‘Aramidenyo ti Naimbag Kadagiti Amin’
1 ‘Naan-anay nga Ikasabayo ti Sao ti Dios’ ken ‘Agbalinkayo a Nabaknang iti Nasayaat nga Ar-aramid.’ Dagita dagiti tema a nausar kadagiti insert ti Pebrero ken Marso 2002 a Ti Ministeriotayo iti Pagarian. (Col. 1:25; 1 Tim. 6:18) Kadagita nga isyu, naiparegta nga ad-adda a pagreggetantayo a tulongan dagiti interesado a tattao a tumabuno iti Memorial, tulongan dagiti di aktibo a rumegta manen iti kongregasion, ken tulongan dagiti annaktayo ken kualipikado nga estudiante ti Biblia nga agbalin nga agibumbunannag iti naimbag a damag. Awan duadua nga adda dagiti balligi a tinagiragsaktayo gapu iti kinaaneptayo. Ita, “bayat nga addaantayo iti mainugot a tiempo a maipaay iti dayta, [agtultuloy] nga aramidentayo koma ti naimbag kadagiti amin.”—Gal. 6:10.
2 Awisenyo Ida a Tumabuno Manen: Iti Pilipinas, nasurok a 280,000 a tattao a saan nga agibumbunannag iti naimbag a damag ti tinawen a tumabtabuno iti Memorial. Yantangay ti kaaddada ket mangipakita nga adda panaginteresda, ania ti aramidentayo tapno magutugotda nga agbalin a “manamati” dagidiay “siuumiso nga agannayas iti agnanayon a biag”? (Ara. 13:48) Paregtaenyo ida a tumabunoda manen kadagiti gimong ti kongregasion iti kasapaan a panawen aginggat’ mabalin.
3 Apay a diyo awisen ti maysa nga interesado a tao a tumabuno iti Panagadal iti Libro ti Kongregasion tapno matagiragsakna ti makapainteres a diskusion maipapan iti padto ni Isaias? No natudinganka nga agpalawag iti Teokratiko nga Eskuelaan ti Panagministro, mabalin nga awisem nga umay agdengngeg iti pasetmo ti kabagiam wenno am-ammom a tao. Ipakaammom kenkuana dagiti paulo ti palawag publiko kadagiti sumaganad a lawas. (Maipaskil koma iti information board ti napabaro nga eskediul.) Gundawayanyo a tukayen ti tarigagayna nga agdayaw ken ni Jehova. Ken siempre, no saanen a makipagad-adal iti Biblia iti asinoman iti kongregasion, siaayat nga itukonyo ti panagadal kenkuana.
4 Itultuloyyo a Paregtaen ti Di Aktibo: Adu kadagiti tumabuno iti Memorial ti nagdedikaren ken ni Jehova. Ngem adda tiempo nga insardengda ti aktibo a panangikasaba iti naimbag a damag. Agpapan pay kasta, binalakadannatayo ni Pablo nga “aramidentayo koma ti naimbag . . . nangnangruna kadagidiay nainaig kadatayo iti pammati.” (Gal. 6:10) Gapuna, kangrunaan koma a pakaseknantayo dagiti di aktibo.
5 Babaen ti pammaregta dagiti panglakayen wenno dagiti sabsabali, mabalin a nagtignayen ti dadduma a makipaset manen iti ministerio. No dinutokannakayo dagiti panglakayen a makipagtrabaho iti aktibo manen nga agibumbunannag, agkompiansa dayta a kabsat no makitana ti mismo a panagayatyo ken ni Jehova ken iti ministerio. Ipakitayo kenkuana no kasano ti pannakipasetyo iti nagduduma a benneg ti ministerio tapno pagragsakanna dayta, maitultuloyna ti trabaho a panangasaba, ket matagiragsakna dagiti bendision ni Jehova.
6 Tulonganyo Dagiti Kabbaro nga Agibumbunannag a Maaddaan iti Nasayaat a Pangrugian: Maysa a kabbaro nga interesado a babai ti nagtarigagay a mangasaba a dagus idi mabigbigna a nabirokanna ti pudno nga organisasion ti Dios. Kalpasan a naadalna no ania ti makalikaguman kenkuana, kinunana: “Kayatko a rugian a dagus.” No ti iyad-adalanyo iti Biblia ket naaprobaranen a makipaset iti tay-ak ti serbisio, ilawlawagyo a nasken a ‘mangrugi a dagus,’ ket ngarud tulonganyo a maaddaan iti nasayaat a pangrugian. Tulonganyo a maaddaan iti rutina iti panagsagana ken regular a pannakiraman iti ministerio iti kada lawas.
7 No ti mismo nga anakyo ti nagbalin a kabbaro a di bautisado nga agibumbunannag, tulonganyo a rumang-ay sigun iti edad ken kabaelanna. Babaen ti sumagmamano a tulongyo, mabalin a pagsiddaawennakayo iti kinalaingna a makisarita iti maysa a tao, mangibasa iti Biblia, ken mangitukon iti literatura. No nakasapul iti interesado a tao iti pangasabaan, sanayenyo nga agsarungkar ken mangsurnad iti interes.
8 Parang-ayenyo ti Mismo a Ministerioyo: Ipalubos kadi ti kasasaadyo a reggetan ti panagebanghelio uray kalpasan ti tiempo ti Memorial? Manayonanyo kadi iti maysa wenno dua nga oras iti kada lawas ti gagangay a busbusbosenyo iti panangasaba? Paspasungadanyo kadi iti kalendario no kaanokayo manen a makapag-auxiliary pioneer? Wenno mabalin kadi a baliwanyo ti estilo ti panagbiagyo tapno makastrekkayo iti amin-tiempo a ministerio? Amin a panagreggettayo iti ministerio ket mabalin a makatulong iti maysa a tao a mangawat iti kinapudno! (Ara. 8:26-39) Bayat a kumitkitatayo kadagiti masungad nga aldaw, ‘kankanayon [koma] a surotentayo ti naimbag maipaay iti maysa ken maysa ken iti amin a sabsabali pay.’—1 Tes. 5:15.
[Kahon iti panid 3]
Itultuloyyo ti Tumulong:
□✔ Dagiti timmabuno iti Memorial
□✔ Dagiti aktibo manen nga agibumbunannag
□✔ Dagiti kabbaro a di bautisado nga agibumbunannag