Dagiti Kombension—Tiempo ti Panagrag-o!

¹ Ti kombension dagiti Saksi ni Jehova ket tiempo ti napalalo a panagrag-o. Iti agarup sangagasut a tawenen, nakatulong dagitoy a panagtitipon iti iyaadu iti organisasiontayo. Manipud iti bassit a nangrugian, nakitatayo dagiti nabaknang a pamendision ni Jehova iti sangalubongan a trabahotayo. Iti umuna a kombensiontayo iti moderno a panawen, idiay Chicago, Illinois, idi 1893, agdagup a 70 kadagiti 360 a timmabuno ti nabautisaran kas simbolo ti dedikasionda ken Jehova. Iti serye ti “Dagiti Manangitungpal iti Sao ti Dios” a Kombension Distrito idi napalabas a tawen, agdagup iti 9,454,055 dagiti timmabuno iti sangalubongan, a ti nabautisaran ket 129,367. Anian a nagdakkel a pakaigapuan ti panagrag-o!

² Sipud pay idi panawen ti Biblia, dagiti panagtitipon ti ili ti Dios ti nakaipaay iti naisangsangayan a gundaway a maiwardas dagiti sursuro ni Jehova. Idi panawen da Ezra ken Nehemias, nagimdeng dagiti tattao iti pannakaibasa ti Linteg “manipud pumarbangon agingga iti tengnga ti aldaw.” (Neh. 8:2, 3) Gapu ta lumawlawa ti pannakaawatda iti Linteg iti dayta nga okasion, napasaran ti nasion ti “dakkel a panagrag-o.” (Neh. 8:8, 12) Pagrag-oantayo met ta mangipaay dagiti kombension iti nasayaat a gundaway tapno makaawattayo iti naimbag a sursuro ken ‘naintiempuan’ a naespirituan a taraon manipud ken Jehova babaen ti “matalek ken masirib nga adipen.” (Mat. 24:45) Napateg dagiti kombension iti espiritualidadtayo yantangay kinuna ni Jesus a masapul nga agbiag ti tao “iti tunggal sao a rumrummuar iti ngiwat ni Jehova.”—Mat. 4:4.

³ Pagimbagantayo no Ikagumaantay a Tabunuan: Pagbalinentayo koma amin a personal a kalat ti tumabuno iti intero a programa ti “Dagiti Mannursuro iti Sao ti Dios” a Kombension Distrito ita a tawen. Iplanotayo koma ti sumangpet a nasapa iti kada aldaw ken agtalinaed agingga a maibagatayo amin ti “Amen!” iti pangserra a kararag. Tapno maaramid daytoy, kasapulan a balbaliwantayo ti eskediultayo. Mabalin a narigat ti agbakasion iti trabaho tapno matabunuan ti kombension. Masapul a desididotayo ket ditay itantan ti bambanag. No kasapulantayo ti pagdagusan ken/wenno pagluganan, iyurnostayo koma a nasapsapa. Pagimbagantayo ti aniaman nga aramidentayo a panangikagumaan!

⁴ Saan a material a bambanag ti namnamaen a masagrap ti ili ni Jehova no tumabunoda iti kombension. Kitaenyo ti ulidan ti dadduma a determinado a timmabuno iti Divine Will International Assembly dagiti Saksi ni Jehova idi 1958, idiay New York City. Maysa a kabsat nga addaan iti negosiona a panagipasdek ti nangisara iti dayta iti uneg ti dua a lawas tapno agboluntario a tumulong ken tumabuno iti asamblea. Maysa a kabsat idiay Virgin Islands ti nangilako iti dua nga ektaria a daga tapno makatabuno amin ti innem a kameng ti pamiliana. Maysa nga agkabannuag nga agassawa ti nangilako iti de motor a bangkada tapno matabunuanda ti asamblea, agraman ti tallo nga annakda, nga agtawen iti dua a bulan agingga iti pito a tawen. Idiay California, naballaagan ti tallo nga agkakabsat iti lasag a maikkatda iti trabaho no dida sumrek. Ngem saan a dayta ti nakalapped kadakuada a mapan iti dayta nakallalagip nga asamblea.

⁵ Gunggonaan ni Jehova ti Napasnek a Panangikagumaantayo: Makitkita ken bembendisionan ni Jehova ti panangikagumaan ti ilina. (Heb. 6:10) Kas pagarigan, iti Theocracy’s Increase Assembly idi 1950, nangngegan dagiti timmabuno ti nakallalagip a palawag a “Baro a Sistema ti Bambanag.” Inabbukay ken ginutugot ni kabsat Frederick Franz ti interes ti amin babaen ti panangisaludsodna: “Maragsakan kadi daytoy a sangalubongan a tallaong a mangammo a ditoy, ita a rabii, iti nagtetengngaantayo, aduda dagiti mainanama nga agbalinto a prinsipe iti baro a daga?” Nasurok 50 a tawen kalpasanna, maragsakantayo latta iti daytoy limmawag a pannakaawat iti Salmo 45:16.

⁶ Kalpasan ti itatabunona iti kombension distrito idi napalabas a tawen, kastoy ti insurat ti maysa a manangapresiar nga ulo ti pamilia: “Kakabsat, diyo la ammo no kasano a nangsalbar daytoy a kombension. Immakar ti pamiliak iti siudad gapu iti trabaho, ngem nagresulta laeng daytoy iti panagkapuy ti espiritualidadmi. . . . Nabaybay-anmi ti Nakristianuan nga annongenmi. Nagsardengkami payen a nakigimong ken nagkakadua a nangasaba. . . . Daytoy a kombension ti nangpabaro iti bilegmi, ket naminsan manen nga impasdekmi dagiti naespirituan a kalat ken inyurnosmi ti bambanag tapno maitungpal dagita.”

⁷ Ipapaayannatayo ni Jehova iti kasapulantayo a naespirituan a taraon. Mangidasar iti adu a naespirituan a taraon kadagiti kombension. Ti panangapresiar kadagitoy a probision ti manggutugot koma kadatayo a mangipapuso iti naikuna ni Cornelio idi binisita ni apostol Pedro: “Iti daytoy a tiempo addakami amin iti sanguanan ti Dios tapno denggenmi ti amin a bambanag nga imbilin kenka ni Jehova a sawem.” (Ara. 10:33) Aramidentayo koma a kalat nga ‘adda iti sanguanan ti Dios’ iti tunggal sesion bayat “Dagiti Mannursuro iti Sao ti Dios” a Kombension Distrito ita a tawen ket agrag-otayo!