Panangiwarnak iti Naimbag a Damag Maipapan iti Nasaysayaat a Banag
1 Iti 117 a tawenen, nagbalin Ti Pagwanawanan a manangidepensa iti kinapudno ti Biblia. Iti agdama, 18,950,000 a kopia ti kada ruar ti maimalmaldit iti 125 a pagsasao. Nabayag metten nga itantandudo ti Agriingkayo! ti Sao ti Dios, ket addaan itan iti sirkulasion a 15,730,000 iti 80 a pagsasao.—Idiligyo ti Colosas 1:23.
2 Punnuan Dagiti Magasin ti Naespirituan a Kasapulan: Timmulong Ti Pagwanawanan ken Agriingkayo! a nangpunno iti naespirituan a kasapulan dagiti minilion a nasingpet-panagpuspusona a tattao. Kas pagarigan, iti Pagwanawanan a Pebrero 1, 1996, naadaltayo a kasapulan ti agtalek ken Jehova ken iti Saona. Pinaregtanatayo ti Marso 1, 1996 a Pagwanawanan nga umagawa iti panagserbi ken Jehova ken mangnamnama kenkuana. Anian a makaparegta ti pannakausig ti padto ni Sofonias! Sa adda makapabileg-pammati a pannakasalaysay ti Nakristianuan a kinasungdo iti Pagwanawanan a Marso 15, 1996. Impaganetget ti ruar a Mayo 15 ti pateg ti regular a panagbasa ken panagadal iti Sao ti Dios. Paunegen dagitoy nga artikulo ti pannakaawat ken panangipategtayo iti Sao ken Pagarian ti Dios.
3 Mainayon pay, naglaon dagitoy a magasin kadagiti naintiempuan nga artikulo maipapan iti Nakristianuan a kababalin ken dadduma pay a napateg a suheto. Sibabatad nga ilawlawagda dagiti pudno nga isyu a mangapektar iti biagtayo. Kas resultana, tagtagiragsakentayo ti nasaysayaat a biag ita bayat nga ur-urayentayo ti pannakatungpal dagiti kari ti Dios maipapan kadagiti nasaysayaat a banag iti masanguanan.—Isa. 48:17; 1 Tim. 6:19.
4 Ipakita ti ababa a panangrepaso iti naibaga iti panid 4 ti kada ruar ti Agriingkayo! no apay nga irekomendatayo a basaen dagiti tattao iti uray sadino daytoy a magasin, agtutubo man wenno nataengan. Kunana: “Agpaay a pakalawlawagan ti intero a pamilia ti Agriingkayo! Ipakitana no kasano a parmeken dagiti problema ita. Agipadamag, iyam-ammona dagiti tattao iti adu a lugar, usigenna ti relihion ken siensia. Ngem ad-adu pay ti aramidenna. Sukimaten ken ipaganetgetna ti pudno a kaipapanan dagiti agdama a pasamak, ngem kanayon a neutral iti politika ken saan a mangidumduma iti puli. Kangrunaanna, pabilgen daytoy a magasin ti panagtalek iti kari ti Namarsua a natalna ken natalged a baro a lubong a dandanin mangsukat iti agdama a dakes, nakillo a sistema ti bambanag.”
5 Iranudyo Dagiti Magasin Kadagiti Dadduma: Naparaburkay koma a mangiwaras iti Pagwanawanan ken Agriingkayo! (Idiligyo ti 1 Timoteo 6:18.) Mangawitkayo kadagiti kopia nga itukonyo iti asinoman a maam-ammoyo. (Ecl. 11:6) Mabalintay amin, agraman dagiti agtutubo ken agdadamo nga agibumbunannag, ti makiraman a mangiwaras kadagiti magasin iti daytoy a bulan babaen ti panangusar kadagiti ababa a presentasion a naibasar kadagiti agdama a ruar. Ammuenyo a naimbag dagiti linaonda, ken itukonyo ida a di agpangadua.
6 Naglaon Ti Pagwanawanan ken Agriingkayo! iti impormasion a kasapulan ti tunggal tao. Ti panangiwaras kadagitoy ti maysa kadagiti kasayaatan a wagas a matulongantayo dagiti sabsabali a mangammo iti naimbag a damag a mabiiten a dumteng ti nasaysayaat a banag!