‘Panagsilnag kas Silsilaw’
1 Iti tengnga ti nasipnget a naespirituan ken moral a kasasaad ti agdama a sistema ti bambanag, aginnem a milion nga agdaydayaw iti pudno a Dios a ni Jehova ti ‘agsilsilnag kas silsilaw’ iti 234 a pagilian iti sangalubongan. (Fil. 2:15) Dayta ti gapuna a nalakadatayo a mapaliiw. Kasano ti panangisilnagtayo iti lawag ti kinapudno nga aggapu ken Jehova?—2 Cor. 3:18.
2 Dagiti Tignaytayo: Nalaka a makita dagiti tattao ti konduktatayo. (1 Ped. 2:12) Napaliiw ti maysa a babai a naanus ken mannakitinnulong ti Saksi a katrabahuanna ken saan nga agsasao iti dakes wenno makipagkatawa kadagiti narugit nga angaw. Idi pinadas dagiti dadduma a ruroden ti Saksi babaen ti narasaw a panagsasaoda iti imatangna, nagtalinaed a kalmado ngem natibker maipaay iti umiso. Ania ti epekto daytoy iti babai? Kunana: “Nagustuak unay ti konduktana ket adu ti insaludsodko maipapan iti Biblia. Rinugiak ti nagadal iti Sao ti Dios ket nabautisaranak idi agangay.” Innayonna: “Ti konduktana ti nakaallukoyak a mangsukimat iti patpatien dagiti Saksi ni Jehova.”
3 Ti kababalintayo iti autoridad, panangmatmattayo kadagiti nailubongan nga aramid, ken ti makaay-ayo a panagsasaotayo pagminarenna dagiti Saksi ni Jehova kas tattao nga agbibiag a maitunos kadagiti nangato a pagalagadan ti Biblia. Pakaidayawan ni Jehova dagita a nasayaat nga aramid ken allukoyenna dagiti dadduma nga agdayaw kenkuana.
4 Dagiti Saotayo: Siempre, dagidiay makakita iti nasayaat a konduktatayo mabalin a saanda nga ammo no apay a naidumatayo malaksid no ibagatayo kadakuada dagiti patpatientayo. Ammo kadi dagiti katrabahuam wenno kaeskuelaam a maysaka kadagiti Saksi ni Jehova? Gunggundawayam kadi ti mangasaba uray no makipatpatangka laeng? Determinadoka kadi a ‘mangisilnag iti silawmo iti sanguanan dagiti tattao’ iti amin a maitutop a gundaway?—Mat. 5:14-16.
5 Ti panangitungpal iti annongentayo kas silsilaw kalikagumanna ti espiritu ti panagsakripisio. Ti amin-kararua a kababalin tignayennatayo a mangidian kadagiti saan unay a napateg a banag tapno ad-adu ti magapuanantayo iti mangispal-biag a trabaho a panangasaba ken panagaramid kadagiti adalan.—2 Cor. 12:15.
6 Babaen kadagiti tignay ken saotayo, sapay koma ta itultuloytayo ti agsilnag kas silsilaw. No aramidentay dayta, mabalin a matignay met dagiti dadduma a mangidayaw ken Jehova.