Buyaenyo Koma ti Video a No Blood—Medicine Meets the Challenge
Kasano kaadu ti pannakaammoyo maipapan kadagiti alternatibo a pamay-an iti tay-ak ti panangagas a di agusar iti dara? Ammoyo kadi no ania ti sumagmamano nga alternatibo iti panangyalison iti dara ken no ania ti maaramidan dagitoy? Buyaenyo daytoy a video, ket subokenyo ti pannakaammoyo babaen dagiti sumaganad a saludsod.—Tandaanan: Gapu ta naglaon ti video kadagiti ababa nga eksena ti panagopera, nasken a tingitingen dagiti nagannak no buyaenda daytoy a video a kaduada dagiti ubbing.
(1) Ania ti kangrunaan a rason no apay a di agpayalison iti dara dagiti Saksi ni Jehova, ken pakasarakan dayta a prinsipio iti Biblia? (2) No maipapan iti panagpaagas, ania ti tarigagayantayo? (3) Ania dagiti kangrunaan a kalintegan dagiti pasiente? (4) Apay a nainkalintegan ken kinaresponsable ti saan a panagpayalison iti dara? (5) No nakaro ti panagpadara, ania ti dua a naganat nga un-unaen koma dagiti doktor? (6) Ania dagiti peggad iti salun-at a nainaig iti panagpayalison iti dara? (7) Ania ti sumagmamano nga alikamen a mabalin nga usaren dagiti siruhano tapno awan unay ti agsayasay a dara kabayatan ti operasion? (8) Ania ti nasken a maammuanyo maipapan iti aniaman nga alternatibo iti panangyalison iti dara? (9) Mabalin kadi nga aramiden dagiti serioso ken komplikado nga operasion uray awan ti mayalison a dara? (10) Ania ti situtulok nga aramiden ti umad-adu a bilang dagiti doktor para kadagiti Saksi ni Jehova, ken ania ti nalabit agbalinto nga estandarte iti panangtaming iti amin a pasiente?
Awan duadua a makatulong ti panagbuya iti video a No Blood a kadua ti asinoman nga iyad-adalan iti Biblia, saan a Saksi nga asawa wenno kabagian, katrabahuan, mannursuro, ken kaeskuelaan a mabalin nga agsaludsod maipapan iti takdertayo mainaig iti dara. Ti panangawat iti aniaman a wagas ti panangagas a naipabuya iti video ket desision ti indibidual a maibatay iti konsiensiana.—Kitaenyo ti “Salsaludsod Dagiti Agbasbasa” iti Hunio 15 ken Oktubre 15, 2000, a ruar Ti Pagwanawanan.