Baro a Programa ti Aldaw ti Espesial nga Asamblea
Ti tema ti programa ti aldaw ti espesial nga asamblea para iti baro a tawen serbisio ket addaan iti nagsayaat a Nainkasuratan a tampok: “Agpasakupkayo iti Dios—Busorenyo ti Diablo.” (Sant. 4:7) Nagsayaat daytoy a giya kadagitoy tiempo ti pakarigatan! Maipaspasangotayo iti ibubusor ni Satanas gapu iti panagtulnogtayo kadagiti bilin ti Dios. Isuronatayo ti programa no kasano a sititibker a masarangettayo dagiti mangdadael-pammati, dakes a gakat ti Diablo. Ania ti sumagmamano kadagiti naespirituan a gameng a maawattayo iti daytoy nga asamblea?
Ilawlawag ti manangaywan iti sirkito no kasano a ti “Panangiparangarang iti Nadiosan a Panagpasakup kas Kamkameng ti Pamilia” pabilgenna dagiti sangakabbalayan tapno masarangetda dagiti pakarigatan iti lubong. Iti umuna a palawag ti bisita nga ispiker a “No Ania ti Kaipapanan ti Panangbusor iti Diablo,” ilawlawagna no apay ken kasano a sarangtentayo a sibibileg dagiti panangikagumaan ni Satanas a mangdadael iti espiritualidadtayo. Dua a paset ti nangnangruna a naiturong kadagiti agtutubo, ta masapul met nga agbalinda nga alerto kadagiti gakat ti Diablo. Adu a Kristiano ti saan a naibuyog iti tarigagay ti lubong idi agtutuboda. Mangngegantayonto ti dadduma kadagiti personal a kapadasanda.
Ti panagpasakup iti autoridad ket maikalikagum kadagiti amin a paset ti kagimongan. Gapuna, ti pangserra a palawag ti bisita nga ispiker itampokna dagiti uppat a pangipakitaan iti panagpasakup: (1) kadagiti gobierno, (2) iti kongregasion, (3) iti panggedan, ken (4) iti pamilia. Anian a praktikal a programa!
Kadagiti agtarigagay nga agpabautisar iti daytoy nga aldaw ti espesial nga asamblea, nasken a pakaammuanda ti mamangulo a manangaywan iti kasapaan a tiempo. Markaantayo koma amin ti petsa ti asamblea iti kalendariotayo ket iplanotayo a tabunuan ti intero a programa. Agnanayon dagiti bendision a maawattayo bayat a taginayonentayo ti panagpasakuptayo ken Jehova.