Usaren a Sieepektibo ti Biblia
1. Ania ti mabalinyo nga aramiden a panagsagana iti tay-ak ti ministerio?
1 Aniaman ti literatura nga itukontayo iti tay-ak, makagunggona no mangpilitayo iti maysa a mamagpanunot a teksto nga iranud kadagidiay umimdeng. (Heb. 4:12) Nalaklaka a maiturong ti saritaan iti publikasion nga ituktukonyo no mangpilikayo iti maysa a teksto a naaramat iti dayta a publikasion. Iti dadduma a lugar, napaliiw dagiti agibumbunannag a makagunggona no iggemda a mismo ti Biblia no asitganda ti maysa a tao wenno no mangasabada iti binalaybalay.
2. (a) Kasanotay a marugian ti pannakisaritatayo babaen ti maysa a teksto? (b) Ania a suheto iti Biblia ti paginteresan dagiti tattao iti teritoriayo?
2 Rugianyo Babaen ti Maysa a Teksto: Rugian ti dadduma nga agibumbunannag ti pannakisaritada babaen ti panangyimtuodda no ania ti kapanunotan ti bumalay mainaig iti teksto nga ibasada. Maiturong a dagus ti saritaan iti Sao ti Dios. Maitutop kadi iti teritoriayo dagiti sumaganad nga introduksion?
◼ “No adda pannakabalinyo, aramidenyo kadi dagitoy a panagbalbaliw?” Basaenyo ti Apocalipsis 21:4.
◼ “Apay nga agbibiagtayo iti nakapegpeggad a tiempo?” Basaenyo ti 2 Timoteo 3:1-5.
◼ “Iti panagkunayo, nasaysayaat ngata a pagbiagan ti komunidadtayo no suroten ti amin a tattao daytoy a balakad?” Basaenyo ti Mateo 7:12.
◼ “Iti panagkunayo, matagiragsakto kadi dagiti annakyo ti kasasaad a nailadawan ditoy?” Basaenyo ti Salmo 37:10, 11.
◼ “Patienyo kadi a dumtengto ti panawen a pumudno dagitoy a sasao?” Basaenyo ti Isaias 33:24.
◼ “Nangngegyo kadin ti maipapan iti pannakasukat ti gobierno a nadakamat ditoy?” Basaenyo ti Daniel 2:44.
◼ “Adda kadi panawen a kayatyo a saludsoden daytoy iti Dios?” Basaenyo ti Job 21:7.
◼ “Posible ngata a makitatayto manen dagiti pimmusay nga ing-ingungotentayo?” Basaenyo ti Juan 5:28, 29.
◼ “Ammo kadi dagiti natay no ania ti ar-aramiden dagiti sibibiag?” Basaenyo ti Eclesiastes 9:5.
3. Kasanotay a matulongan dagiti tattao tapno matarusanda dagiti teksto ti Biblia nga ibasatayo kadakuada?
3 Ilawlawag, Iyilustrar, Iyaplikar: No sidadaan a makisarita ti tao, dikay dardarasen a leppasen ti saritaan. Mangbusboskayo iti tiempo a mangilawlawag, mangyilustrar, ken mangyaplikar iti kasuratan a binasayo tapno maawatanna dayta. (Neh. 8:8) No matarusan ken bigbigen dagiti tattao ti isursuro ti Sao ti Dios, mabalin a dakkelto ti pagbalbaliwanda.—1 Tes. 2:13.
4. Kasanotay a mausar a sieepektibo ti Biblia no agsarungkartayo?
4 Itultuloyyo nga usaren ti Biblia a sieepektibo bayat a sukayenyo ti interes ti bumalay. Mabalin nga usarenyo ti isu met laeng a wagas no agsarungkarkayo: (1) Mangpili iti maitutop a teksto. (2) Mangpataud iti maysa a simple a saludsod a mangibuksil iti kapanunotan ti bumalay mainaig iti dayta a teksto. Kalpasanna ibasa ti teksto. (3) Ilawlawag, iyilustrar, ken iyaplikar dayta. Ikagumaanyo a parayrayen ti pannakaammo ti bumalay maipapan iti Sao ti Dios kada sumarungkarkayo. Mabalin nga agturong dayta iti panagadal iti Biblia!