Pabilgen ti Panangapresiar iti The Bible—Mankind’s Oldest Modern Book

Ti sumaganad a salsaludsod itampokna dagiti punto a mabalin a mapaliiwyo no buybuyaenyo daytoy a video: (1) Aniada a kinapudno ti mangipakita nga awan umasping iti Biblia? (2) Mangtedkayo iti ehemplo no kasano a ti Biblia, nupay nabayagen dayta, ket maitunos iti moderno a siensia. (3) Kasanotay a masigurado nga awan ti nagbaliwan ti Biblia ita no maidilig kadagiti orihinal a manuskrito? (4) Ania ti maysa a naisangsangayan nga aspeto dagiti teksto ti kadaanan a manuskrito ti Biblia, ken ania a panagtalek ti ipaayna daytoy kadakayo? (5) Kasano a da John Wycliffe, Johannes Gutenberg, William Tyndale, Mary Jones, ken Charles Taze Russell nakatulongda iti panangisaknap iti Sao ti Dios iti intero a lubong? (6) Kasano a ti Biblia nakaro a binusor ti simbaan, ngem kasano a nakalasat dayta agingga iti kaaldawantayo? (7) Kasano kasaknap ti pannakaipatarus ken pannakaipablaak ti Biblia babaen ti organisasion ni Jehova? (8) Kasano a ti praktikal a balakad ti Biblia tinulonganna dagiti tattao a mangtaming kadagiti problema mainaig iti pannakaigamer iti sugal (1 Tim. 6:9,10), panagsina ken saan a panagmatalek iti asawa (1 Cor. 13:4, 5; Efe. 5:28-33), ken pannakakumikom kadagiti material a kinabaknang (Mat. 16:26)? (9) Aniada a pammaneknek ti mangipakita a maparmek ti panaggiginnura ti nasion, tribu, ken puli iti lubong no mayaplikar dagiti Nainkasuratan a prinsipio? (10) Kasano a nangipaay kadakayo iti dakdakkel a ragsak ti panagadalyo kadagiti linaon ti Biblia? (11) Siasino ti ammoyo a magunggonaan iti daytoy a video, ken kasanoyo nga ipabuya kadakuada?