‘Makumikomkay Unay’ Koma iti Ministerioyo
1 No mabasatayo a nangged ni apostol Pablo iti panagaramid iti tolda bayat ti kaaddana idiay Corinto, mabalin nga ipapantayo a kinedngan daytoy ti gundawayna a mangasaba. Nupay kasta, isalaysay ti Aramid 18:5: “Nangrugi a pakakumikoman unay ni Pablo ti sao, a nangsaksaksi kadagiti Judio tapno paneknekanna a ni Jesus isu ti Kristo.” Apay a nakumikom unay ni Pablo iti trabaho a panangasaba? Uray no adun idiay Corinto ti nagbalin a manamati, pinasingkedan ti Apo nga adu pay ti mapagbalin nga adalan iti dayta a siudad. (Ara. 18:8-11) Addaantay kadi met iti umasping a rason a makumikom unay iti ministeriotayo? Wen. Adu pay a tattao ti masarakan ken maisuro iti kinapudno.
2 Mangbusbos iti Ad-adu a Tiempo iti Serbisio Kabayatan ti Abril: Nalabit kalatyo ti agbalin nga okupado iti panangikasaba iti naimbag a damag iti kada bulan. Ngem adda bulbulan nga ad-adu ti gundawaytayo a ‘makumikom unay’ iti daytoy nga aktibidad. Karaman kadagitoy ti bulan ti Abril, iti katibuk ti panawen ti Memorial. Ipalubos kadi ti kasasaadyo ti panag-auxiliary pioneer wenno ad-adda pay a panagregget iti ministerio iti daytoy a tiempo? Nabaknang a bendision ti sagsagrapen ti adu nga agibumbunannag a mangar-aramid iti kasta. (2 Cor. 9:6) No ar-aramidenyo ti amin a kabaelanyo, laglagipenyo a maay-ayo ni Jehova iti amin-kararua a panagserbiyo. (Luc. 21:2-4) Aniaman dagiti kasasaadyo, pagbalinenyo a kalatyo ti ‘makumikom unay’ iti ministerioyo kabayatan ti Abril. Diyo liplipatan nga ited ti reportyo iti ngudo ti bulan tapno ti panagreggetyo ket mairaman iti bilang ti report ti intero nga ili ni Jehova.
3 Sarungkaran Dagiti Kabbaro a Timmabuno iti Memorial: Idi napan a tawen, 413,023 ti timmabuno iti Memorial ditoy Pilipinas. Ditay pay ammo ti dagup ti timmabuno iti daytoy a tawen. Ngem ipakita dagiti report nga adda nagdakkelan a potensial para iti ad-adu nga “anien.” (Mat. 9:37, 38) Gapuna, no mabalin dagdagusenyo nga iyurnos a sarungkaran dagiti kabbaro a timmabuno iti Memorial tapno tulongan ida iti naespirituan. No itantanyo ti sumarungkar, mabalin nga ‘umay daydiay nadangkes ket rabsutenna ti naimula iti puspusoda.’ (Mat. 13:19) Ti madagdagus nga isasarungkar ipakitana a pudno a ‘makumikomkay unay’ iti ministerioyo.
4 Itultuloyyo a Tulongan Dagiti Inaktibo: Idi Pebrero, narugian ti naisangsangayan a panagregget a mangtulong kadagiti inaktibo. No adda pay di nasarungkaran dagiti panglakayen, rumbeng nga iyurnos dagiti panglakayen a sarungkaran ida sakbay nga agngudo ti Abril. Ikagumaan nga ammuen dagiti panglakayen ti makagapu iti parikut ti indibidual ken no kasano ti kasayaatan a panangtulong kenkuana nga agaktibo manen nga agserbi ken Jehova. Daytoy naayat a tulong ipakitana ti kinapasnek dagiti panglakayen a mangitungpal iti rebbengenda kas papastor “ti arban ti Dios.” (1 Ped. 5:2; Ara. 20:28) Ti Setiembre 15, 1993, a ruar Ti Pagwanawanan, panid 22-3, mangipaay kadagiti ekselente a singasing a mausar dagiti panglakayen no tamingenda ti aniaman kadagiti lima a gagangay a parikut a mangapektar kadagiti inaktibo. Nasaysayaat no adda mapagbalin nga aktibo iti ministerio iti tay-ak kabayatan ti Abril.
5 Tulongan ti Ad-adu Pay nga Agbalin a Di Bautisado nga Agibumbunannag: Kualipikado kadin dagiti annakyo nga agbalin a baro nga agibumbunannag ti naimbag a damag? Ti met ngay dadduma nga iyad-adalanyo iti Biblia? No dagita ket aprobaran dagiti panglakayen, saan aya nga Abril ti maikanatad a tiempo a panangrugida a mangasaba? No rumangrang-ay ti maysa ken naadalnan ti broshur a Kalikaguman ken ti libro a Pannakaammo, mabalin a maituloy ti panagadal iti Biblia iti maikadua a libro, nalabit ti libro a Saot’ Dios, ti libro a Pudno a Talna, wenno ti libro a Nagkaykaysa iti Panagdayaw. Ti kalatyo ket tulongan ti estudiante a manggun-od iti naun-uneg a pannakatarus iti kinapudno, makualipikar kas di bautisado nga agibumbunannag, ken agbalin a dedikado ken nabautisaran a Saksi ni Jehova.—Efe. 3:17-19; 1 Tim. 1:12; 1 Ped. 3:21.
6 Ti di agbaliw ken napudno a pannakaseknanyo kadagiti iyad-adalanyo iti Biblia mabalin a tulonganna ida a mangipapuso iti kinapudno. Nakasarak ti maysa a Saksi iti lakay ken baketen nga agassawa a siraragsak nga immannugot nga agadal iti Biblia. Ngem tallo a lawas a nagsasaruno nga intantan ti agassawa ti panagadal. Idi agangay, narugian ti panagadal. Kalpasanna, kinanselar ti agassawa ti panagadal iti dandani tunggal maikadua a lawas. Ngem kamaudiananna, rimmang-ay ti babai agingga a nagpabautisar. “Kalpasan ti pannakabautisarna,” nalagip ti kabsat, “nagarubos ti luana gapu iti ragsak, ket nakaluaak met ken ti asawak gapu iti ragsakmi.” Wen, ti ‘pannakakumikom unay’ iti naimbag a damag mangyeg iti napalaus a rag-o!
7 Ipakita ti padto ti Biblia ken dagiti pasamak iti lubong nga agbibiagtayon iti arinunos ti panawen ti panungpalan. Itan ti tiempo a ti intero nga ili ti Dios nasken a ‘makumikomda unay’ a mangipakaammo iti naimbag a damag kadagiti sabsabali. Ipanamnama ni apostol Pablo a ti kasta a panagbannog ket sigurado a “saan nga ubbaw mainaig iti Apo.”—1 Cor. 15:58.