Makatulongkayo Kadi?
1 Kanayon a mangbirbirok ni Jehova kadagiti pamay-an a mangtulong kadagiti nasungdo nga adipenna. (2 Cron. 16:9; Isa. 41:10, 13) Iti panangyaspingna ken Jehova iti maysa a naayat a pastor, insurat ni Isaias: “Babaen ti takiagna ummongennanto a sangsangkamaysa dagiti kordero; ket iti barukongna awitennanto ida. Dagidiay agpaspasuso siaannad nga idalannanto ida.” (Isa. 40:11) Usigentayo ti sumagmamano a pamay-an no kasanotayo a matulad ti naayat a pannakaseknan ni Jehova.
2 Panangtulong Kadagiti Kabbaro: Makatulongtayo no awisentayo dagiti kabbaro a mangtagiragsak iti makapabileg a pannakitimpuyogda kadatayo. (Prov. 13:20) Malagip ti maysa a kabsat no kasano a tinulongan dagiti sabsabali idi inrugina ti makitimpuyog iti kongregasion. Kinunana: “Maysa a pamilia ti nangawis kaniak iti sumagmamano a gundaway iti panagadalda kas pamilia. Bayat a rumangrang-ayak, kanayon nga aw-awisendak dagiti agkabannuag nga agassawa a payunir a makikadua kadakuada iti agmalmalem a panangasaba. Kanayon a nagsayaat dagiti panagsasaritami maipapan kadagiti naespirituan a banag.” Innayonna: “Sakbay a nagbalinak a Kristiano, kanayon idi nga aglinglingayak iti rabii ti Biernes ken Sabado. Ngem ti panawen a kaaddak kadagiti kakabsat ti nangpennek iti tarigagayko a maaddaan kadagiti kakadua.” Ti naayat a pannakaseknan ti kongregasion ti timmulong iti daytoy a kabsat tapno naan-anay a mairamut ken tumibker iti pammati. Ita, agserserbin kas kameng ti pamilia a Bethel.—Col. 2:6, 7.
3 Panagpipinnabileg: Mabalintayo ti tumulong no maipasango dagiti kakabsattayo kadagiti narikut a kasasaad. Maiwayaam kadi nga awisen ti maysa a di makabael nga agibumbunannag a mangasaba babaen ti telepono wenno makikadua kenka a mangyadal iti Biblia, a nalabit ikuyogmo pay ketdi iti pagtaenganna ti iyad-adalam iti Biblia? Agkasapulan kadi iti tulong ti maysa a nagannak nga addaan iti ubing pay nga anak no makiraman iti ministerio? Adda kadi dagiti managbabain nga agkasapulan iti tulongmo no sumarungkar wenno makiramanda iti dadduma pay a benneg ti ministerio? Ti naayat a pannakaseknan kadagiti kakabsattayo ti mangtignay kadatayo a mangbirok kadagiti pamay-an a mangpabileg kadakuada.—Roma 14:19.
4 Bayat a tultuladentayo ti nadungngo a pannakaseknan ni Jehova kadagiti adipenna, makapagpipinnabilegtayo, matulongantayo ti kongregasion nga agkaykaysa iti ayat, ken maidaydayawtayo ti nailangitan nga Amatayo.—Efe. 4:16.