Ti Kababagas ti Krismas Maiparparangarang Kadi iti Tunggal Aldaw ti Intero a Tawen?
“Dayag iti Dios kadagiti kangatuan, ket iti daga talna kadagiti tattao nga addaan naimbag a nakem.”—Lucas 2:14.
KABESADO ti minilion a tattao dagita nga imbaga dagiti anghel ti Dios idi impakaammoda kadagiti papastor nga agbambantay iti arbanda iti daydi a rabii a naipasngayen ni Jesus. Ikagkagumaan ti adu nga agkunkuna a Kristiano ti agsingsingpet iti agarup petsa nga ibagbaga dagiti relihion a pannakaipasngay ni Jesus. Ti naisangsangayan a panangipakita iti rag-o, talna, ken naimbag a nakem—dagiti kualidad a nadakamat iti impakaammo dagiti anghel—ti masansan a matukoy kas kababagas ti Krismas.
Dagita a naimbag a kababalin ket magustuan uray dagiti saan a mangramrambak iti Krismas kas narelihiosuan a piesta. Apresiarenda met ti kinamanagayat a kasla iparparegta dayta a pasken. Yantangay bakasion dagiti estudiante wenno trabahador no panawen ti Krismas, dayta a piesta ti mangted kadagiti tattao iti gundaway nga aginana, makalangen ti pamilia ken gagayyemda, wenno tapno agaliwaksay laeng. Siempre, adu a napasnek a tattao ti mangibilang iti Krismas kangrunaanna kas tiempo a panangpadayaw ken Jesu-Kristo.
Aniaman ti makuna a kababagas ti Krismas, sidadaan nga aminen ti kaaduan a masansan nga apagbiit laeng ti aniaman a kinasingpet nga iparparegta dayta a piesta. Insigida nga agsubli manen dagiti tattao iti dati a kababalinda. Kastoy ti kinuna ti maysa a salaysay a napauluan “Ti Kababagas ti Krismas,” nga impablaak ti Royal Bank of Canada: “Nagadu nga agkunkuna a ‘Kristiano’ ti mangiparparangarang a Kristianoda iti sumagmamano laeng a lawas iti kada tawen, a mangipakpakitada iti kinaimbag iti padada a tattao agingga iti Baro a Tawen. Kalpasanna, agsublida manen iti inaagum a panagbiagda ken awan manen ti pannakaseknanda kadagiti padada a tattao.” Innayon dayta a salaysay a ti “nangnangruna a pakapilawan” iti kababagas ti Krismas ket saan nga iparparangarang dayta dagiti tattao iti “inaldaw iti intero a makatawen.”
Umanamongka man iti dayta a panangamiris wenno saan, kaskasdi a mangpataud dayta kadagiti agkakapateg a saludsod. Addanto kadi tiempo nga agnanayonton a maiparangarang dagiti tattao ti kinaparabur ken pannakaawat iti maysa ken maysa? Agpayso kadi a manamnamatayo a matungpalto ti impakaammo dagiti anghel idi rabii a naipasngay ni Jesus? Wenno arapaap laeng kadi ti namnama nga agarinton ti pudno a talna?