Apay a Liklikantayo ti Panaglablabes?

NI Jehova ti kasayaatan nga ulidan ti kinatimbeng. “Naan-anay ti aramidna,” ken pulos a di naulpit ti kinahustisiana, yantangay kanayon a nabuyogan iti asi. (Deuteronomio 32:4) Ti ayatna ket kanayon a nabuyogan iti prinsipio, agsipud ta agtigtignay a maitunos kadagiti perpekto a lintegna. (Salmo 89:14; 103:13, 14) Naparsua dagiti immuna a nagannak kadatayo a balanse iti amin a banag. Saanda a pulos nga agannayas idi nga agbalin nga aglablabes. Ngem gapu iti basol, nangrugi ti “depekto” nga isu ti kinaimperpekto. Dayta ti gapuna a napukaw dayta a kinabalanse.​—Deuteronomio 32:5.

Kas panangyilustrar: Napadasanyo kadin ti naglugan iti kotse wenno iti bisikleta nga adda dakkel a bukol iti pilidna? Sigurado a natagtag ken napeggad ti agdaliasat gapu iti dayta a depekto. Nasken a matarimaan ti kasta a pilid sakbay a maperdi wenno umpes. Umasping iti dayta, ti imperpekto a personalidadtayo ket agannayas a maaddaan kadagiti depekto. No ipalubostayo a dumakkel dagitoy a “bukol,” agbalin a nataltag unay ken napeggad pay ketdi ti panagdaliasattayo iti biag.

No dadduma, posible nga agbalin a nalabes dagiti nasayaat a galadtayo, dagiti paglaingantayo. Kas pagarigan, nupay ti Linteg Mosaiko inkalikagumna kadagiti Israelita nga ikkanda iti barayubay dagiti pandilingda, dagiti Fariseo idi kaaldawan ni Jesus nalabes ti ‘panangpadakkelda kadagiti barayubay dagiti kawesda’ gapu ta kayatda ti agbalin a naisalsalumina iti sabsabali. Ti motiboda ket tapno agparang a nasansantoda ngem iti dadduma.​—Mateo 23:5; Numeros 15:38-40.

Ita, adda dadduma a tattao nga ikagkagumaanda ti mangatrakar babaen ti aniaman a pamuspusan, uray pay iti pamay-an a pakasdaawan ti sabsabali. Mabalin a daytoy ket talaga a desperado a panangibaga iti: “Kitaendak! Naisangsangayanak met!” Ngem ti panaglablabes iti kawes, kababalin, ken ar-aramid saanda a mapnek dagiti napaypayso a kasapulan ti maysa a Kristiano.

Balanse a Panangmatmat Maipapan iti Trabaho

Siasinotayo man wenno sadinoman ti pagnanaedantayo, makatulong ti nasayaat a trabaho tapno agbalin a naragsak ti biagtayo. Naparsuatayo iti wagas a masagraptayo ti pannakapnek iti kasta a trabaho. (Genesis 2:15) Maitunos iti dayta, ti kinasadut ket kondenaren ti Biblia. Impaganetget ni apostol Pablo: “No ti asinoman saanna a kayat ti agtrabaho, saan met koma a mangan.” (2 Tesalonica 3:10) Kinapudnona, ti kinasadut ket saan laeng nga agtungpal iti kinapanglaw ken di pannakapnek no di ket iti di pannakaay-ayo ti Dios.

Nupay kasta, adu met ti aglablabes ti panagtrabahoda, nga agbalbalindan nga adikto iti trabahoda ken agpapaadipenda iti dayta. Nakasapsapada nga agtrabaho ken adalemen ti rabii no agawidda. Ikalinteganda a ti trabahoda ket pagimbagan ti pamiliada. Ngem kinapudnona, mabalin nga agsagsagaba ti pamiliada gapu iti kasta a debosion iti trabaho. Kastoy ti kuna ti maysa nga agtagibalay a ni lakayna ket masansan a mangbusbos iti kanayonan nga or-oras iti trabaho: “Pagragsakak nga isukat amin a banag iti daytoy nagpintas a balay tapno laeng makaduami nga agiina ni lakayko.” Dagidiay aglablabes ti panagtrabahoda nasken nga utobenda ti personal a kapadasan ni Ari Solomon: “Siak, mismo a siak, timmaliawak a mangamiris iti amin nga ar-aramidko nga inaramid dagiti imak ken iti napinget a panagtrabaho nga inaramidko a sipipinget tapno maibanag, ket, adtoy! isuamin kinaubbaw ken panangkamkamat iti angin.”​—Eclesiastes 2:11.

Wen, no maipapan iti trabaho, masapul a liklikantayo nga agpadpada ti kinasadut ken ti nalabes a panagtrabaho. Mabalintayo ti agbalin a nagaget a trabahador, ngem laglagipentayo a no agpaadipentayo iti trabaho, mapukaw ti kinaragsaktayo ken nalabit ti ad-adu pay a banag.​—Eclesiastes 4:5, 6.

