Mangipakita iti Personal nga Interes—Babaen ti Panangasaba nga Awanan Panangidumduma
1 Adda nasirmata ni apostol Juan a maysa nga anghel nga agtaytayab iti nagtangatangan a mangidekdeklara iti agnanayon a naimbag a damag kadagiti tattao iti “tunggal nasion ken tribu ken pagsasao ken ili.” (Apoc. 14:6) Sursurotentayo kadi ti ulidan ti anghel babaen ti panangasabatayo nga awanan panangidumduma? No dadduma, adda panangidumdumatayo nupay ditayo igaggagara dayta. Ti kababalintayo kadagiti tattao a masarakantayo apektaranna ti wagas a panangidatagtayo kadakuada iti naimbag a damag. Gapuna nasken nga iparangarangtayo ti napaypayso a naayat a pannakaseknan no kasabaantayo dagiti tattao a nagduduma ti kasasaadda iti biag.
2 Usigem ti Teritoriam: Adda kadi dagiti imigrante wenno nagbakuit nga agnanaed iti teritoriayo? Mabalin a lablabsantay latta idan. Ipamuspusam a biroken ida, ken ikagumaam nga am-ammuen ida a naimbag. Ania dagiti kasapulan ken pakaseknanda, dagiti kayat ken saanda a kayat, dagiti pagdandanagan ken personal nga opinionda? Ikagumaam nga ibagay ti panangidatagmo kadakuada iti mensahe ti Pagarian. (1 Cor. 9:19-23) Kas ken apostol Pablo, masapul a mariknatayo ti obligasion a mangiranud iti naimbag a damag kadagiti amin nga adda iti teritoriatayo, agraman dagidiay ganggannaet, dagidiay addaan iti sabali a kultura, dagidiay agsasao iti sabali a lenguahe, wenno dagidiay nakabakbaknang.—Roma 1:14.
3 Ngem kasano a makasabaam ti maysa a tao a sabali ti pagsasaona? Usarem ti bokleta a Good News for People of All Nations. Mabalin met a mangitugotka iti sumagmamano a polieto wenno broshur iti pagsasao a gagangay a maus-usar iti teritoriayo. (Kitaem ti Hulio 2003 a Ti Ministeriotayo iti Pagarian, p. 4, par. 2-3.) Maysa pay, adda dagiti agibumbunannag a nangikagumaan nga agsursuro iti pangkablaaw ken simple a presentasion iti sabali a pagsasao. Masansan a maragsakan dagiti tattao a dumngeg iti maysa a tao a mangikagkagumaan a makisarita kadakuada iti bukodda a pagsasao, uray no iti limitado laeng a wagas, ket daytoy ti mabalin a manggutugot kadakuada nga umimdeng iti naimbag a damag.
4 Tuladem ni Jehova: No kasabaantayo dagiti tattao a nagduduma ti kasasaadda, tultuladentayo ni Jehova, ti di mangidumduma a Diostayo, “a ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.”—1 Tim. 2:3, 4.