Panangparayray iti Interes Babaen ti Regular a Panangitulod iti Magasin
1. Kasanotayo a mausar ti regular a panangitulod iti magasin a mangparayray iti interes?
1 Adu a tattao a makasaritatayo iti ministerio ti mangpasangbay kadatayo ken siraragsak a mangawat kadagiti literaturatayo ngem agkedkedda nga agpayadal iti Biblia. Ti maysa a pamay-an tapno maparayray ti interesda ket babaen ti regular a panangitulod iti magasin. No makaipaimakayo kadagiti magasin, isuratyo ti nagan ken adres ti tao a napaimaanyo, ti petsa ti panagsarungkaryo, dagiti isyu nga innalana, ti teksto a napagsaritaanyo, ken ti aniaman a kapaliiwanyo a mabalin a mangipakita no ania dagiti paginteresanna. Tunggal adda sumangpet a baro nga isyu dagiti magasin, mangbirokkayo kadagiti punto a paginteresan dagiti itultulodanyo, ket itampokyo dagita inton sumarungkarkayo. (1 Cor. 9:19-23) Inton agangay, addanto mabasada kadagiti magasintayo a mabalin a mangtukay iti interesda, iti kasta tarigagayandanton a maammuan ti ad-adu pay.
2. Apay a dagiti tattao masapul a sigaganat a birokenda itan ni Jehova, ket ania pay ti mabalintayo nga aramiden tapno matulongantayo ida?
2 Nupay kasta, bigbigentayo a kaaduan a tattao ket saan nga agbalin nga ad-adipen ni Jehova babaen laeng ti panangbasada a bukbukod kadagiti magasin. Gapu ta dagiti tattao masapul a sigaganat a birokenda itan ni Jehova, ania pay ti mabalintayo nga aramiden tapno matulongantayo ida? (Sof. 2:2, 3; Apoc. 14:6, 7) Maparayraytayo ti interesda babaen ti panangibasatayo kadakuada iti maysa a teksto a naannad ti pannakapilina tunggal mangitulodtayo kadagiti magasin.
3. (a) Kasano a masaganaantayo dagiti saritaan a maysa laeng a teksto ti mausar iti kada panagsarungkar? (b) Ania dagiti topiko a pakaseknan unay dagiti tattao iti teritoriayo?
3 Panangilawlawag iti Maysa Laeng a Teksto: Panunotenyo dagidiay regular nga itultulodanyo iti magasin, ket mangisaganakayo iti maysa a teksto a pagsaritaanyo iti kada panagsarungkaryo a maibagay iti espesipiko a kasapulan ti tunggal maysa. (Fil. 2:4) Kas pagarigan, no adda maysa kadakuada a nabiit pay a natayan iti patpatgen, mabalin a sumarungkarkayo iti sumagmamano a gundaway tapno pagsaritaanyo ti kuna ti Biblia maipapan iti kasasaad dagiti natay ken ti namnama a panagungar. Bayat nga isaganaanyo dagitoy a saritaan a maysa laeng a teksto ti mausar, mabalinyo nga aramaten ti material iti libro a Pannakirinnason iti sidong dagiti paulo nga “Ipapatay” ken “Panagungar.” Mabalin a mapasarunsonanto dayta iti kanayonan a panagsarita maipapan kadagiti mainaig a topiko kas iti no kasano a maawanton a naan-anay ti sakit, panaglakay wenno panagbaket, ken ipapatay. Ti panggepyo ket ammuen no ania a topiko ti paginteresan ti tao ken in-inut nga ipakitayo kenkuana no ania ti kuna ti Biblia maipapan iti dayta.
4. Apay a rumbeng a makaisuro koma ti panangusartayo iti Kasuratan, ken kasanotayo a maaramid dayta?
4 Makaisurokayo Koma: Nupay gagangay a kasayaatan a pagtalinaeden a simple ken ababa dagiti saritaan, saan nga umdas ti basta panangbasa iti napili a teksto. Binulsek ni Satanas ti panunot dagiti tattao maipapan iti naimbag a damag. (2 Cor. 4:3, 4) Uray dagidiay pamiliar iti Biblia kasapulanda met ti tulong tapno maawatanda dayta. (Ara. 8:30, 31) Gapuna, iwayaanyo nga ilawlawag ken ipakita ti aplikasion ti teksto, kas iti ar-aramidenyo no adda pasetyo iti Teokratiko nga Eskuelaan ti Panagministro. (Ara. 17:3) Siguraduenyo a makita ti maysa a tao ti kinapateg ti Sao ti Dios iti mismo a biagna.
5. Kasano a posible nga agbalinto nga iyad-adalanyo iti Biblia ti regular nga itultulodanyo iti magasin?
5 No magustuan ti bumalay dagiti masursurona, in-inut nga ibaybayagyo ti makisarita babaen ti panangilawlawagyo iti dua wenno tallo a teksto ti Biblia iti tunggal panagsarungkaryo. Mangbirokkayo iti gundaway a maidatagyo ti broshur a Kalikaguman wenno ti libro a Pannakaammo. Iti daytoy a pamay-an, posible nga agbalinto nga iyad-adalanyo iti Biblia ti maysa a regular nga itultulodanyo iti magasin.