Abril—Tiempo ti Panagregta iti Nasayaat nga Ar-aramid!
1 Bayat nga umasideg ti bagyo iti adu ti taona a lugar, masapul a mapakdaaran a sigaganat dagiti tattao iti umad-adani a peggad. No umas-asidegen ti bagyo, ad-adda a masapul a maipaganetget dagiti pakdaar. Apay? Agsipud ta agpegpeggad ti adu a biag! Mabalin nga addada tattao a di nakangngeg kadagiti immuna a pakdaar. Mabalin a nangngeg dagiti dadduma ngem naliwayanda ti agtignay. Umasping met iti dayta ti nadibinuan a pakdaar a naibilin nga iwaragawagtayo sakbay ti panangipayugpog “ti alipugpog” ti nalinteg a pungtot ti Dios iti amin a lamma daytoy nadangkes a lubong. (Prov. 10:25) Agpegpeggad ti agnanayon a biag dagiti binilion a tattao! Masapul a maiwaragawag ti pakdaar. Masapul nga agbalintayo a “naregta iti nasayaat nga ar-aramid.”—Tito 2:11-14.
2 Iti adun a dekada, maparparegta ti ili ni Jehova a pagbalinenda ti panawen ti Memorial a tiempo ti naisangsangayan a kinaregta iti ministerio. Idi primavera ti 1939, ti Informant, a sinuktan ti Ministeriotayo iti Pagarian, impaayna daytoy a pammaregta: “Iti iyaay ti primavera, ken nasayaat a paniempo, namnamaentayo koma nga agdoble ti kaadu ti oras iti tay-ak a busbosen dagiti agibumbunannag ti [kongregasion], ken umadu ti oras dagiti payunir. Adda lima a Domingo iti Abril. Addaan met iti lima a Sabado. Pagbalinenyo ti kada Sabado ken Domingo iti Abril . . . a tiempo ti naisangsangayan a panangasaba.” Adda rigrigatna daydi a kalat a naipasango kadagiti kakabsat 60 a tawenen ti napalabas! Iti daytoy a tawen, kas idi 1939, adda lima a kompleto a ngudo ti lawas iti bulan ti Abril. Ania dagiti planoyo ita a bulan? Ania dagiti insuratyon iti kalendarioyo para iti Abril 2000? Iplanoyo ti maaddaan iti makapnek a pannakiraman iti nasayaat nga ar-aramid a kadua ti intero nga ili ni Jehova iti daytoy naisangsangayan a bulan ti naparayray a naespirituan nga aramid.
3 No Ania ti Manamnama a Maaramidantayo: Mairana iti daytoy a bulan ti kapatgan nga aldaw ti tawen 2000. Isu dayta ti Abril 19, ti anibersario ti ipapatay ni Jesus. Ikagumaantayo nga awisen ti adu a tattao iti Memorial. Kas naisingasing itay napan a bulan, mangaramidkayo iti listaan dagiti amin a posible a tumabuno iti Memorial ket siertuenyo nga awan malibtawan. Mairaman koma a maawis dagidiay di aktibo nga agibumbunannag, iyad-adalan iti Biblia, dagidiay masarsarungkaran, dagidiay datin a nayad-adalan, katrabahuan, kaeskuelaan, kaarruba, kakabagian, ken dadduma pay a gagayyem. Adda met laeng pagluganan dagidiay mayat a tumabuno? No awan, makaipaaykayo kadi iti naayat a tulong? Iti rabii ti Memorial, pribilehiotayto amin nga iparikna a maawat dagidiay tumabuno. Kalpasan ti Memorial, mabalintayo a sarungkaran dagita nga interesado ket ipaayantayo ida iti kanayonan a naespirituan a tulong.
