Panangparayray iti Interes a Natukay Babaen ti Kingdom News No. 36
1 Naiwarasyo kadin ti amin a naited kadakayo a Kingdom News No. 36? Idatagna ti naintiempuan a saludsod a masapul nga usigen ti isuamin: “Ti Baro a Milenio—Ania a Masakbayan ti Agur-uray Kenka?” Nagduduma ti ninamnama dagiti tattao nga isangbay ti baro a milenio idi immadani ti tawen 2000. Ti Kingdom News No. 36 usigenna ti sumagmamano kadagitoy nga inanama ken ipalagipna kadatayo a saan a mapangnamnamaan dagiti kasasaad ti lubong. Ti Sangaribu a Tawen a Panagturay ni Kristo Jesus ti kakaisuna a milenio a mangyeg iti talna ken talged a tartarigagayan ti kaaduan. Nagutugottayo nga agiwaras iti Kingdom News No. 36 iti amin a masabattayo gapu ta mamatitayo a pudpudno ti Pagarianna.
2 Dagiti Reaksion iti Kingdom News: Addada pammaneknek a makatulong iti trabahotayo ti panangiwaras kadagiti Kingdom News iti napalabas. Kastoy ti insurat ti sanga nga opisina ti Canada maipapan iti Kingdom News No. 35: “Daytoy nga espesial a kampania ket sireregta a sinuportaran dagiti agibumbunannag ken payunir idiay tay-ak, ket adu ti makaparegta a kapadasanda.” Sigurado a kasta met ti gagaryo a nangiwaras iti Kingdom News No. 36.
3 Nakaeskediul nga agpatingga iti Nobiembre 17, 2000, ti agdama a pannakaiwaras ti Kingdom News. Nawanasen kadi ti amin a teritoria ti kongregasionyo? No saan pay, mabalin a kiddawen dagiti panglakayen nga itultuloyyo ti agiwaras agingga iti agtapus ti Nobiembre.
4 Ania ti reaksion dagiti nawarasanen iti Kingdom News No. 36 iti lugaryo? Manmano ti agsurat iti kupon nga agkiddaw iti kopia ti broshur a Kalikaguman ken/wenno ti panagadal iti Biblia iti pagtaengan. Ngem kaaduan nga interesado iti tema a mainaig iti milenio ti santo la agtignay no sumarungkar ti maysa kadagiti Saksi ni Jehova. Masapul a masarungkaran ti amin nga interesado. Kaano ti kasayaatan a panagsarungkar? Masapul nga iti kabiitan a tiempo no mabalin.
5 Usigenyo dagitoy a kapadasan a resulta ti panangsarungkar kadagiti napaimaan iti Kingdom News No. 35. Maysa a payunir idiay Ireland ti nakaipaima iti Kingdom News iti makinkukua ti maysa a restawran. Naayatan ti babai iti mensahe ket kiniddawna a sumarungkar ti kabsat. Kalpasan ti dua nga aldaw, nagsubli ti kabsat a babai ket nairugi ti panagadal iti Biblia. Idiay Denmark, adda balay nga awan ti taona ti naibatian iti kopia ti Kingdom News. Ti babai nga agnanaed sadiay impatulodna iti daydi met la nga aldaw ti kupon iti sanga nga opisina, a nangipatulod iti dayta iti lokal a kongregasion. Iti daydi met la a lawas, simmarungkar ti dua a sister, nayurnos ti panagadal, ken timmabuno ti babai iti gimong idiay Kingdom Hall!
6 No Ania ti Sawen No Agsarungkarkayo: Nalaka ken naragsak a paset ti ministeriotayo ti panagsarungkar kadagiti napaimaan iti Kingdom News. No agsarungkarkayo, maikanatad nga agitugotkayo iti kopia ti Kingdom News No. 36 ta mabalin nga awanen ti kopia ti bumalay. Mabalinyo nga usaren dagitoy a singasing.
7 Kalpasan a maipalagipyo iti bumalay no siasinokayo, mabalinyo a kunaen:
◼ “Naibatiankayo iti pagbasaan a napauluan ‘Ti Baro a Milenio—Ania a Masakbayan ti Agur-uray Kenka?’ Di aya makaparegta a mabasa nga iti di mabayag mangrugin ti Sangaribu a Tawen a Panagturay ni Kristo Jesus a mamagbalin iti daga a Paraiso? [Ipakita dagiti ladawan ti Paraiso iti Kingdom News No. 36.] Iti maudi a panid, maawiskayo nga agkiddaw iti kopia ti broshur nga Ania ti Kalikaguman ti Dios Kadatayo?” Ipakitayo ti broshur, ukagenyo iti leksion 5, basaenyo ti umuna a saludsod ken ti parapo 1 ken 2, ken pagkomentuenyo ti bumalay. Basaen ken ilawlawagyo ti maysa wenno dua a teksto. No mabalin, usigenyo ti maysa pay a saludsod ken parapo, sa iyurnosyo ti agsarungkar tapno ituloy ti saritaan.
8 Yantangay ti pasarunson a tukon para iti Nobiembre ket ti broshur a “Kalikaguman” wenno ti libro a “Pannakaammo,” mabalinyo a kunaen:
◼ “Iti nabiit pay nga isasarungkarko, imbatiankayo ti kopia ti ‘Ti Baro a Milenio—Ania a Masakbayan ti Agur-uray Kenka?’ Ituktukon dayta ti libre a panagadal iti Biblia iti pagtaengan. Addaak ita tapno ipakitak kadakayo ti katulongantayo nga agadal. [Iruaryo ti broshur a Kalikaguman, ken ipakitayo ti maudi a panid; wenno iruaryo ti libro a Pannakaammo, ken ukagenyo iti panid 188-9.] Ti Milenio a sarsaritaen ti Biblia iyegnanto dagiti kasasaad a kas makitayo iti daytoy a ladawan. Tapno masagraptayo ti biag iti Paraiso, masapul a gun-odentayo ti umiso a pannakaammo iti Dios. Pangngaasiyo ta palubosandak a mangidemostra iti apagbiit no kasanotay nga adalen ti Biblia.”
9 Ti pannakaiwaras ti Kingdom News No. 36 ginutugotnatayo nga ad-adda pay a makiraman iti ministerio, agpaay iti nasaknap a panangsaksi. Mabalin a tinukay daytoy ti interes ti adu a tattao iti teritoria. Babaen ti tulong ni Jehova, ti nagkaykaysa a panagreggettayo a mangparayray iti kasta nga interes ket agbanag iti naragsak a pannakasaraktayo iti ad-adu nga arig-karnero a tattao.—Mat. 10:11; Ara. 13:48, 49, 52.