No Ania ti Ibagayo Maipapan Kadagiti Magasin

Ti Pagwanawanan Ene. 15

“Kadagiti kallabes a tawen, umad-adu ti agin-interes kadagiti anghel. Pinampanunotyo kadin no siasinoda ken no kasano nga apektaranda ti biagtayo? [Palubosanyo a sumungbat sa basaenyo ti Salmo 34:7.] Salaysayen daytoy a magasin no ania ti kuna ti Biblia maipapan kadagiti aktibidad dagiti anghel—idi, ita, ken iti masanguanan.”

Agriingkayo! Ene.

“Iti kaaldawantayo, adda magun-odan a balakad maipapan iti dandani amin a suheto. Iti panagkunayo, mano ngata kadagita ti mapagtalkantayo? [Palubosanyo a sumungbat sa basaenyo ti 2 Timoteo 3:16.] Ipakita daytoy a ruar ti Agriingkayo! no apay a mapagtalkantayo ti Biblia kas gubuayan ti praktikal a sirib.” Itampokyo ti artikulo a mangrugi iti panid 18.

Ti Pagwanawanan Peb. 1

“Kasapulantayo amin ti kuarta tapno adda pagbiagtayo. Ngem umanamongkayo kadi a kasapulan ti panagannad maipapan iti peggad a nadakamat ditoy? [Basaenyo ti 1 Timoteo 6:10 sa palubosanyo a sumungbat.] Daytoy a ruar Ti Pagwanawanan tulongannatayo a mangilasin kadagiti sumagmamano a gagangay a silo ti material a kinabaknang ken isalaysayna no kasano a liklikan dagita.”

Agriingkayo! Peb.

“Adu kadatayo nga addaan iti nataengan a kakabagian ken gagayyem ti mangpampanunot no kasano a matulongantayo ida a mangdaer kadagiti parikut a gagangay kadagiti lallakay ken babbaket. Umanamongkayo kadi? [Palubosanyo a sumungbat.] Naglaon daytoy a magasin kadagiti singasing no ania ti mabalintayo nga aramiden tapno ad-adda a maibturanda ti panagbaket ken panaglakay. Ilawlawagna pay no kasano a matungpal daytoy a padto.” Basaenyo ti Job 33:25.