Isarsaritayo ti Maipapan iti “Silaw ti Lubong”
1. Ania a dakkel a lawag ti naipadto iti Sao ti Dios, ken ania nga okasion ti mangted iti naisangsangayan a gundaway tapno maisarsaritatayo ti maipapan iti daytoy a lawag?
1 Impadto ni Jehova babaen ken ni propeta Isaias: “Dagiti umili a magmagna idi iti sipnget nakakitada iti dakkel a lawag. No maipapan kadagidiay agnanaed iti daga ti napuskol a kinasipnget, ti met laeng lawag nagsilnag kadakuada.” (Isa. 9:2) Ti “dakkel a lawag” ket nakita kadagiti aramid ti mismo nga Anak ti Dios, ni Jesu-Kristo. Ti panangasabana idi ditoy daga ken dagiti bendision nga inyeg ti panagsakripisiona linawaganna dagidiay adda iti naespirituan a kinasipnget. Dayta a lawag ti kasapulan dagiti tattao kadagitoy nasipnget a tiempo. Mangipaay ti Pangrabii ti Apo iti naisangsangayan a gundaway tapno maisarsaritatayo ti maipapan iti “silaw ti lubong.” (Juan 8:12) Idi napan a tawen, riniwriw a tattao ti nangipakita nga addaanda iti pammati babaen ti pannakikaduada kadatayo a mangaramid iti bilin ni Jesus: “Itultuloyyo nga aramiden daytoy kas panglaglagip kaniak.” (Luc. 22:19) Bayat nga umad-adanin ti panangrambaktayo iti Memorial iti daytoy a tawen, ania ti aramidentayo tapno maisarsaritatayo ti dakkel a lawag a pinagsilnag ni Jehova?—Fil. 2:15.
2. Ania ti aramidentayo tapno rumayray ti nauneg nga apresasiontayo iti subbot a sakripisio, ken ania ti epektona no aramidentayo daytoy?
2 Patanoren ti Nauneg nga Apresasion: Ti panawen ti Memorial ket nainggundawayan a tiempo tapno utoben ti naindaklan nga ayat nga impakita da Jehova ken Jesus babaen ti pannakaipaay ti subbot a sakripisio para iti sangatauan. (Juan 3:16; 2 Cor. 5:14, 15) Ti panangaramid iti kasta awan duadua a parayrayenna ti nauneg nga apresasiontayo iti daytoy a sagrado nga okasion. Amin nga adipen ti Dios kayatda ti mangilatang iti tiempo a mangbasa ken mangutob iti espesial a panagbasa iti Biblia iti panawen ti Memorial, kas naibalabala iti Panangsukimat Kadagiti Kasuratan iti Inaldaw. No panunotentayo dagiti awan kaaspingna a kualidad ni Jehova, a sidadayag a naipalgak iti panangipaayna iti subbot, matignaytayo a mangipannakkel kenkuana kas Diostayo. No utobentayo ti kaipapanan ti subbot para kadatayo a mismo, rumayray ti naimpusuan a panagayattayo iti Dios ken iti Anakna ken magutugottayo a mangipaay iti amin a kabaelantayo a mangaramid iti pagayatan ti Dios.—Gal. 2:20.
3. Kasanotayo a maipakita ti apresasiontayo iti Memorial?
3 No paunegentayo ti apresasiontayo iti probision a pannakaisalakan nga impaay ni Jehova, ti kinagagartayo a mangsegsegga iti Memorial impluensiaanna dagiti iyad-adalan iti Biblia, sarsarungkaran, kakabagian, kaarruba, kaeskuelaan, katrabahuan, ken ti dadduma pay a kayattayo nga awisen iti daytoy a naisangsangayan nga okasion. (Luc. 6:45) Gapuna, mangaramidtayo iti naisangsangayan a panagregget a mangawis kadakuada amin, nga ikkantayo ida kadagiti nakaimprenta nga imbitasion iti Memorial nga agserbi kas pammalagip. Ti ar-aramiden dagiti adu tapno awan ti malipatanda ket ilistada dagidiay regular nga aw-awisenda iti Memorial, ken tinawen nga adda inayonda iti listaanda. Ti panangaramid iti dayta iti organisado a pamay-an ken ti panangipakattayo iti amin a kabaelantayo a mangawis kadagiti interesado ket nagsayaat a pamay-an ti panangyebkas iti panagyamantayo ken ni Jehova a Dios “gapu iti di mailadawan a sagutna nga awanan bayad.”—2 Cor. 9:15.
4. Ania ti makatulong kadatayo tapno ad-adu nga oras ti mabusbostayo a makiraman iti ministerio iti Marso, Abril, ken Mayo?
4 Mangbusbos iti Ad-adu nga Oras iti Ministerio: Kabaelam kadi ti mangbusbos iti ad-adu nga oras a makiraman iti ministerio iti Marso, Abril, ken Mayo? Sigurado a bendisionannaka ti Dios no ikagumaam nga iranud kadagiti sabsabali ti maipapan iti “nadayag a naimbag a damag maipapan iti Kristo.” Ni Jehova, kas Gubuayan dagiti amin a naespirituan a lawag, imbilinna: “Agsilnag koma ti silaw manipud iti sipnget.” (2 Cor. 4:4-6) No kasapulan, mangyurnos dagiti panglakayen kadagiti kanayonan a taripnong sakbay ti panangasaba nga angayenda iti dadduma pay a lokasion ken idauluanda ti panangsuporta kadagiti agibumbunannag a mayat a mangbusbos iti ad-adu nga oras iti ministerio. Mabalin a ramanen daytoy ti panangasaba kadagiti lansangan bayat ti parbangon, ket iti malem wenno rabii, mabalin nga iyurnos ti panangasaba iti lugar ti negosio ken ti panangasaba babaen ti telepono. Tapno ad-adu ti mabusbosmo nga oras a makiraman iti ministerio, makatulong no mangikeddengka iti oras a kabaelam a ragpaten, ken ikagumaam a ragpaten dayta. Para kadagiti adu, ti panangipaayda ken ni Jehova iti amin a kabaelanda ramanenna ti panagserbida kas auxiliary pioneer.—Col. 3:23, 24.
