Naalangon ti Kalintegan Dagiti Biktima ti Kinaranggas

IDI Mayo 3, 2007, ti European Court of Human Rights idiay Strasbourg, Francia ket nangipaulog iti nagkaykaysa a pangngeddeng a pabor kadagiti Saksi ni Jehova iti Republika ti Georgia. Napaneknekan ti korte a dagiti Saksi ni Jehova sadiay ket naglak-am iti kinaulpit ken naipaidam kadakuada ti kalinteganda a mangtagiragsak iti wayawaya ti relihion. Ti korte binabalawna met ti dati a gobierno ti Georgia gapu iti saanna a panangyussuat iti legal a tignay maibusor kadagiti nagaramid iti krimen. Ania ti nakaibatayan dayta a pangngeddeng?

Idi Oktubre 17, 1999, idiay Tbilisi a kabesera ti Georgia, sitatalna nga aggimgimong dagiti 120 a Saksi ni Jehova a kameng ti Kongregasion ti Gldani idi pagammuan ta rinaut ida ti adu a managderraaw. Dayta a bunggoy ket indauluan ni Vasili Mkalavishvili, maysa a naikkat a padi ti Orthodox. Ti bunggoy, a nakaiggem kadagiti pang-or a kayo ken landok a krus, sirurungsot a rinautda dagiti aggimgimong ket adu ti nadangran, dadduma kadagitoy ket nakaro a nasugatan. Maysa a babai ti permanente a nadangran ti matana. Di kumurang a 16 a tao ti kasapulan a maipadoktor. Idi nagpaarayat ti dadduma a Saksi iti estasion ti polisia, kinuna kadakuada ti hepe ti polisia a nakarkaro pay a kinaulpit ti linak-amda no isuna ti nangdangran kadakuada! Maysa kadagiti managderraaw ti nangi-video iti dayta nga iraraut sa naipabuya dayta idi agangay kadagiti estasion ti telebision iti pagilian ti Georgia. Nabatad a naipakita iti dayta a video no siasino dagiti rimmaut.a

Nagdarum dagiti Saksi a biktima, ngem saan a naaksionan ti inaramid dagiti rimmaut. Maysa nga imbestigador ti polisia a napusgan a mangimbestigar iti krimen ti nagkuna nga isu ket maysa nga Orthodox isu a masapul nga ayonanna ti relihionna. Gapu iti kinaawan aksion dagiti polis ken dagiti opisial ti gobierno, timmured dagiti panatiko iti relihion a mangaramid iti nasurok a sangagasut nga umasping nga iraraut.

Isu nga idi Hunio 29, 2001, nangidatag dagiti Saksi ni Jehova iti petision iti European Court of Human Rights.b Idi Mayo 3, 2007, nangipaulog dayta a korte iti din mabaliwan a desision. Iti dayta a pangngeddeng, ti pannakaraut dagiti Saksi ket silalawag nga inladawan ti korte ken kinondenarna ti kinaawan aksion dagiti opisial ti gobierno ti Georgia. Kinuna ti korte: “Obligasion dagiti autoridad . . . nga agtignay a dagus tapno makompirma ti impormasion” maipapan iti iraraut. Nailanad iti desision a “ti kinaawan aksion dagiti autoridad kadagiti kasta a krimen pakapuyenna ti panagtalek ti publiko iti hustisia ken iti abilidad ti gobierno a mangipatungpal iti pannakaannurot ti linteg.”

Ingngudo ti korte: “Yantangay ti iraraut idi Oktubre 17, 1999 maibusor kadagiti nagdarum ket isu ti damo a nakaro nga ibubusor kadagiti Saksi ni Jehova, ti kinaawan aksion dagiti autoridad ti nangtignay kadagiti isu met laeng a manangraut tapno isaknapda ti kinaranggas iti intero a Georgia maibusor kadagiti Saksi.”

Gapuna, inalangon ti korte ti kalintegan dagiti biktima ti kinaranggas, ken imbilinna a bayadan ti gobierno ti Georgia dagiti danios ken legal a gastos dagiti kameng ti kongregasion ti Gldani. Maragsakan unay dagiti Saksi ni Jehova idiay Georgia gapu ta malaksid nga awan unayen ti kinaranggas maibusor kadakuada, pinatalgedan pay ti korte nga adda kalinteganda nga aggigimong a sitatalna. Gapu iti dayta, agyamyamanda unay iti nailangitan nga Amada a ni Jehova a Dios, a nangiwanwan ken nangsalaknib kadakuada bayat ti amin a pakasuotanda.​—Salmo 23:4.

[Footnotes]