Iyap-aplikaryo Kadi ti Naadalyo iti “Dagiti Mannursuro iti Sao ti Dios” a Kombension Distrito?
1 Siasinoman a timmabuno iti kalkalpas a kombension distrito makitana a determinado dagiti adipen ni Jehova a mangitungpal iti annongenda kas mannursuro iti Sao ti Dios. (Mat. 28:19, 20) Idi agawidkayo, ania dagiti espesipiko a naisuro a punto a naikeddengyo nga iyaplikar iti mismo a panagbiagyo ken iti tay-ak ti ministerio?
2 Ti Naipaltiing a Kasuratan ket Makaisuro: Naitampok ti 2 Timoteo 3:16 iti tema ti umuna nga aldaw. Imbatad ti pannulbek a palawag a tapno agbalin a “Naan-anay a Nakabalan kas Mannursuro iti Sao ti Dios,” masapul a dakkel ti panangipategtayo iti Sao ti Dios, a nangnangruna a raementayo ngem kadagiti natauan a kapanunotan ken tradision, ken kanayon nga usarentayo. Masapul met nga inaldaw nga ikararagtayo ti nasantuan nga espiritu a tumulong kadatayo iti ministeriotayo ken pagreggetantayo a patanoren ti kangrunaan a bungana—ti ayat. Masapul met nga ipalubostayo ti naindagaan nga organisasion ni Jehova a mangsanay kadatayo kas ministro babaen dagiti amin a gimong ti kongregasion.
3 Iti simposium iti Biernes nga “Isurotayo ti Bagbagitayo Bayat nga Isursurotayo ti Sabsabali,” nailawlawag a masapul nga agbalintayo a mapagulidanan iti (1) panangsurot kadagiti linteg ti Dios iti amin a benneg ti Nakristianuan a moralidad, (2) panangtaginayon ti naanep nga ugali iti panagadal, ken (3) panangiwaksi kadagiti kababalin ken kasasaad ti puso ken panunot a mabalin a gundawayan ti Diablo. Sumaganad, naadaltayo dagiti praktikal a pamay-an tapno masalakniban ti pamiliatayo manipud iti nailubongan a saplit ti pornograpia. Naidagadag kadagiti nagannak nga agbalinda a mapagulidanan iti panangliklik iti uray panangtaldiap laeng iti seksual nga eksena ken bantayanda ti panagusar dagiti annakda iti Internet ken panagbuya iti telebision. Aniada a punto iti programa iti Biernes ti inrugiyo nga iyaplikar?
4 Iti naudi a palawag iti dayta nga aldaw, napabileg ti determinasiontayo a mangipateg iti lawag ni Jehova, agtalinaed a nasinged iti matalek a klase a pinulotan ti Dios, ken tumulong a mangtaginayon iti talna ti ili ni Jehova. Nabasayo kadin ti baro a naipablaak a Ti Padto ni Isaias—Lawag nga Agpaay iti Sangatauan II?
5 Naan-anay a Kualipikado a Mangisuro iti Sabsabali: Ti pannakatema a teksto iti maikadua nga aldaw ket 2 Timoteo 2:2. Bayat nga inimdenganyo ti simposium iti agsapa ti Sabado, inlistayo kadi dagiti singasing no kasano nga (1) sapulen dagiti maikari, (2) sukayen ti interesda, ken (3) maisuro ida a mangtungpal kadagiti amin nga imbilin ni Kristo? Iyap-aplikaryo kadi ti naadalyo—ti panangipakita iti bumalay iti uray maysa a punto manipud Kasuratan ken ti panangibati iti mapagsasaritaan para iti masanguanan nga isasarungkar?
6 Impaganetget ti programa iti malem ti kinapateg ti panangtulad iti Naindaklan a Mannursuro, ni Jesus. Kadagiti ania a pamay-an nga ikagkagumaanyo ti ad-adda nga agbalin a kas kenkuana? Iti naadalyo iti maikadua a simposium iti dayta nga aldaw, ania ti riknayo ta mabalinyo ti “Magunggonaan a Naan-anay iti Teokratiko nga Edukasion”? Ania dagiti singasing nga inyaplikaryon tapno makapagpaut ti panagatensionyo bayat ti personal a panagadal ken dagiti gimong ti kongregasion?
7 Awan duadua a ti magun-odto a libro a Magunggonaan iti Edukasion nga Ipaay ti Teokratiko nga Eskuelaan ti Panagministro tulongannatayo a mangparang-ay iti abilidadtayo kas pumapalawag ken mannursuro iti Sao ti Dios. Dakdakkelto ti atension a maipaay kadagiti kalidad ti panagpalawag a kadawyan kadagiti matalek nga adipen ti Dios idi tiempo ti Biblia. Tunggal leksion ti baro a textbook ket addaan iti kahon a mangipakita iti ababa no ania ti masapul nga aramidentayo, no apay a napateg, ken no kasano nga aramiden dayta. Nairaman dagiti praktikal nga ensayo. Adda 29 nga eksena a pagpilian dagiti kakabsat a babbai no iparangda dagiti pasetda. Inton agangay, maaramidto dagiti naipakaammo a panagbalbaliw sigun iti sistema ti eskuelaan. Addaankayo kadi iti nasayaat nga eskediul ti panagadal ken panagsagana tapno naan-anay a magunggonaankayo iti Teokratiko nga Eskuelaan ti Panagministro iti kada lawas?
8 Agbalinkayo a Mannursuro Gapu iti Panawen: Ti Hebreo 5:12 ti nangisagana iti panunot dagiti nagdengngeg iti Domingo. Iti simposium iti agsapa a napauluan “Ti Padto ni Malakias Isagananatayo Maipaay iti Aldaw ni Jehova,” naidagadag nga itedtayo iti Dios ti kasayaatan nga ik-ikutantayo ken guraentayo ti amin a kita ti kinagulib tapno makalasattayo iti dakkel ken nakaam-amak nga aldaw ni Jehova. Iti drama a “Raemenyo ti Autoridad ni Jehova,” naigunamgunam kadatayo no kasano a ti kinatangsit, ambision, apal, ken di umiso a kinasungdo daydi Kore ken dagiti kakaduana ket nagtungpal iti sipapanayag nga iyaalsa maibusor ken Jehova a mismo. Iti simmaganad a palawag, naitampok a nasken ti panagpasakup ita iti autoridad ti Dios iti uneg ti pamilia ken iti kongregasion. Iti palawag publiko nga, “Asino ti Mangisursuro iti Kinapudno Kadagiti Amin a Nasion?,” nadakamat dagiti pammaneknek a dagiti Saksi ni Jehova ti mangar-aramid iti dayta, saan a ti Kakristianuan, nga agpampammarang laeng a mangisursuro iti kinapudno a linaon ti Biblia.
9 Nalawag a sansanayennatayo ni Jehova nga agbalin a nasaysayaat a mannursuro iti Saona. Iyaplikartayo koma ti nasursurotayo, nga ‘itultuloytayo nga asikasuen ti bagitayo ken ti isursurotayo, tapno maisalakantayto agpadpada ti bagitayo ken dagidiay agimdeng kadatayo.’—1 Tim. 4:16.