5. Kasano a mabembenipisiaran ti adu iti naksayan nga oras a maikalikagum kadagiti auxiliary pioneer?
5 Makapagserbika Kadi Kas Auxiliary Pioneer? Nasurok a pito a tawen ti napalabasen sipud idi naksayan ti oras a maikalikagum kadagiti auxiliary pioneer. Daytoy a panagbalbaliw ket nakatulong iti ad-adu pay tapno mapadasanda dagiti bendision nga itden ti panagserbi kas auxiliary pioneer. Pinadasmo kadin daytoy? Adda dagiti tinawen a mangar-aramid iti kasta. Kadagiti adu a kongregasion, adu nga agibumbunannag ti makiramraman iti daytoy a porma ti panagserbi, ken nagbalin daytoy a makagunggona a tampok ti aktibidad ti kongregasion bayat ti tawen. Kabaelam kadi ti makiraman iti naragsak a bulan ti panag-auxiliary pioneer bayat ti panawen ti Memorial? Para kadagiti dadduma, mabalin a nasaysayaat ti bulan ti Abril yantangay addaan daytoy iti lima a ngudo ti lawas.
6. Ania dagiti makaparagsak a probision a naisagana para kadatayo?
6 Ti kadi kongregasionyo ti naka-eskediul a bisitaen ti manangaywan iti sirkito bayat ti Marso, Abril, wenno Mayo? Adda kanayonan a bendision a silulukat kenka. Kas iti naipakaammo a nasaksakbay, iti 2006 a tawen serbisio, amin nga agserserbi kas auxiliary pioneer bayat ti bulan nga ibibisita ti manangaywan iti sirkito, maawisda a tumabuno iti umuna a kagudua a paset ti miting dagiti payunir bayat ti lawas ti bisita. Awan duadua a ti makapabileg iti naespirituan nga impormasion a maidatag iti daytoy a miting tulonganna ti adu nga auxiliary pioneer a mangragpat iti kina-regular pioneer. Maysa pay, iti Marso addaantayo iti rag-o a tumulong kadagiti tattao a mangtagiragsak iti naespirituan a lawag babaen ti baro a publikasion a maadal, ti Ania a Talaga ti Isursuro ti Biblia? Apay a dimo ikagumaan ti mangirugi iti panagadal iti Biblia babaen ti baro a libro?
7, 8. (a) Ania ti makatulong tapno makaaramidtayo iti eskediul nga ag-auxiliary pioneer? (b) Kasano a makatulong ti panagbibinnadang ti pamilia, ken kasanoda a magunggonaan amin iti dayta?
7 Bayat nga ut-utobem ti 50 nga oras a maikalikagum kadagiti auxiliary pioneer, ikeddengmo no ania nga eskediul ti nawaywaya para kenka tapno maisilnagmo ti lawag ti kinapudno iti agarup 12 nga oras iti kada lawas. Makisaritaka kadagidiay sibaballigi a nakaaramid iti dayta, kasta met kadagiti dadduma. Mabalin a daytoy ti mangparegta kadakuada a makiraman kenka. Babaen ti nasayaat a panagplano, natakuatan dagiti bautisado nga agibumbunannag, ubing man wenno nataengan, a saan a nakarigrigat a ragpaten daytoy a nagsayaat a kalat. Ikararagmo daytoy. Kalpasanna, no mabalin, agplanoka ken tagiragsakem ti ag-auxiliary pioneer!—Mal. 3:10.
8 Natakuatan ti adu a pamilia a no agtitinnulong ti intero a pamilia, makapagpayunir ti uray maysa laeng kadakuada. Inkeddeng ti maysa a pamilia nga ag-auxiliary pioneer amin ti lima a bautisado a kamengna. Ti dua nga annak a saan pay laeng a bautisado nangaramidda iti naisangsangayan a panagregget tapno rumang-ay ti aktibidadda. Ania a gunggona ti tinagiragsak ti pamilia gapu iti panangikagumaanda a mangaramid iti kasta? Insuratda: “Talaga a nagsayaat dayta a bulan, ken nariknami iti kasta unay a timmibker ti singgalutmi kas pamilia. Agyamankami ken ni Jehova gapu iti daytoy a nagsayaat a bendision!”
9. Ania ti aramidentayo tapno agsilnag ti silawtayo bayat ti panawen ti Memorial?
9 Ti kadi naisangsangayan nga aktibidadtayo iti Marso, Abril, ken Mayo ket agbalin a makaparegta, ken iyadaninatayo nga ad-adda iti nailangitan nga Amatayo? Agpannuray dayta iti mismo a panangikagumaantayo a mangparayray iti ayattayo iti Dios ken iti Anakna ken iti ad-adu a pannakiramantayo iti ministerio. Sapay koma ta ti determinasiontayo ket kas iti salmista, a nangikanta: “Idayawkonto ni Jehova iti kasta unay babaen iti ngiwatko, ket iti tengnga ti adu a tattao isu idaydayawkonto.” (Sal. 109:30) Bendisionanto ni Jehova ti naganetget nga aktibidadtayo iti daytoy panawen ti Memorial. Sapay koma ta pagsilnagentayo ti dakkel a lawag tapno ad-adu pay ti rummuar iti sipnget ken ‘ikutanda ti silaw ti biag.’—Juan 8:12.