Ti Rag-o nga Itden ti Amin-Tiempo a Serbisio
1 Kas maysa nga agtutubo, nalabit pinampanunotyo ti maipapan iti masakbayanyo. Kunaen kadatayo ti Proverbio 21:5 a “dagiti gakat daydiay nasaet sigurado a mangipaay iti pagsayaatan.” Agpaay a pagsayaatanyo no usigenyo a naimbag dagiti kalatyo iti biag. Bayat nga aramidenyo dagiti planoyo iti masanguanan, usigenyo ti sumrek iti amin-tiempo a serbisio. Apay?
2 Agsaludsodkayo kadagiti nataengan a nagpayunir bayat ti kinaagtutuboda no ania ti nariknada ket agpapada ti ibagada: “Dagidiay ti kasayaatan a tawtawen ti biagko!” Ita ta nataenganen, kinuna ti maysa a kabsat a napasaranna ti rag-o ti amin-tiempo a serbisio sipud pay idi agtutubo: “Maragsakanak unay no lagipek ti tiempo ti kinaagtutubok ken mabalinko a kunaen nga impangagko ti nainsiriban a balakad a: ‘Lagipem, itan, ti Naindaklan a Namarsuam kadagiti aldaw ti kinaagtutubom.’” (Ecl. 12:1) Agpadpada a kasapulanyo ken dagiti dadakkelyo ti naannad a panagplano itan, tapno mapasaranyo daytoy a kita ti rag-o bayat ti kinaagtutuboyo.
3 Nagannak, Iparegtayo ti Amin-Tiempo a Serbisio: Kas maseknan nga Ama, idalannakayo ni Jehova iti rumbeng a papananyo. (Isa. 30:21) Iti panangitedna iti kasta a naayat a panangiwanwan, mangipapaay iti nagsayaat nga ehemplo para kadakayo a Kristiano a nagannak. Imbes a bay-anyo dagiti annakyo nga agpili no ania a dalan ti kasayaatan para kadakuada, nainsiriban a sanayenyo ida iti dalan a rumbeng a pagnaanda tapno magun-odanda ti bendision ni Jehova. Iti kasta, inton nataengandan, ti panangsanayyo tulonganna ida a “mangilasin agpadpada iti umiso ken di umiso.” (Heb. 5:14) Ammo dagiti nataengan manipud kadagiti kapadasan a dida makapagtalek iti bukodda a pangngeddeng; masapul nga agtalekda ken Jehova a mangilinteg kadagiti danada. (Prov. 3:5 ,6) Ad-adda a kasapulan daytoy dagiti agtutubo, a kurang ti kapadasanda iti biag.
4 Dakayo a nagannak, bayat nga umad-adani dagiti annakyo iti tawtawen ti kinaagtutubo, wenno nasapsapa pay, kasaritayo ida a naimbag maipapan kadagiti kalatda a kurso. Dagiti mammagbaga iti eskuelaan, mannursuro, ken kaklaseda mabalin nga impluensiaanda ida a mangpili kadagiti nailubongan, materialistiko a kalat. Tulonganyo dagiti annakyo a mangpili kadagiti kurso a makaipaay iti praktikal a pannakasanay, a makatulong kadakuada a mangaywan kadagiti material a kasapulanda a dida ikompromiso ti interes ti Pagarian. (1 Tim. 6:6-11) Kadagiti adu a kasasaad, mabalin a ti panagturpos iti haiskul agraman ti bokasional ken/wenno on-the-job training ti mangipaay iti umdas a kasapulan ti maysa bayat a mangrugi nga agserbi kas regular pioneer.
5 Paregtaenyo dagiti agtutubo a mangragpat iti sagut a kinaawan asawa. No inton agangay ikeddengda ti makiasawa, nakasaganadanton a mangibaklay kadagiti nadagdagsen a responsabilidad iti panagasawa. (Kitaenyo ti suplemento iti Ti Ministeriotayo iti Pagarian a Hunio 2001 iti parapo 19 a “Sidadaankayo Kadi a Pausar?”) Babaen ti pannakisaritayo iti positibo a wagas maipapan iti panagpayunir, panagserbi iti lugar a dakdakkel ti pakasapulan, panagserbi iti Bethel, ken panagmisionero, imulmulayo kadagiti agtutubo uray no ubingda pay ti tarigagay a mangusaren iti biagda iti wagas a makaay-ayo ken ni Jehova, makagunggona iti sabsabali, ken mangyeg iti rag-o kadakuada a mismo.
6 Agtutubo, Iyun-unayo ti Amin-Tiempo a Serbisio: Dakayo nga agtutubo, saanen a kasapulan a panunotenyo no ania ti kayat a sawen ti panagpayunir. Mabalinyo a padasen dayta babaen ti panagserbiyo a kas auxiliary pioneer no mabalinanyo iti panawen ti panageskuela ken no bakasion. Iti kasta, maammuanyonto a pudno a makapnek ti panagpayunir! Maiplanoyo kadi a nasaksakbay ti ag-auxiliary pioneer ita ken inton ngudo ti kalgaw?
7 No maysaka nga agtutubo iti organisasion ti Dios, panunotem met a naimbag no kasano a maragpatmo dagiti kualipikasion iti panagbalin a ministerial nga adipen. (1 Tim. 3:8-10, 12) Kanayonanna, ikeddengmo no kayatmo ti agaplikar nga agserbi iti Bethel wenno agadal iti Ministerial Training School, apaman a nadanonmon ti makalikaguman nga edad. Adu ti napateg a masursurom iti panagpayunirmo, no kasano ti agbiag nga adda sursurotem nga eskediul, no kasano a maparang-ay ti panangyurnos kadagiti aktibidadmo, no kasano ti makilangen iti sabsabali, ken no kasano ti agbalin a responsable. Amin dagitoy ti mangisagana kenka para iti ad-adu a pribilehio iti serbisio inton agangay.
8 Ti maysa a napateg a banag iti panagballigi iti amin-tiempo a serbisio isu ti kinasaet a mangaramid kadagiti banag a mainaig iti panagserbi iti Dios. Imparegta ni apostol Pablo ti kasta a kababalin, ket dinakamatna dagiti gunggona nga itdenna: “Aniaman ti ar-aramidenyo, aramidenyo dayta nga amin-kararua a kas maipaay ken Jehova, . . . ta ammoyo a manipud ken Jehova nga awatenyonto ti maitutop a gunggona ti tawid.” (Col. 3:23, 24) Bendisionannakayo koma ni Jehova iti adu a rag-o iti amin-tiempo a serbisio!