Dagiti Agtutubo nga Agsilsilnag kas Silsilaw
1. Kasano nga ipakita ti Biblia a naiduma unay dagiti Kristiano, ken kasano nga agaplikar dagita a sasao kadagiti agtutubo a Kristiano ita?
1 Kinuna ni Jesus kadagiti adalanna: “Dakayo ti silaw ti lubong.” (Mat. 5:14, 16) Nakakadkadlaw a naidumada ta kasda la siudad a naisaad iti turod, a rumimrimat iti kainaran. Adu nga agtutubo a Kristiano ita ti ‘agsilsilnag kas silsilaw iti lubong’ babaen ti umiso a kababalin ken napinget a panangasabada.—Fil. 2:15; Mal. 3:18.
2. Ania dagiti sumagmamano a pamay-an a mabalinyo a kasabaan dagiti mannursuro ken kaklaseyo?
2 Idiay Eskuelaan: Kasano a makakasabakayo idiay eskuelaan? Dadduma nga agtutubo gundawayanda dagiti panagsasarita iti klase maipapan kadagiti suheto kas iti droga, ebolusion, Holocaust, ken dadduma pay. Maysa a kabsat a babai ti natudingan a mangisurat iti salaysay maipapan iti terorismo. Inusarna dayta a gundaway a mangasaba maipapan iti Pagarian ti Dios kas pudpudno a namnama ti sangatauan. Nagustuan ti mannursuro ti nagsayaat ti pannakaisaganana a salaysay, ket daytoy ti nangilukat iti gundaway para iti kanayonan a panangsaksi.
3. Idiay eskuelaan, kasanoyo a maisilnag ti silawyo babaen ti kababalinyo?
3 Ti maysa pay a pamay-an tapno agsilnagkayo kas silsilaw ket babaen ti kababalin ken natakneng a panagkawkawes ken panaglanglangayo. (1 Cor. 4:9; 1 Tim. 2:9) No makita dagiti estudiante ken mannursuro a naiduma ti aw-awidyo, mabalin a maallukoy ti dadduma iti kinapudno gapu iti nasayaat a kababalinyo ken mangted dayta kadakayo iti gundaway a mangiranud kadagiti kinapudno iti Biblia. (1 Ped. 2:12; 3:1, 2) Mabalin a saan a nalaka nga iparangarang ti nadiosan a kondukta, ngem sibabaknang a bendisionannakayo ni Jehova. (1 Ped. 3:16, 17; 4:14) Tapno matukay ti interes dagiti sabsabali iti naimbag a damag, mabalinyo ti agbasa iti naibatay iti Biblia a literatura kabayatan ti recess wenno mabalinyo nga ibati dayta iti lugar a nalaka a makita.
4. Ania dagiti sumagmamano a pagsayaatan ti panangasaba idiay eskuelaan?
4 Ti panangisilnagyo iti silawyo idiay eskuelaan pabilgenna ti pammatiyo ken tulongannakayo a mangipanayag iti panagserbiyo ken ni Jehova. (Jer. 9:24) Proteksion met dayta. Kinuna ti maysa a kabsat a babai, “Ti maysa a pagsayaatan ti panangisarsaritak kadagiti kaklasek iti maipapan kadagiti patpatiek ket saandak a piliten nga agaramid kadagiti banag a maikaniwas iti ibagbaga ti Biblia.”
5. (a) Kasano a palpalawaen dagiti dadduma nga agtutubo ti ministerioda? (b) Ania dagiti naespirituan a kalatyo?
5 Panangpalawa iti Panagserbi: Ti sabali pay a pamay-an a panagsilnag ti adu nga agtutubo kas silsilaw ket babaen ti panangpalawada iti ministerioda. Kalpasan a nagturpos iti haiskul, maysa a kabsat a lalaki ti immakar tapno agserbi iti lugar nga agkasapulan iti ad-adu nga agibumbunannag iti Pagarian. Isu ket paset ti bassit a kongregasion nga addaan iti maymaysa a panglakayen. “Maragragsakanak iti biagko ditoy,” insuratna iti gayyemna. “Makapabang-ar unay ti ministerio! Makisaritakami iti agarup 20 minuto iti kada balay gapu ta dumngeg dagiti tattao iti amin nga ibagami kadakuada.” Innayonna: “Aramiden met koma daytoy ti tunggal agtutubo tapno mariknada ti marikriknak. Awanen ti nasaysayaat pay no di ti panangusar iti amin nga adda kadatayo iti panagserbi ken ni Jehova.”
6. Apay a maipagpannakkelyo dagiti agtutubo iti kongregasionyo?
6 Pudno unay a maipagpannakkeldakayo nga agtutubo nga agsilsilnag kas silsilaw iti lubong! (1 Tes. 2:20) Bayat nga agserbikayo ken ni Jehova iti intero a puso, kararua, panunot, ken pigsayo, umawatkayto “iti maminsangagasut ita iti daytoy a las-ud ti tiempo . . . [ken] iti um-umay a sistema ti bambanag agnanayon a biag.”—Mar. 10:29, 30; 12:30.