Tulongan Dagiti Agdadamo nga Agprogreso
1 Idi Abril 17, 1992, gistay 11.5 a milion a tattao iti sangalubongan ti nagtataripnong a nangrambak iti Memorial ti ipapatay ni Kristo. Anian a makapnek a makita iti kasta nga umariwekwek a nakitallaong “iti bantay ni Jehova”! (Mik. 4:2) Iti agdama adda agpito a milion a tattao a nangipakita ti maysa a rukod iti interes maipapan ti pudno a panagdayaw a saan pay laeng a managdayaw ken Jehova. Sigurado a dagiti sasao ni Jesus a “nawadwad ti anien” ket nabagbagas ita ti kaipapananna!—Mat. 9:37, 38.
2 Bayat ti bulan iti Mayo, aramidentayo ti nagpaiduma a regta a tumulong kadagidiay timmabuno iti Memorial nga agtultuloy nga agprogreso. Ti konduktor iti Panagadal ti Libro iti Kongregasion ti dakkel iti panulbek a papelna maipapan daytoy. Dagitoy dagiti nagkatlo a kalat (1) maiyurnos ti panagadal iti Biblia ti pagtaengan kadagiti agdadamo a timmabuno ti Memorial iti daytoy a tawen; (2) paregtaen dagidiay madaman a makiad-adal a maikarin nga agbalin a dibautisado nga agibumbunannag; ken (3) parang-ayen ti personal a pannakibiang iti tay-ak ti ministerio.
3 Iti promedio, 91,155 dagiti panagadal ti Biblia a naidaulo ditoy Pilipinas iti kada bulan ti 1992 a tawen iti serbisio. Mabalin nga awisen dagiti agibumbunannag ti konduktorda iti panagadal ti libro a kumuyog kadakuada kadagiti panagadal ti Biblia tapno maiyam-ammo kadagiti estudiante. (km 5/81 p. 4) Dadduma nga estudiante iti Biblia ti nalabit a tumabtabunon iti gimong ken maikaridan a makiraman iti panagbalaybalay a trabaho. Mangaskasabadan kadi iti impormal? Masabetdan aya dagiti kualipikasion nga agbalin a dibautisado nga agibumbunannag kas naituyang idiay Ti Ministeriotayo, pinanid 97-9? No kasta, mailawlawag kadakuada no kasano a mangrugida iti panagbalaybalay a trabaho kalpasan ti panagbalinda a dibautisado nga agibumbunannag.
4 Ditay koma malab-awan iti panagpipinnaregta ti maysa ken maysa iti Kristiano nga asosasion. (Heb. 10:24, 25) No adda nagsarimadeng iti ministerioda, dagiti konduktor ti panagadal iti libro ti mangaramid iti masinnunuo nga urnos a mangipaay iti tulong ken pammaregta. No dadduma kasapulan laeng ti nabara nga awis kadakuada a kumuyogda kadatayo iti tay-ak ti serbisio.
5 Tapno maaramid ti Mayo a nagpaiduma a bulan iti tay-ak ti serbisio kasapulanna iti kooperasion dagiti amin. Ti narayray a panangidaulo iti konduktor ti panagadal isut’ nasken tapno matulongan iti tunggal miembro ti grupona a naan-anay a makiraman iti ministerio. Adu dagiti makiraman iti auxiliary payunir a trabaho. Maiyurnos koma dagiti kanayonan a taripnong sakbay ti panangasaba. Maipaayan iti espesial nga asikaso dagiti nataengan, ket dagiti agtutubo ti makatulong iti daytoy babaen ti praktikal a wagas. Imutektekan dagiti nagannak nga ti intero a pamiliada ket makiramanda amin iti ministerio bayat ti Mayo. No amintayo ket itedna ti kasayaatanna ken Jehova iti daytoy tiempo ti panagani, kukuatayo ti nabaknang a bendisionna.