Saludsod
◼ Kaano ti mayanatup a pannakabuangay ti kanayonan a grupo ti Panagadal iti Libro ti Kongregasion?
Makonsiderar ti panangbuangay iti baro a grupo no kasapulan tapno agtalinaed a 15 wenno basbassit ti tumabuno iti kada pagadalan iti libro, a pakairamanan ti Kingdom Hall. Apay a maisingasing daytoy?
No basbassit ti grupo ti Panagadal iti Libro ti Kongregasion, ad-adda a maipaayan ti konduktor iti atension ti tunggal maysa a tumabuno. Kanayonanna, makapagkomento ti amin ta nasayaat dayta a gundaway a mangaramid iti publiko a panangideklara iti pammatida. (Heb. 10:23; 13:15) No naiwaras ti babassit a grupo iti teritoria ti kongregasion, nalaklaka ti tumabuno iti Panagadal iti Libro ti Kongregasion ken kadagiti taripnong iti panagserbi iti tay-ak. Nakita dagiti kongregasion a nangnayon kadagiti lugar a pagadalan nga immadu met ti dagup dagiti tumabtabuno kadagiti panagadal iti libro.
Adda dagiti naisangsangayan a kasasaad nga agkasapulan ti panangbukel iti sabali pay a grupo, uray no basbassit. Pudno dayta iti naiputputong a disso wenno no dagiti agdama a lugar ket naileten wenno awanen ti mapagtugawan. No kasapulan, mabalin ti mangbuangay iti grupo nga agadal iti aldaw para kadagiti lallakay ken babbaket, mangmangged iti rabii, wenno kakabsat a babbai a di Saksi ti asawada.
Masapul a maituding iti tunggal grupo ti panagadal iti libro ti sumagmamano a nabileg iti naespirituan ken aktibo nga agibumbunannag ken kasta met ti kualipikado a konduktor ken para-basa. Agregget koma dagiti kakabsat a lallaki a makualipikar kadagita a pakasapulan ti kongregasion.
Matulongan dagiti panglakayen a rumang-ay ti kongregasion babaen ti panangsiertoda a kalalainganna ti kadakkel dagiti grupo ti panagadal iti libro ti kongregasion ken maay-aywanan a nalaing iti naespirituan ken agadalda iti kombiniente a lugar. No la ket praktikal, mabuangay koma dagiti baro a grupo tapno naan-anay a magunggonaan ti amin iti daytoy naisalsalumina a naespirituan nga urnos. Mabalinyo kadi a pausar ti pagtaenganyo a pagadalan iti libro? Naespirituan a bendision ti sinagrap dagiti adu a nangaramid iti kasta.