Idianyo Dagiti “Awanan Pateg a Bambanag”
1 Popular ita a pamay-an ti komunikasion ti E-mail. Nupay mabalin nga awan pagdaksanna ti panangiranud kadagiti personal a kapadasan ken impormasion iti pamilia ken gagayyem babaen iti daytoy a pamay-an, ania dagiti “awanan pateg a bambanag” a mainaig iti awan limitasionna a panangusar iti E-mail?—Prov. 12:11.
2 Panagannad Maipapan iti E-Mail: Adda dagiti agkuna a nasaysayaat ti komunikasionda iti organisasion ni Jehova no makaawatda iti ipagarupda a baro nga impormasion babaen ti E-mail. Mabalin a karaman iti daytoy dagiti kapadasan, impormasion maipapan kadagiti pasamak iti Bethel, report maipapan kadagiti didigra wenno pannakaidadanes, ken uray dagiti kompidensial nga impormasion a maipakaammo iti Kingdom Ministry School. Agparang a magagaran unay dagiti dadduma a mangipatulod kadagiti kasta a mensahe, a kayatda nga isuda ti umuna a makaidanon iti impormasion kadagiti gagayyemda.
3 No dadduma, maballikug wenno masobraan dagiti impormasion ken kapadasan. Wenno gapu iti kinagagarda, saan nga umiso nga impresion ti mapataud dagiti dadduma. Dagidiay agdarasudos a mangipalgak kadagita a banag ket masansan a saanda nga ammo ti pudno a kasasaad. (Prov. 29:20) Iti dadduma a kaso, uray no di nakappapati ti maysa nga estoria, pagparangenda a makapainteres. Dagiti kasta a di umiso wenno makaallilaw a report ket maibilang nga “ulbod a sarsarita,” a saan a mangitandudo iti pudno a nadiosan a debosion.—1 Tim. 4:6, 7.
4 No mangipatulodkayo iti impormasion a saan nga umiso, adda sungsungbatanyo no mangpataud daytoy iti ladingit wenno pannakariro. Idi nadamag ni David a napapatay dagiti amin nga annakna a lallaki, “rinay-abna dagiti pagan-anayna” gapu iti ladingitna. Ngem kinapudnona, maysa laeng kadagiti annakna ti natay. Makapaladingit dayta, ngem nadegdegan ti ladingit ni David gapu iti daytoy nalabes a panangipadamag. (2 Sam. 13:30-33) Ditay la ketdi kayat ti agaramid iti aniaman a mangallilaw wenno mangupay iti asinoman kadagiti kakabsattayo.
5 Ti Kalasugan nga Insaad ti Dios: Laglagipenyo nga adda insaad ti nailangitan nga Amatayo a kalasugan ti komunikasion, “ti matalek ken masirib nga adipen.” Dayta nga “adipen” ti mangikeddeng no ania nga impormasion ti rumbeng a maammuan ti sangakabbalayan ti pammati, ken kasta met “ti umiso a tiempo” a pannakaipalgak dayta. Magun-odan laeng daytoy naespirituan a taraon babaen ti teokratiko nga organisasion. Rumbeng nga agpannuraytayo a kanayon iti kalasugan nga insaad ti Dios a mangipaay iti mapagtalkan nga impormasion, saan nga iti network dagiti agus-usar iti Internet.—Mat. 24:45.
6 Dagiti Web Site iti Internet: Addaantayo iti opisial a Web site iti Internet: www.watchtower.org. Umanayen daytoy a site a mangipaay iti impormasion iti publiko. Saanen a kasapulan a mangaramid ti asinoman nga indibidual, aniaman a komite, wenno kongregasion iti Web page maipapan kadagiti Saksi ni Jehova. Inserrek dagiti dadduma ti linaon dagiti publikasiontayo agraman dagiti amin a teksto ken reperensia ken nangitukonda pay ketdi kadagiti kopia dagiti material para iti kombension nga adda donasionna. Panguartaan man daytoy wenno saan, maisalungasing kadagiti linteg ti copyright ti panangkopia ken panangiwaras kadagiti publikasion dagiti Saksi ni Jehova iti elektroniko a dokumento. Nupay mabalin nga ibilang daytoy dagiti dadduma kas panagserbi kadagiti kakabsat, saan a maanamongan ken rumbeng a maisardeng dayta.
7 Ti panagannad ken kinasimbeng ti panunot iti panangusar iti elektroniko a komunikasion ipasiguradona a mapno ti pampanunottayo iti “tagtagipatgen ken makaay-ayo a bambanag nga addaan pateg.”—Prov. 24:4.