Ania ti Panggep?
1 Apay a mangyadaltayo iti Biblia kadagiti pagtaengan? Tapno laeng kadi mangiburay iti pannakaammo, pasayaaten ti biag ti tattao, wenno maaddaanda iti namnama iti masanguanan? Saan. Ti kangrunaan a panggeptayo ket ti panangaramid iti ad-adalan ni Jesu-Kristo! (Mat. 28:19; Ara. 14:21) Dayta ti makagapu no apay a dagiti iyad-adalantayo masapul a makitimpuyogda iti kongregasion. Ti naespirituan a panagrang-ayda ket direkta a nainaig iti panangapresiarda iti Nakristianuan nga organisasion.
2 Kasanotayo a Maaramidan Dayta: Manipud iti damo a panagadalyo, agtultuloy a gutugotenyo ti estudiante a tumabuno kadagiti gimong ti kongregasion. (Heb. 10:24, 25) Ilawlawagyo no kasano a makapabileg daytoy iti pammatina, tumulong kenkuana a mangaramid iti pagayatan ti Dios, ken mangipaay kenkuana iti gundaway a makitimpuyog kadagiti sabsabali nga agtarigagay met nga agdayaw ken Jehova. (Sal. 27:13; 32:8; 35:18) Dagiti mismo a panangyebkasyo iti ayat ken apresasionyo iti kongregasion ken kadagiti gimong ti manggutugot kenkuana a tumabuno.
3 Masapul a maawatan dagiti kabbaro a ti organisasion ni Jehova ket maysa a sangalubongan a panagkakabsat. Ipabuyayo kadakuada dagiti video a Jehovah’s Witnesses—The Organization Behind the Name ken Our Whole Association of Brothers. Tulonganyo ida a mangapresiar nga us-usaren ni Jehova ti minilion a dedikado a tattao iti sangalubongan a mangitungpal iti pagayatanna. Maammuan koma dagitoy a kabbaro a maaw-awisda met nga agserbi iti Dios.—Isa. 2:2, 3.
4 Gubuayan ti dakkel ti rag-o a makita ti maysa nga estudiante ti Biblia nga agbalin a pudno nga adalan ni Jesus. Dayta ti panggeptayo!—3 Juan 4.