Tulongan Dagidiay Awanan Pammati
1 Iti daytoy nga aldaw ken panawen, popular ti pannakabigbig kas edukado ken progresibo iti panagpampanunot. Maidaydayaw dagiti natauan a pilosopia ken pinarparnuay a teoria, idinto a di maikankano dagiti naespirituan a pagalagadan. Dagiti napasnek a tattao nga interesado iti simple a bambanag ken dagiti maawatan a kinapudno gundawayanda a sukimaten ti libro a Life—How Did It Get Here? By Evolution or by Creation? Makatulong daytoy a libro kadagidiay awanan pammati. (Roma 1:19, 20) Siguruenyo a sarungkaran amin dagidiay mangipakita iti interes.
2 Mabalinyo a rugian ti saritaan iti kastoy:
◼ “Masiguradok a pagaammoyo nga adu kadagiti edukador ti mangsuportar iti pammati a timmaud ti tao babaen ti ebolusion. Isurona a naiparparna laeng a timmaud ti amin a banag. Ania ti makunayo iti dayta? [Palubosan a sumungbat.] Maibilang pay laeng daytoy nga ideya a kas maysa a teoria. Ti teoria ket ‘maysa a pattapatta’ wenno ‘di mapaneknekan a pagarup.’ Iti sinigsiglo namati dagiti tao a ti daga ket patad; ita ammotayon a dayta a pagarup ket minamaag a saan a naibatay iti kinapudno. Mabalin ngata a pudno met dayta iti teoria ti ebolusion?” Basaen ti panglukat a komento iti panid 4, kalpasanna pagsaritaan ti Isaias 42:5.
3 Wenno mabalinyo nga usaren daytoy a yaasideg no agsarungkarkayo:
◼ “Gagangay ti makasabet kadagiti tattao a di mamati iti Dios. Iti tawtawen a naglabas, manmano dagiti kasta a tattao. Apay a kunaenyo nga adu ti napukawen ti pammatida iti Dios? [Palubosan a sumungbat.] Adu ti mangipuon ti pannakapukaw ti pammatida iti nakaam-amak nga ikakaro ti kinaranggas ken rigat ditoy lubong. Agrasonda a no adda mannakabalin-amin a Dios, apay a dina pagpatinggaen amin dagitoy a panagsagaba? Dagidiay di makasarak iti makapnek a sungbat iti dayta a saludsod ket masansan nga agbalinda nga ateista. Ngem adda aglaplapusanan nga ebidensia a mangpatalged nga adda Dios ket iti saan a mabayag aramidenna daytoy daga a lugar ti ragsak ken talna.” Ituloy ti saritaan babaen ti panangusar iti Nainkasuratan a kapanunotan a masarakan iti parapo 19 idiay panid 196.
4 Babaen iti iggemyo a Biblia, mabalinyo a luktan ti saritaan babaen ti panagkuna:
◼ “Immaykami manen tapno maipakitami no apay a ti panagadal iti Biblia ket praktikal iti kaaldawantayo. Adda Biblia ti kaaduan a tattao, ngem manmano ti mangiwaya a mangbasa iti dayta. Sibabatad ti panangibaga dagiti dadduma kadakami a saanda unayen nga agtalek iti Biblia. Aniat’ makunayo iti dayta? [Palubosan a sumungbat.] Ti maysa kadagiti bambanag a mangipapati kadatayo a ti Biblia ket naipaltiing a Sao ti Dios isut’ pannakatungpal dagiti padtona.” Iturong iti teksto ti Kasuratan iti parapo 6 idiay panid 234.
5 Mabalin a makatukay daytoy a kapanunotan iti paborable a sungbat:
◼ “Makitatayo ti pintas ken nakaskasdaaw nga ebidensia ti kinasirib kadagiti bambanag a nanglawlaw kadatayo ditoy daga. Daytoy nakaay-ayat a ladawan ti ilelennek ti init ket maitutop a pagarigan.” [Ipakita ti ilustrasion iti panid 12 ken 13.] Dakamaten dagiti punto manipud “Some Things to Think About” ket ilawlawag no kasano a mangted daytoy a libro iti makapnek a sungbat kadagiti nasken a saludsod maipapan iti lubongtayo.
6 Agbalintayo a bendision kadagiti dadduma no usarentay daytoy a libro a tumulong kadakuada a mangsarak iti nalagda a pakaibatayan ti pammati iti Namarsua kadakuada.