Dagiti Panagadal iti Biblia a Mangpataud Kadagiti Adalan
1 “Ania ti makalapped kaniak a mabautisaran?” insaludsod ti eunuko nga Etiope kalpasan nga ‘indeklara [ni Felipe] kenkuana ti naimbag a damag maipapan ken Jesus.’ (Aramid 8:27-39) Iti kasasaad ti eunuko, adda panagayatna idin kadagiti surat nga impaltiing ti Dios, ket kalpasan nga inawatna ti naespirituan a tulong ni Felipe, sisasaganan nga agbalin nga adalan. Ngem saan nga amin a tattao patienda a kasapulan a sukimatenda ti Kasuratan.
2 Pagyamanan ta impaay ti organisasion ni Jehova ti broshur nga, Ania ti Kalikaguman ti Dios Kadatayo?, a mangparegta kadagiti tattao tapno sukimatenda a mismo ti mensahe ti Biblia. Iti sumagmamano laeng nga abbaba a panid, adu ti maadal dagiti tattao maipapan iti Kasuratan. Kasta met, iti Leksion 15 ken 16 tulonganna ida a mangkita no ania ti kalikaguman ti Dios kadakuada. Daytoy nagsayaat nga instrumento nadisenio a tumulong kadagiti tattao tapno iti di mabayag agtignaydan a mangparagsak ken Jehova.
3 No mangirugikayo iti panagadal iti Biblia, makatulong a repasuenyo dagiti nagsayaat a singasing a naipablaak iti suplemento ti Ministeriotayo iti Pagarian a Hunio 1996 no kasano ti mangidaulo iti nabunga a panagadal iti libro a Pannakaammo. Kabayatan ti panagadal, usigenyo ti panagrang-ay ti estudiante tapno makitayo no ania dagiti benneg nga agkasapulan iti ad-adda pay nga atension. Paregtaenyo ti estudiante nga isaganana a nasaksakbay dagiti adalen, a kitaenna dagiti kasuratan. Dagiti komento iti bukodna a sasao mabalin a mangyanninaw iti naimpusuan a panangapresiarna iti kinapudno. Masansan a napartak ti irarang-ay dagidiay agbasbasa pay kadagiti publikasion ti Sosiedad ken regular a tumabtabuno kadagiti gimong ti kongregasion. Iparegtayo ti di pormal a panangisaritana kadagiti maad-adalna iti sabsabali. Siaasi nga ipakitayo kenkuana dagiti masapul nga aramidenna tapno rumang-ay iti naespirituan. Saan nga agnanayon nga iyadalantayo dagidiay saan a determinado. Masapul a dagiti estudiante ti mangikagumaan nga agadal, sititibker a dumasig iti kinapudno, ken rumang-ay agingga nga agdedikar ken agpabautisarda.
4 Iti dadduma a sangakabbalayan, nasursurok ngem maysa ti maidadaulo a panagadal, gapu ta naisina ti panagadal ti sabsabali a miembro ti pamilia. Nupay kasta, kaaduanna nasaysayaat ti agkaykaysa a panagadal ti pamilia, tangay tumulong dayta a mamagkaykaysa iti pamilia iti naespirituan.
5 Imbilin ni Jesus nga agaramidtayo kadagiti adalan. (Mat. 28:19) Tapno maaramidtayo dayta, masapul a mangidaulotayo kadagiti panagadal iti Biblia a tumulong kadagiti sabsabali a rumang-ay agingga nga isaludsodda, “Ania ti makalapped kaniak a mabautisaran?”