Agtigtignaykayo Kadi a Maitunos iti Ayat ni Kristo?
1 Sipapanunot iti kabibiag ni Apona, kastoy ti insurat ni apostol Juan: “Ni Jesus, nga inayatna ti kukuana nga adda idi iti lubong, inayatna ida agingga iti panungpalan.” (Juan 13:1) Iti daytoy a tiempo ti Memorial, maiturong ti panunottayo iti kadakkelan nga ebkas ti ayat ni Kristo. Makapagtignaytayo a maitunos iti dayta nga ayat babaen ti panangalagad ti pammati iti subbot, babaen ti naregta a pannakiraman iti trabaho a panangasaba ken, kas ken Jesus, babaen ti panagibtur “agingga iti panungpalan.”—Mat. 24:13; 28:19, 20; Juan 3:16.
2 Panagtignay a Maitunos iti Ayat ni Kristo: Okupado unay ni Jesus iti daydi maudi a lawas ti naindagaan a biagna. (Mat. 21:23; 23:1; 24:3) Kas tumutulad ken Kristo, matignaytayo met babaen ti ayat tapno ‘umagawatayo a sipipinget’ iti panagserbi ken ni Jehova. (Luc. 13:24) Mabalinyo kadi a gundawayan dagiti urnos para iti kanayonan a panangasaba kabayatan ti Abril babaen ti panangbusbosyo iti ad-adu pay a tiempo iti ministerio?
3 Iti daytoy a tawen, maangay ti Pangrabii ti Apo inton rabii ti Mierkoles, Abril 19. Manonto ti tumabuno iti daytoy nagpateg nga okasion? Agpannuray unay dayta kadatayo. Inlistayo kadin dagidiay planoyo nga awisen—dagiti iyad-adalanyo iti Biblia ken dadduma pay nga interesado, kakabagian, kanegosio, ken kaeskuelaanyo? Nakasaritayo kadin ken inawisyo ida a naimpusuan? Palagipanyonto kadi ida sumagmamano nga aldaw sakbay ti Memorial? Kasapulanda kadi ti tulongyo tapno makatabunoda? Awisen met dagiti panglakayen ti asinoman a nagbalin a di aktibo iti ministerio. Nangnangruna a kasapulan a tumabunotayo amin gapu ta maangay ti Memorial iti rabii ti katengngaan ti lawas imbes nga iti ngudo ti lawas.
4 Tumabuno a Sisasagana: Nasken a sisasagana ken nasayaat ti kondision ti panunottayo inton tabunuantayo ti Memorial. Binalakadan ni Pablo dagiti kapammatianna a sipapanunotda koma iti kinaserioso ti okasion. (1 Cor. 11:20-26) Mabalinyo a basaen ti kapitulo 13 agingga iti 17 ti Ebanghelio ni Juan kabayatan ti panagadal ti pamiliayo iti Biblia sa kalpasanna paisalaysay iti kada miembro ti pamilia no ania ti kaipapanan kenkuana ti daton ni Jesus. Diyo met liplipatan ti inaldaw a panagbasa iti Biblia iti lawas ti Memorial!
5 Napalalo ti panagayattayo ken Kristo, ket saan laeng nga agpatingga dayta inton Abril 19. Determinadotayo a mangipakita iti ayattayo kenkuana iti agnanayon! Ti panangrambak iti Memorial ita a tawen tulongannatayo a mangpabileg iti dayta a determinasion.