4 Ti panagbalin a “naregta iti nasayaat nga ar-aramid” sakbay ken kalpasan ti Memorial ket nasayaat a wagas a panangipakita ken Jehova a pudno nga apresiarentayo amin a naaramidanna kadatayo. Gapu ta at-atiddog ti oras iti aldaw ken nasaysayaat ti paniempo iti kaaduan a lugar, mabalinan ti adu kadatayo a nayonan ti maaramidantayo iti trabaho a panagebanghelio. No maysakayo nga auxiliary pioneer, kayatyonto nga aramiden ti amin a kabaelanyo a mangipaay iti 50 nga oras wenno ad-adu pay iti ministerio. (Mat. 5:37) Surotenyo a naimbag ti eskediul nga implanoyo iti rugi ti bulan. (Ecl. 3:1; 1 Cor. 14:40) Sapay koma ta aramidentayo amin ti kabaelantayo a tumulong kadagiti amin a payunir, agpadpada babaen ti panangparegta kadakuada ken pannakipagtrabaho kadakuada iti tay-ak. (Idiligyo ti 2 Ar-ari 10:15, 16.) No regtaantay ti agmula iti Abril, manamnamatayo ti naindaklan a rag-o ken pamendision ni Jehova. (Mal. 3:10) Nalabit daytoyto ti pagpangalan iti agtultuloy a panagserbi nga auxiliary pioneer wenno regular pioneer. Sapay koma ta ti naespirituan a buelo a magun-odtayo iti Abril ket agtultuloy kadagiti sumaganad a bulan bayat nga itultuloytayo ti agbalin a regular nga agibumbunannag iti Pagarian.
5 Di pagduaduaan, rinibu iti ili ni Jehova iti daytoy a bulan ti mangirugi iti ad-adu pay a panangyadal iti Biblia iti pagtaengan. Kayatyo kadi ti mangirugi iti maysa? Espesipiko nga ikararagyo nga adda koma mayadalanyo, ket agtignaykayo a maitunos iti kararagyo. Mangnamnamakayo nga apresiaren ni Jehova ti napakumbaba a panagpatulongyo nga agbirok iti nasingpet-panagpuspusona a tao nga isuroyo.—1 Juan 3:22.
6 Adtoy ti maysa a wagas a napadasen idiay tay-ak a naballigi a pangirugi kadagiti saritaan. Irugiyo babaen iti panagsaludsod: “Panagkunayo, amin ngata a kinaranggas kadagiti publiko nga eskuelaan ket resulta ti aramid dagiti demonio, wenno maigapu daytoy iti kinakurang ti panangsanay dagiti nagannak?” Palubosanyo a sumungbat. No kunaen ti tao a maigapu dayta iti “aramid dagiti demonio,” basaenyo ti Apocalipsis 12:9, 12, ket pagminarenyo ti akem ti Diablo iti panangitandudo iti riribuk ditoy lubong. Kalpasanna luktanyo ti broshur a Kalikaguman iti leksion 4, ket damagenyo no pinampanunoten dayta a tao no sadino ti nagtaudan ti Diablo. Basaen ken pagsaritaanyo ti umuna a dua a parapo. No kunaenna a ti “kinakurang ti panangsanay dagiti nagannak” ti pakaigapuan ti kinaranggas kadagiti eskuelaan, basaenyo ti 2 Timoteo 3:1-3 sa dakamatenyo dagiti kababalin a nalawag a pakaigapuan daytoy a parikut. Kalpasanna lukibenyo ti broshur a Kalikaguman iti leksion 8, basaenyo ti parapo 5, sa ituloyyo ti saritaan. No maitulagyo nga agsublikayto, mabalin a nasayaat dayta a pangrugian ti regular a panangyadalyo iti Biblia iti dayta a tao. Iti sumaganad nga isasarungkar, isaludsodyo no adda pay sabali nga am-ammona a mabalin nga interesado a dumngeg iti ad-adalenna.
7 Ti sabali pay a pamay-an tapno “naregta iti nasayaat nga ar-aramid” kabayatan ti Abril ket makiraman iti nadumaduma a benneg ti panangasaba. Pinampanunotyo kadin ti mangasaba iti parke wenno iti paradaan? Iti pagsardengan ti bus wenno iti estasion ti tren? Wenno kayatyo kadi a padasen ti mangasaba iti telepono, iti lansangan, wenno iti lugar ti negosio? Apay a diyo aktual nga aramiden dagita a kapanunotan iti daytoy a bulan? Tulongannakayo ni Jehova a maaddaan iti kasapulan a tured. (Ara. 4:31; 1 Tes. 2:2b) Nalabit mabalinyo ti makitulag a makipagtrabaho iti maysa a payunir wenno agibumbunannag nga aduan kapadasan kadagitoy a benneg ti ministerio.