Liklikan ti Nalabes a Panangmatmat iti Ragragsak

Impakpakauna ti Biblia maipapan iti kaaldawantayo: “Dagiti tattao managayatdanto . . . iti ragragsak imbes a managayat iti Dios.” (2 Timoteo 3:2, 4) Ti panagsapul iti ragragsak ket nagbalin a maysa kadagiti kaepektibuan a pamay-an ni Satanas tapno mayadayona dagiti tattao manipud iti Dios. Umad-adu dagidiay magustuanda ti aglablabes a panagaliwaksay ken panaglinglingay, kas iti napeggad nga isport tapno mapasaranda ti nagpaiduma a ragsak. Agtultuloy nga umad-adu dagita nga aktibidad, ket umad-adu met dagiti makipaspaset kadagita. Apay? Gapu ta saanda a mapnek iti inaldaw a biagda, isu a sapsapulenda ti dakdakkel pay a ragsak. Ngem tapno agtultuloy ti kasta a ragsak, masapul a sarakusokenda ti kumarkaro a peggad. Dagiti naannad a Kristiano liklikanda dagiti napeggad nga isport gapu iti panangipategda iti sagut a biag ken iti Daydiay nangisagut iti dayta.​—Salmo 36:9.

Idi pinarsua ti Dios ti immuna nga agassawa, nangikabilanna kadakuada? Iti minuyongan ti Eden, a kayatna a sawen “Ragsak” iti orihinal a pagsasao. (Genesis 2:8) Nalawag a ti naragsak a biag ket paset ti panggep ni Jehova agpaay kadagiti tattao.

Nangibati ni Jesus kadatayo iti perpekto a pagarigan ti balanse a panangmatmat iti ragragsak. Naan-anay nga impangpangruna ni Jesus ti panangitungpal iti pagayatan ni Jehova, ken kanayon a nagbiag maitunos kadagiti linteg ken prinsipio ti Dios. Nangipaay iti panawen kadagiti agkasapulan, uray idi isu ket nabannog. (Mateo 14:13, 14) Wen, pinatgan ni Jesus dagiti nangawis kenkuana iti pannangan ken inwayaanna ti aginana ken agaliwaksay. Siempre, isu ket sipapanunot nga adda dagiti kabusor a mangbabalaw kenkuana gapu iti panangaramidna kadagita a banag. Kinunada kenkuana: “Adtoy! Maysa a tao a nabuklis ken kaay-ayona ti aginum iti arak.” (Lucas 7:34; 10:38; 11:37) Ngem para ken Jesus, dina kayat a sawen a no addaanka iti pudno a debosion ket ipueram aminen a kita ti ragragsak.

Nalawag a masiribtayo no liklikantayo ti aniaman a panaglablabes no maipapan iti panagaliwaksay. Ti panangipangpangruna iti panagragragsak ken panaglinglingay ket dinto pulos mangyeg iti pudno a kinaragsak. Mabalin nga agresulta dayta iti panangbaybay-atayo iti bambanag a napatpateg, agraman ti relasiontayo iti Dios. Kaskasdi a saan a rumbeng nga interamente a paidamantayo ti bagbagitayo iti ragsak wenno agbalintayo a manangbabalaw kadagiti sabsabali a mangtagtagiragsak iti balanse a panagbiag.​—Eclesiastes 2:24; 3:1-4.

Sapulenyo ti Kinaragsak Babaen ti Balanse a Panagbiag

Insurat ni adalan a Santiago: “Maitibkoltayo amin iti adu a daras.” (Santiago 3:2) Mabalin a makitatayo a pudno daytoy kadatayo bayat nga ikagkagumaantayo a liklikan dagiti panaglablabes. Ania ti tumulong kadatayo nga agtalinaed a balanse? Bueno, nasken nga ammuentayo dagiti bukodtayo a paglaingan ken pagkapuyan. Saan a nalaka nga aramiden dayta. Mabalin nga agbalbalintayon nga aglablabes a ditay mapupuotan. Nainsiriban ngarud a kanayon koma a nasingedtayo kadagiti nataengan a Kristiano ken ipangagtayo ti balanse a balakad. (Galacia 6:1) Mabalintayo a kiddawen ti kasta a balakad iti maysa a mapagtalkan a gayyem wenno iti aduan kapadasanen a panglakayen iti kongregasion. Ti kasta a balakad a naibasar iti Biblia ket agserbi kas “pagsarmingan” tapno masukimattayo no balanse met laeng ti panagbiagtayo iti panangmatmat ni Jehova.​—Santiago 1:22-25.

Makaparagsak ta adda dagiti pamay-an tapno makapagbiagtayo a natimbeng. Babaen ti determinado a panangikagumaan ken bendision ni Jehova, kabaelantayo ti agbalin a balanse ket agbiag a naragsak. Babaen dayta, sumayaat ti relasiontayo kadagiti kakabsattayo a Kristiano, ken agbalintayo a nasaysayaat nga ulidan kadagidiay kasabaantayo. Kangrunaan iti amin, ad-adda a matuladtayo ti balanse ken naayat a Diostayo a ni Jehova.​—Efeso 5:1.

[Picture Credit Line iti panid 28]

©Greg Epperson/age fotostock