Saludsod
◼ Ania dagiti pagdaksan ti pannakikomunikar babaen ti Internet iti tao a ditay am-ammo?
Adu a Web site ti nairanta a pagiinnammuan ken pagpapatangan dagiti tattao babaen ti Internet. Adu kadagitoy a site ti mabalin nga usaren dagiti indibidual a mangyam-ammo iti bagida ken mangikabil kadagiti ladawan ken dadduma pay a personal nga impormasion. Dagidiay makatumpong iti ladawan ken impormasion maipapan iti maysa a tao, mabalinda ti makiam-ammo kenkuana babaen ti Internet. Kaay-ayo dagiti agtutubo dagiti kasta a Web site, ket adda dagiti agtutubo iti kongregasion nga agus-usar iti Internet tapno makiam-ammo ken makikomunikarda kadagiti sabsabali nga agkunkuna a Saksi ni Jehova.
Ti tao a maam-ammotayo babaen ti Internet nalakana laeng nga ilimed ti kinasiasinona, ti espiritualidadna, wenno dagiti motibona. (Sal. 26:4) Mabalin a saan nga agpayso a Saksi daydiay agkunkuna a maysa kadagiti Saksi ni Jehova. Baka nailaksid wenno aktibo pay ketdi nga apostata. (Gal. 2:4) Naipadamag nga adu a mangab-abuso kadagiti ubbing ti mangus-usar kadagita a Web site tapno makasarakda kadagiti biktimaenda.
Uray pay no kombinsidotayo a dagidiay kapatangtayo ket nasayaat ti takderda iti kongregasion, nalaka laeng nga agtungpal iti naalas a saritaan ti pannakikomunikar babaen ti Internet. Ngamin, adda pagannayasan dagiti tattao a mangibaga iti aniaman a kayatda nga ibaga kadagiti tattao a saanda a naam-ammo iti rupanrupa. Baka panunotenda pay a pribado ti pannakipatang babaen ti Internet ken pagarupenda nga aniaman nga ibagada ket saan a maammuan dagiti sabsabali, kas kadagiti dadakkelda wenno papanglakayen. Nakalkaldaang ta adu dagiti agtutubo a Kristiano a nasiluan ket nairamanda iti naalas a saritaan. (Efe. 5:3, 4; Col. 3:8) Dagiti dadduma nangikabilda kadagiti makagargari a ladawan ken birngasda, wenno kadagiti makapagartem a music video iti Web site nga us-usarenda.
Gapu kadagiti nadakamat, siputan koma dagiti nagannak no ania ti ar-aramiden dagiti annakda no agkomkompiuterda. (Prov. 29:15) Napeggad ti mangawis iti estranghero iti pagtaengantayo wenno mangipalubos nga isu laeng ti kadua dagiti annaktayo. Umasping iti dayta, napeggad para kadatayo wenno kadagiti annaktayo ti makigayyem kadagiti ditay am-ammo babaen ti Internet, uray kadagidiay agkunkuna a Saksi ni Jehova.—Prov. 22:3.