8 Siasinoman nga agtarigagay a makiraman nga ad-adda pay iti trabaho a panangasaba, mabalin a kayatna ti makipaset iti di pormal a panangasaba. Masansan a kasapulan laeng ti nainggayyeman a pannakisarita iti tao. Mangpataud laeng iti tema a paginteresan ti publiko, a nalabit usarenyo ti pamay-an a naitampok iti parapo 6. Ikagumaanyo nga usaren a naimbag ti uray bassit laeng a paset ti tiempo a mabalin a masayang no diyo usaren. Ditay ibelleng ti singko sentimos, dies, wenno binting gapu laeng ta dagita ket saan a kompleto a piso. Apay a dikay aprobetsaren nga usaren uray ti lima a minuto, sangapulo a minuto, wenno sangapulo ket lima a minuto iti di pormal a panangasaba?
9 Panawen ti Panangutob: Lagipenyo dagiti nabagas a punto a napagminar iti drama iti kallabes a “Naimpadtuan a Sao ti Dios” a Kombension Distrito. Ti drama a napauluan iti Panangipateg iti Naespirituan a Tawidtayo, pinagpanunotnatayo a naimbag maipapan iti nagdumaan da Jacob ken Esau. Kinuna ni Esau nga adda panaginteresna kadagiti naespirituan a bambanag, a kas ken Jacob, ngem saan nga impakita dayta dagiti aramid ni Esau. (Gen. 25:29-34) Anian a nagbileg a pakdaar nga agpaay kadatayo! Kas ken Jacob, sisasaganatayo koma a makidangadang, uray pay makigabbo, tapno magun-odtay ti pammendision ni Jehova. (Gen. 32:24-29) Apay a ditay usaren ti Abril ken amin a sumaganad a bulbulan a mangpabaro iti regtatayo, a ditay pulos tagtagilag-anen ti nakaskasdaaw a naespirituan a tawidtayo?
10 “Ti dakkel nga aldaw ni Jehova asideg, isu asideg ken napardas unay.” (Sof. 1:14) Masapul a maiwaragawag ti naimbag a damag ti Pagarian. Agpegpeggad ti adu a biag! Sapay koma ta daytoy a bulan ket nangnangruna a pagragsakan ti intero nga ili ni Jehova bayat nga agkaykaysatayo a mangipakita a ‘naregtatayo iti nasayaat nga ar-aramid.’
[Kahon iti panid 4]
Dagiti Palagip iti Memorial
Maangay ti panangrambak ti Memorial iti daytoy a tawen inton Mierkoles, Abril 19. Asikasuen koma dagiti panglakayen dagiti sumaganad:
◼ Iti panangikeddeng iti oras ti taripnong, siguraduenyo a sa la maipasa dagiti emblema no nakalneken ti init.
◼ Mapakaammuan koma ti amin, agraman ti agpalawag, maipapan iti eksakto nga oras ken lugar a pakaangayan ti selebrasion.
◼ Magun-od ken maisagana koma ti maitutop a klase ti tinapay ken arak.—Kitaenyo ti Agosto 15, 1985, a Pagwanawanan, panid 19.
◼ Maiyeg koma iti Kingdom Hall ken maiplastar a nasaksakbay dagiti plato, kopa, ken ti mayanatup a lamisaan ken mantel.
◼ Madalusan koma a naimbag ken nasaksakbay ti Kingdom Hall wenno ti sabali a lugar a pagtataripnongan.
◼ Mapili koma a nasaksakbay dagiti attendant ken dagiti agiserbi sa maisuro kadakuada dagiti annongenda ken ti umiso a pamay-an a masurot.
◼ Mayurnos koma a maserbian ti asinoman a napulotan a masakit ken saan a makatabuno.
◼ No saan a maymaysa a kongregasion ti nakaeskediul a mangusar iti isu met laeng a Kingdom Hall, adda koma nasayaat nga urnos dagiti kongregasion tapno maliklikan ti panaglilinnetlet iti pagserkan, kadagiti pagnaan, ken iti pagparadaan.