Panangasaba Babaen ti Nasayaat a Kababalin
1 Iti daytoy agdama a nalulok a kagimongan, adu dagiti agtutubo a saysayangenda ti biagda iti droga, imoralidad, iyaalsa, ken kinaranggas. Maisupadi iti dayta, makapabang-ar a makita ti mapagulidanan a kababalin dagiti natakneng nga agtutubo iti kongregasion Kristiano ket sigurado a nakaim-imnas iti imatang ni Jehova. Nabileg dayta a pammaneknek a mabalin a mangallukoy kadagiti sabsabali iti kinapudno.—1 Ped. 2:12.
2 Ipakita dagiti adu a kapadasan a ti nasayaat a kababalin dagiti Kristiano nga agtutubo adda positibo nga epektona kadagiti makaimatang. Iti panangtukoyna iti agtutubo a Saksi nga estudiantena, impakaammo ti maysa a maestra iti intero a klase a ti Dios daytoy a balasitang, ni Jehova, isu ti pudno a Dios. Imbagana daytoy agsipud ta kanayon a mararaem ti kababalin ti balasitang. Sabali pay a mannursuro ti nagsurat iti Sosiedad, a kunana: “Kayatkay a komendaran gapu kadagiti natakneng nga agtutubo iti relihionyo. . . . Pudno a mapagulidanan dagiti agtutuboyo. Raraemenda dagiti nataengan, nadayawda, ken natakneng ti panagkawkawesda. Ken kabesadoda unay ti Bibliada! Dayta ti pudpudno a relihion!”
3 Nasdaaw ti sabali pay a maestra iti nasayaat a kababalin ti pito ti tawenna a Saksi iti klasena. Nagustuanna ti naemma ken makaay-ayo a personalidad ti ubing a lalaki, a nangiduma unay kenkuana kadagiti sabsabali nga ubbing. Nasdaaw iti kinapasnekna iti narelihiosuan a pammatina—di mabain a naiduma gapu iti pammatina. Makitana a nasanay ti konsiensiana ken makabael “a mangilasin agpadpada iti umiso ken di umiso.” (Heb. 5:14) Idi agangay, simmarungkar ti ina ti ubing iti daydiay a maestra, ket nairugi ti panagadal iti Biblia. Nagangayanna, nabautisaran ti maestra sa kalpasanna nagbalin a regular pioneer!
4 Naimpluensiaan ti maysa nga agtutubo a lalaki iti nasayaat a kababalin ti maysa a Saksi a balasitang idiay pages-eskuelaanna. Pudno a naidumduma—nakadaydayaw, napasnek nga agadal, ken kanayon a natakneng ti panagkawkawesna; kasta met, saan a kas iti sabsabali a babbai, pulos a di makigargarampang kadagiti lallaki. Makitana nga agbibiag a maitunos kadagiti prinsipio ti Biblia. Nagsalsaludsod kenkuana ti agtutubo a lalaki maipapan iti narelihiosuan a pammatina ket nasdaaw iti naammuanna. Rinugianna ti nakipagadal, di nagbayag nabautisaran, ket idi agangay nagpayunir ken nagserbi idiay Bethel.
5 No maysakayo nga agtutubo a Kristiano nga agtarigagay a mangipaay iti nasayaat a pammaneknek kadagiti sabsabali, annadanyo ti kababalinyo iti amin a wagas. Diyo pulos itulok a kumapuykayo babaen ti iyaanamongyo kadagiti nalulok a kababalin, panangmatmat, wenno estilo ti panagbiag daytoy a lubong. Mangipakita iti nasayaat nga ulidan iti panagsasaoyo, panagkawkawes, ken panaglanglanga, saan laeng a no makiramramankayo iti tay-ak ti ministerio ken kadagiti gimong ti kongregasion no di pay ket bayat nga addakay idiay eskuelaan ken kabayatan ti panaglinglingay. (1 Tim. 4:12) Pudno nga agrag-okayto inton adda aginteres iti kinapudno gapu ta ‘isilsilnagyo ti silawyo’ babaen ti nasayaat a kababalinyo.—Mat. 5:16.