“Agtakderak a Sititibker! Agtakderak a Sititibker! Agtakderak a Sititibker!”
1 Dagita a sasao ti maysa a matalek a Kristiano a nakalasat iti Holocaust iyebkasna ti determinasion ti rinibu a Saksi—sibibiag wenno natayen—a sititibker a nangsalimetmet iti pammatida iti laksid ti kinaulpit dagiti Nazi. (Efe. 6:11, 13) Ti makapikapik a pakasaritaan ti kinatured ken panagballigida ket naiparang iti makatignay-puso a video a Jehovah’s Witnesses Stand Firm Against Nazi Assault. Maidagadag iti amin a kameng ti kongregasion a buyaenda dayta ken iburayda dagiti kapaliiwan ken rikriknada iti tunggal maysa.
2 Bay-anyo a pagpanunotennakayo dagitoy a saludsod: (1) Ania dagiti rason a sinalimetmetan dagiti Saksi ni Jehova ti natured a takder a maibusor kadagiti Nazi? (2a) Ania ti adda idi nga agduma a panangmatmat maipapan iti maysa a kablaaw, ken apay? (2b) Kasano a nakaapektar daytoy kadagiti pamilia a Saksi? (3) Mano a Saksi ti naibalud kadagiti kampo konsentrasion, ania ti pakabigbigan kadakuada sadiay, ken kasano ti panangtrato ti Gestapo kadakuada? (4) Ania ti saan a kayat nga aramiden dagiti kakabsattayo a kasukat ti wayawaya? (5a) Kasano ken kaano a situtured a nagsao dagiti Saksi ni Jehova maibusor iti nadangkok a panagturay ni Hitler? (5b) Ania ti reaksion ni Hitler iti daytoy? (6) Kasano a napaneknekan a ti panagmaymaysa ti ili ni Jehova ket makaispal-biag kadakuada ken iti dadduma, iti pisikal ken naespirituan a pamay-an? (7) Ania a kanta ti Pagarian ti naputar iti kampo konsentrasion? (8) Aniada nga ehemplo ti matalek a lallaki, babbai, ken agtutubo ti agserbi nga inspirasionyo nga agtalinaed a natarnaw ken Jehova uray ania ti mapasamak? (Kitaenyo met ti 1999 Yearbook, panid 144-7.) (9) Kas maysa kadagiti Saksi ni Jehova, ania ti epekto daytoy a video iti panangmatmatyo maipapan iti saan a panagbalin paset daytoy a lubong?
3 Ti natured ken makaparegta nga ulidan dagiti Saksi ni Jehova a nailadawan iti video nga Stand Firm ket makatulong kadagiti agtutubo, uray pay kadagiti saan a Saksi, a mangsango kadagiti napateg nga isyu kas ti panangidumduma, panangpilit dagiti kapatadan, ken konsiensia. No ages-eskuelakayo pay laeng, maipaayanyo kadi dagiti mannursuroyo iti gundaway a mangusar iti daytoy a video iti klase? Nalabit a mabalinyo nga itukon kadakuada ti maysa a kopia dayta a video ken ilawlawagyo a dayta ket historikal a salaysay a saan unay a pagaammo wenno maysa a dokumentario a naglaon iti moral a leksion.
4 Ti video nga Stand Firm ket nagsayaat a kagawaan a mangipakita no kasano a ti nadiosan a pannursuro ipaayannatayo iti naespirituan a bileg a mangay-ayo iti Dios babaen ti panagtalinaed a natibker iti dasig ti kinalinteg. (1 Cor. 16:13) Iranudyo dayta iti amin nga aginteres iti kinapudno.