Espesial a Kingdom News nga Agpaay iti Tunggal Maysa
1 Manipud idi Abril 24, rinugiantayo ti nagiwaras iti espesial a Kingdom News a nangtignay ti interes dagiti maseknan a tattao iti tunggal lugar! Ti mensahena ket saan laeng a naintiempuan ngem naganat pay. Inyebkas dagiti agibumbunannag iti kada kongregasion ti tarigagayda a mangipaima iti daytoy a mensahe kadagiti rinibu a tattao. Ikagkagumaanyo aya ti naan-anay a pannakiraman?
2 Naipatulod ti umdas nga abasto ti Kingdom News iti kada kongregasion. Manon ti naiwarasyo? No saanyo pay a naiwaras ti kaadu ti impagarupyo a maaramid, ad-adu pay kadi ti maaramidyo sakbay nga agngudo ti panagiwaras inton Mayo 14? Ania ngata no agpalistakayo kas maysa nga auxiliary payunir?
3 Kitaen dagiti panglakayen no mabalin a mawanas ti amin a teritoria agingga ti Mayo 14. No saan, pakaammuan koma dagiti panglakayen dagidiay kaarruba a kongregasion tapno dumawatda iti tulong. Ti naimpusuan a panagreggettayo, agraman nasayaat a kooperasion dagiti kongregasion, mairingpasna ti trabaho.
4 Nalabit a masagrapyo ti kanayonan a rag-o iti daytoy a trabaho agsipud ta adu dagiti nakipaset, agraman agdadamo nga agibumbunannag ken agtutubo. Manamnama a mataginayon daytoy nga espiritu ti rag-o, a mamaregta iti amin nga agsarungkar kadagidiay nangipangag. Nakiddaw a mangidulintayo iti umiso a house-to-house record, a nakailistaan dagidiay nangipakita ti interes. Ti maudi a paset ti Mayo ti nasayaat a tiempo a panagsarungkar a buyogen iti kalat a mangirugi kadagiti baro a panagadal.
5 Ania ti sawen no agsarungkartayo? Masarakanyo nga epektibo no kunaenyo: “Nalabit a malagipyo daydi naibatik kadakayo a tract itay nabiit; pagarupek a nagundawayanyo a binasa ken inusig. Sigurado a ti mensahena ket namataud ti diskusion iti komunidadtayo, gapu ta saklawenna dagiti kangrunaan nga isyu a naipasango iti sangatauan.” Iturongyo ti atension iti sumagmamano a mamagpanunot a sasao iti maikadua a panid, sayo isaludsod: “Ania ti pagarupyo a masapul nga aramidentayo tapno masigurado a nakasaganatayon iti yeg ti masakbayan?” Palubosan a sumungbat. No interesado, pagsaritaan dagiti dadduma pay a punto iti pinanid 2-4 iti Kingdom News, sa itukon ti panagadal ti Biblia.
6 No agtrabahokayo iti teritoria ti sabali a kongregasion, siguruenyo nga ited iti dayta a kongregasion ti nagan dagiti interesado a nasarakanyo tapno mayurnos ti panagsarungkar dagiti agibumbunannag iti dayta a kongregasion.
7 Ti espesial a panagiwaras iti daytoy Kingdom News namarnuay ti ragsak ken nanggutugot kadatayo amin a mangparubrob ti reggettayo iti trabaho a panangikasaba iti Pagarian. Makapagtalektayo a daytoy ket maysanto a dakkel a balligi, a mangparayray ti gagar dagiti tattao iti amin a lugar maipapan iti naindaklan a nagan ni Jehova ken ti panggepna. (Isa. 12:4, 5) No ad-adu ti maaramidantayo, dakdakkel met ti rag-otayo.—Sal. 126:3.