa ti teritoria ti distrito, nga agarup 6,500 a kilometro ti palikmutna. Naminsan, kalpasan ti asambleami iti makin-abagatan a siudad ti Bangalore iti Domingo, nagbiahekami a nagpa-amianan nga agturong iti Darjeeling iti sakaanan ti Himalayan tapno agserbikami iti sabali manen nga asamblea iti sumaganad a lawas. Agarup 2,700 a kilometro ti agpa-Darjeeling, ken naminlima a naglugankami iti nadumaduma a tren.

Bayat dagiti immuna a panagbiahemi, naragsakankami a nangipabuya iti pelikula a The New World Society in Action. Daytoy a pelikula impakaammona kadagiti tattao no ania ken no kasano kasaknap ti trabaho dagiti adipen ni Jehova iti intero a lubong. Masansan a ginasgasut a tattao ti agbuya. Iti naminsan, impabuyami ti pelikula iti maysa a grupo a naguummong iti igid ti kalsada. Bayat ti pabuya, pimmuskol ti ulep, a mangipakita nga agtudo. Gapu ta adda napasamak idi a riribuk no maisardeng ti pelikula, intultuloyko ngarud ti panagipabuya ngem pinapartakko dayta. Naimbag laengen ta nalpas ti pelikula sakbay a nagtudo.

Iti simmaganad a tawtawen, nagdaliasatkami ken Melody iti dandani amin a paset ti India. Tangay addaan ti tunggal rehion iti naiduma a taraon, kawes, pagsasao, ken aglawlaw, kas man la panagdaliasat dayta a mapan iti nagduduma a pagilian. Anian a nakaskasdaaw ti kinanadumaduma dagiti parsua ni Jehova! Pudno met dayta kadagiti atap nga animal iti India. Naminsan, bayat ti panagkampingmi iti kabakiran ti Nepal, nakitami ti nagdakkel a tigre. Nakarangranga dayta nga animal. Ti pannakakitami iti dayta pinabilegna ti tarigagaymi nga agbiag idiay Paraiso, a sadiay agkakappianton dagiti tattao ken animal.

Panagrang-ay ti Organisasion

Bayat dagidi nga aldaw, kasapulan dagiti kakabsat iti India ti napingpinget a panangsurot iti urnos ti organisasion ni Jehova. Bayat ti gimong iti dadduma a kongregasion, agtugaw dagiti lallaki iti maysa a benneg idinto ta dagiti babai addada iti bangir a benneg. Kanayon a naladaw a mangrugi ti gimong. Iti maysa lugar, maysa a napigsa a batingting ti mangayab kadagiti agibumbunannag iti pagarian nga umay makigimong. Kadagiti dadduma a lugar, ti posision ti init ti pagilasinan dagiti agibumbunannag no orasen ti pannakigimongda. Saan a regular dagiti asamblea ken panagbisita dagiti manangaywan iti sirkito. Sidadaan dagiti kakabsat a mangaramid iti umiso, ngem kasapulanda ti panangsanay.

Idi 1959, inyussuat ti organisasion ni Jehova ti Kingdom Ministry School. Daytoy a sangalubongan a programa a panangsanay tinulonganna dagiti manangaywan iti sirkito, special pioneer, misionero, ken panglakayen iti kongregasion tapno agbalinda nga ad-adda nga epektibo a mangitungpal kadagiti Nainkasuratan a responsabilidadda. Idi nangrugi ti klase ditoy India idi Disiembre 1961, nagserbiak kas instruktor ti klase. Dagiti resulta dayta a panangsanay ti in-inut a nakagunggonaan dagiti kongregasion iti intero a pagilian. Apaman a naammuan dagiti kakabsat ti umiso, ti espiritu ti Dios tinignayna ida a mangaramid iti dayta.

Dagiti dadakkel a kombension pinaregta ken pinagkaykaysana met dagiti kakabsat. Ti naisangsangayan kadagitoy a kombension ket ti “Agnanayon a Naimbag a Damag” nga International Assembly a naangay idiay New Delhi idi 1963. Dagiti Saksi iti intero nga India nagbiaheda iti rinibu a kilometro ken adu ti nangbusbos iti amin nga urnongda tapno laeng makatabunoda iti asamblea. Yantangay adda met dagiti 583 a delegado a naggapu iti 23 a sabali a pagilian, dayta ti umuna a gundaway a makita ken makalangen dagiti Saksi a taga-India ti nagadu a bimmisita a kakabsat.

Idi 1961, naawiskami ken Melody nga agbalin a kameng ti pamilia ti Bethel ti Bombay, a nagserbiak idi agangay kas kameng ti Branch Committee. Simmaruno ti dadduma pay a pribilehio. Iti adu a tawen, nagserbiak kas manangaywan iti sona iti intero nga Asia ken iti Makintengnga a Daya. Gapu ta maiparit ti trabaho a panangasaba kadagitoy a pagilian, dagiti agibumbunannag kadagitoy a lugar masapul “a naannad a kas kadagiti serpiente ket kaskasdi a nasingpet a kas kadagiti kalapati.”​—Mateo 10:16.

Irarang-ay ken Dagiti Panagbalbaliw

Idi 1959 nga isasangpetmi iti India, adda laeng 1,514 nga aktibo nga agibumbunannag iti intero a pagilian. Ita, dayta a bilang dimmanonen iti nasurok a 24,000. Tapno maipaay ti kasapulan daytoy nga irarang-ay, naminduan nga immakarkami iti baro a pasdek ti Bethel iti Bombay wenno iti asidegna. Kalpasanna, idi Marso 2002, immakar manen ti pamilia ti Bethel​—iti daytoy a gundaway, iti baro a pasdek iti asideg ti Bangalore, iti makin-abagatan nga India. Daytoy a moderno a pasilidad ti pagnanaedan ita ti 240 a kameng ti Bethel, a dadduma kadagitoy ti mangipatpatarus kadagiti literatura iti 20 a pagsasao.

Nupay segseggaanmi ken Melody ti iyaakarmi idiay Bangalore, napilitankami nga agsubli idiay Australia idi 1999 gapu iti nakapuyen a salun-atmi. Iti agdama, agserserbikami kas kameng ti pamilia ti Bethel ti Sydney. Nupay pimmanawkamin idiay India, nabileg pay laeng ti ayatmi kadagiti ipatpategmi a gagayyem ken naespirituan nga annakmi iti dayta a pagilian. Anian a ragsak ti makaawat iti surat nga aggapu kadakuada!

No sublianmi ti nasurok a 50 a tawen a panagserbimi iti amin-tiempo, mariknami ken Melody a sibabaknang a nabendisionankami. Nagtrabahokami idi tapno mataginayon ti ladawan ti maysa a tao babaen iti retrato, ngem adayo a nasaysayaat a trabaho ti mangtaginayon iti biag dagiti tattao nga adda iti lagip ni Jehova. Anian a nagpateg a kapadasan ti imbunga ti desisionmi a mangyun-una iti pagayatan ti Dios iti biagmi! Wen, ti panangaramid iti kunaen ti Dios nga umiso pudno a mangyeg iti kinaragsak!

[Dagiti Mapa iti panid 15]

(Para iti aktual a pannakaurnosna, kitaem ti publikasion)

INDIA

New Delhi

Darjeeling

Bombay (Mumbai)

Bangalore

Madras (Chennai)

Tiruchchirappalli

[Dagiti Ladawan iti panid 13]

Ni Hadyn ken ni Melody idi 1942

[Ladawan iti panid 16]

Ti pamilia ti Bethel idiay India, 1975