Ipaay ti Sagrado a Serbisio iti Aldaw ken Rabii
1 Maysa a nagpaiduma a pribilehio ti naidatag kadatayo. Pasettayo ti sangalubongan nga organisasion dagiti ebanghelisador nga us-usaren ni Jehova a mangitungpal iti kasaknapan pay laeng a trabaho a pannakaiwaragawag ti Pagarian! (Mar. 13:10) Makipaspasettayo kadi iti daytoy a trabaho aginggat’ mabaelantayo?
2 Ditay ammo no manonto pay dagiti mangipangag iti panangasabatayo. Ipanamnama ni Jehova kadatayo nga addanto “maysa a dakkel a bunggoy” nga amin “mangipapaayda ti sagrado a panagserbi kenkuana iti aldaw ken rabii.” (Apoc. 7:9, 15) Saan laeng a basta managdengngeg, wenno tumabtabuno kadagiti gimong dagiti lima a milion a Saksi. Nagagetda a mangiwaragawag iti naimbag a damag iti sangalubongan!
3 Panunotenyo ti naindaklan a panangsaksi a maipaay no igay-at ti tunggal maysa kadatayo nga iranud ti kinapudno iti uray maysa laeng a tao iti kada aldaw. Iti di mabayag, nalabit a makasaotayo ti tunggal maysa iti teritoriatayo! Tignayennatay koma ti apresasiontayo ken Jehova nga agsao a sirarayray maipapan kenkuana.—Sal. 92:1, 2.
4 Tulongan ti Sabsabali a Mangipaay iti Sagrado a Serbisio: Bayat ti napalabas a tawen ti serbisio ditoy Pilipinas, naikondukta ti promedio a 95,800 a panagadal ti Biblia iti kada bulan. Kalattayo a tulongan dagitoy a tattao nga agbalin a disipulo ni Jesus. (Mat. 28:19, 20) Nagprogreson ti adu kadakuada babaen ti regular nga itatabunoda kadagiti gimong. Nangrugidan a nakisao kadagiti am-ammoda “maipapan kadagiti natan-ok a bambanag ti Dios.” (Ara. 2:11) Mabalin kadi nga awisen idan a makiraman iti ministerio iti publiko?
5 Bayat ti Abril reggetantay koma nga awisen dagiti agdadamo a maikarin a makikuyog kadatayo iti tay-ak ti serbisio. Inyebkasen aya ti estudianteyo a tarigagayanna nga aramiden daytoy? No kasta, maragpatna kadin dagiti Nainkasuratan a kasapulan? (Kitaenyo Ti Ministeriotayo a libro, pinanid 97-9.) No mariknayo a kualipikadon ti estudiante, pakisaritaanyo daytoy iti mamangulo a manangaywan, a mangyurnos iti dua a panglakayen a mangusig iti dayta. No ti estudiante ket kualipikado a maawat a kas di bautisado nga agibumbunannag, awisenyo a makikuyog kadakayo idiay tay-ak.
6 Mabalin nga usigen dagiti nagannak no maikarin dagiti annakda nga agbalin a di bautisado nga agibumbunannag. (Sal. 148:12, 13) No iyebkasen ti anakyo a kayatna ti agserbi iti Pagarian ken addaan naimbag a kababalin, mabalinyo nga asitgan ti maysa kadagiti panglakayen iti komite ti serbisio. Kalpasan a makasaritada ti ubing, ikeddeng ti dua a panglakayen no kualipikadon nga agbalin nga agibumbunannag. Adda espesial a pakaigapuan ti panagrag-o no makidanggayen dagiti ubbing kadatayo a mangidaydayaw iti Dios!
7 Sapay koma ta naan-anay a gundawayan ti tunggal maysa kadatayo ti nagpaiduma a pribilehiotayo a mangidayaw ken Jehova iti “kasta unay.” Ditay ipalubos a lumabas ti maysa nga aldaw a ditayo makaipaay iti daytoy a sagrado a serbisio!—Sal. 109:30; 113:3.