Surnadanyo Dagiti Addaan Interes iti Kingdom News
1 Kadagiti Kallabes A Lawas, Tagtagiragsakentayo Ti Pribilehio A Panagiwaras Iti Kingdom News No. 35 A Napauluan “Addanto Ngata Tiempo Nga Agiinnayat Amin A Tattao?” Dagiti Agibumbunannag Iti Sadinoman Ikagkagumaanda Nga Idanon Iti Kaaduan A Maikari Daytoy A Ruar Ti Kingdom News. (Mat. 10:11) Nupay Nakaeskediul Nga Agpatingga Ti Kampania Inton Domingo, Nobiembre 16, No Adda Pay Teritoria A Di Nalpas, Mabalin A Kiddawen Dagiti Panglakayen Nga Ituloyyo Ti Agiwaras Iti Kingdom News No. 35 Agingga A Maibus Ti Abasto Ti Kongregasion.
2 Daytoy A Kingdom News Tinignayna Ti Interes Ti Adu A Tattao. Makitada A Kaaduan A Tattao Napukawdan Ti Nainkasigudan Nga Ayatda Ket Gapuna Pampanunotenda No Anianto Ti Masanguanan. (2 Tim. 3:3) Kayattayo A Surnadan Ti Napataud Nga Interes.
3 Nasayaat ti Maar-aramidan ti Kingdom News: Kabayatan ti kampania iti Kingdom News idi 1995, nangikoreo ti maysa a kabsat a baket iti sumagmamano a kopia. Nakigimong idiay Kingdom Hall ti maysa a babai nga immawat iti maysa a kopia gapu ta kayatna nga ammuen ti ad-adu pay maipapan iti pammati dagiti Saksi ni Jehova. Iti dayta a gimong immanamong a mayadalan iti Biblia ket kalpasanna manmanon a manglangan iti gimong. Di nagbayag, sinuratanna ti dati a relihionna, tapno agikkaten a miembro!
4 Ita, ginasgasut a tattao iti teritoria nabasadan ti mensahe iti Kingdom News No. 35. Ngem aniat’ reaksionda iti dayta? Uray naguyugoyda iti nabasada, kaaduanna ti di agtignay agingga nga adda sumarungkar kadakuada a Saksi ni Jehova. Agpalplanokayo kadi a sumarungkar? Ti naayat a pannakaseknan iti padatayo a tao tignayennatayo koma a mangaramid iti kasta. Rumbeng a masarungkaran amin a nangipakita iti interes iti Kingdom News.
5 Aniat’ Kunaenyo no Sumarungkarkayo? Mabalin a komentuanyo iti apagbiit ti mensahe iti Kingdom News sa mangpataudkayo iti mamagpanunot a saludsod. Dumngeg a naimbag bayat nga agsasao ti bumalay tapno maammuanyo ti adda iti panunotna. Kalpasanna iturongyo ti atensionna iti maitutop a punto iti broshur a Kalikaguman, a naitampok iti Kingdom News. No dumngegda kadakayo, ikagumaanyo nga irugi a dagus ti panagadal iti Biblia.
6 Adtoy ti sumagmamano a maisingasing a presentasion a mabalinyo a padasen no sublianyo dagidiay nangipakita iti interes iti “Kingdom News” No. 35:
◼ “Mabalin a malagipyo daydiay nayimprenta nga impormasion a nabiit pay nga imbatik kadakayo. Ti mensahena adda nakainaiganna iti maysa a napateg nga isyu a nangbingbingay iti sangatauan itatta—ti kinaawan ayat kadagiti sabsabali.” Iturongyo ti atension iti ebidensia a naidatag iti panid 2 ti Kingdom News iti sidong ti paulo a “Limmamiisen ti Ayat iti Kaarruba.” Sa isaludsodyo, “Panagkunayo kastoy ngata ti pinanggep ti Dios a panagbiag ti sangatauan?” Palubosanyo a sumungbat. Iturongyo iti leksion 5 iti broshur a Kalikaguman, ket ikagumaanyo nga irugi ti panagadal iti Biblia.
◼ “Idi damo a nagam-ammota, adda impormasion nga imbatik kenka maipapan iti tema nga ‘Addanto Ngata Tiempo nga Agiinnayat Amin a Tattao?’ Panagkunayo posible ngata ti kasta a lubong?” Palubosanyo a sumungbat. Iturongyo iti leksion 6 iti broshur a Kalikaguman, sa basaenyo ti parapo 6. Kalpasanna basaenyo ti kari ti Dios iti Mikias 4:3, 4. No agparang nga interesado ti bumalay, itukonyo ti broshur ken panagadal.
◼ “Iti daydi naudi nga ibibisitak kadakayo, adda imbatik a material a napauluan iti ‘Addanto Ngata Tiempo nga Agiinnayat Amin a Tattao?’ Ituktukonna ti libre a panagadal iti Biblia iti pagtaengan. Nagsubliak tapno ipakitak kadakayo ti us-usarenmi a katulongan iti panagadal. [Ipakitayo ti libro a Pannakaammo.] Daytoy a libro nabatad nga ilawlawagna ti maipapan iti tiempo inton agiinnayat amin a tattao, ken sungbatanna ti dadduma pay a saludsod a mabalin a pampanunotenyo maipapan iti: Apay a lumakay ken mataytayo? Apay nga ipalubos ti Dios ti panagsagaba? Aniat’ mapasamak kadagiti natay a patpatgentayo? Di la mabalin nga idemostrak kadakayo ti panagadal?” No agkedked ti bumalay, saludsodanyo no kayatna a basaennanto lattan ti libro. No kayatna, itukonyo dayta kenkuana. Iplanoyo ti panagsubliyo.
7 No mawanasen a naan-anay ti teritoria iti Kingdom News No. 35, mabalintayo nga itukon ti libro a Pannakaammo iti nabatbati a paset ti bulan. Ti nawadwad a pagpilian kadagiti singasing iti panangiparang iti daytoy a libro ket masarakan iti likudan ti Ministeriotayo iti Pagarian kadagiti ruar ti Marso, Hunio, ken Nobiembre 1996; ken Hunio 1997.
8 Daytoy a naisangsangayan a panagiwaras iti Kingdom News tignayennatayo koma amin a mangparayray iti panagreggettayo a mangasaba. Iti tulong ni Jehova makapagtalektayo iti panagballigi daytoy a kampania, a tulongantayo dagiti tattao tapno maammuanda ti panggep ti Dios a panagiinnayat ti intero a sangatauan. Sapay koma ta itultuloy a bendisionan ni Jehova ti naanep a panagreggettayo bayat a surnadantayo dagiti addaan interes iti Kingdom News.